ألمايعرف تدابيره حنطته تاكل شعيره.. كبل 2796  يوم  شمرك الحظ يا نصيب علينه..وعمت عينه للوكت اللي جابك ونصبك ريس وزراء العراق يا أبو سراوي .. ومدري هذا حظنه الجايف لو قدرنه المصخم حتى نشوف هاي الايام السوده بجالك ..أريد واحد أيكلي شنو اللي حصلناه بهاي العشر سنين ..ينطيني بس أنجاز واحد صار لهذا الشعب اللي مو بس جلاويه أحتركت لا وأحترك اللي خلفوه ..بس شغله حتى أفوخ ..أشو العالم تتقدم وأحنه نرجع ليوره ..شايفين أبو سراوي يرشي اليونسكو حتى أيسمون بغداد الخرابه عاصمه للثقافه العربيه ..وحتى أيكول هذا أنجاز أني مجهودي سويته مثل جذبة الامن ..ولكم هو بقى شي بالعاصمه بيه خير حتى تحتفلون بيه..أي يا أبو سراوي أذا  مو شغلتك أشجابك على هذا الكار..تره مو كلمن لزم القلم كال أني صحفي ..ولا كلمن باع محابس وسبح كال أكدر أدير حكومه ..هذا مو برنامج من سيربح المليون حتى أتشارك بيه ..أنت جنت تحلم هذا الشعب اللي عفنته بجيتك أيغنيلك ويركصلك ويسويلك أغاني وأشعار مثل ذاك الصكر اللي جان أيدير العراق من أقصاه الى أقصاه وهو كاعد على كرسيه ..أنت وين وذاك وين ..وأكو فرق بين الاثنين ..أحسك اليوم أبو سراوي مثل واحد كاعد بمجلس كله شيوخ وناس جبيره ويضرط  ضرطه وبيها صوت..لا بيه أيلمها ولا بيه يطلع من المجلس ويسكت.. أنت اليوم بلاع الموس يا أبو سراوي ..كليتنه كنالك يا أبو سراوي هذا العراق تره كلش جبير واللي أيحكمه يرادله طول بال وعنده خلك طويل ولازم أيكون دبلوماسي ويه شعبه يعني خد وعين..والنرفزه والعصبيه وتوصف شعبك بالفقاعه والمعفنين الجياف تره هذا عيب ومتوكل خبز..وتسوي أفلام مال فريد شوقي من أيريد يزوج هدى سلطان بس يجي محمود المليجي ويحطله حشيش لو فلوس مزوره ويبلغ الشرطه عليه..ولان فريد شوقي صديق المخرج ..وبحركه مالكيه..الشرطه تلقي القبض على المليجي وبالاخير يعترف ويرجع فريد شوقي يزوج هدى سلطان..ويمكن أبو سراوي هاي الافلام مشافها ولا راح أيشوفها..
شكد يا أبو سراوي راحت ناس بريئه من وراك..بس كلي شلون تصلي وتقره قرأن..وأنت يوميه أتحط ناس من شعبك بالسجون وتأمر قواتك بضربهم وهمه لا حول ولا قوة ..روح شوف ثلاجات الطب العدلي بمدينه الطب..الجثث مكدسه ومتكدر أهلها تستلمها لان المليشيات أتساومهم واليدفع يستلم حتى يدفن أبنه لو أخوه ..لا الكورد مرتاحين منك ولا السنه مرتاحه..وحتى الشيعه تره يا ناس ممرتاحه من شغلات حاكم ظالم ..خو أنت شفت وسمعت شلون مقتدى طكت روحه منك ومن سوالفك الشينه ..وخلي بعلمك يا أبو سراوي تره حتى الجعفري والحكيم ميقبلون على تصرفاتك بحق شعبك والاخرين ..اللي أيفك حلكه يا أبو سراوي تخيسه بسجونك ويلعن اليوم اللي أنولد بيه بالعراق ..أتبعت سياسه فاشله بتكميم الافواه..وأختيارك السئ لعناصر خليت بيدها الوضع الامني شوف وصلتنه وين..لا دكول السبب مستشاريك الله أنطاك عقل..أنت رجعت العراق الى عصور ما قبل التاريخ يا أبو سراوي..كلشي ممكن أنسامح عليه بس أشجع الحراميه على سرقة هذا العراق وتصير محامي للفاسدين..تعال باوع عبد الفلاح السوداني بلندن يتبرع مليون دولار لبناء مسجد من مليارات العراقيين..أيسوي بيهن زكاة أبن الزمال..وأسمع الغبي علي الدباغ وهو ياخذ عمولته وينتظر منك أن تعينه سفير..وصابر العيساوي اللي خمط المليارات والنوب تخليه مستشار..بدل ما تسلمهم للقضاء أتشجعهم على السرقه وتنطيهم مناصب..
وهسه يا أبو سراوي خلصت الحدوته ..17 وزير طلعو من مجلس الوزراء وهاي فرصه أجتك للحلك حتى تاخذ كراسيهم وتصير ريس المجلس صدك بس على خمسه لو سته وزراء وهم راح يجي اليوم اللي طك رواحهم منك..بس أكو حل روح أتوسل بالصدر لو دزله السفير الايراني ورساله من خامنئي..كله البيت الشيعي بح.. 
وما خفي كان أعظم