الاثنين 26 تشرين أول/أكتوبر 2020

(محاكاة ) مقابلة صحفية مع اياد علاوي ! لاتفوتكم

السبت 12 أيلول/سبتمبر 2020
عدد القراءات: التعليقات
طباعة

اجرت صحيفة ( ما ادري ) مقابلة صحفية مع اياد علاوي رئيس الوزراء الاسبق واجرى المقابلة الصحفي ( مااعرف اسمه ) في قصره في مدينة مااعرف وين ..

الصحفي – يسرني ان التقي برئيس الوزراء الدكتور اياد علاوي رئيس وزراء العراق الاسبق وان اتوجه اليه بالاسئلة على جملة امور سياسية واقتصادية في العراق والمنطقة اهلا وسهلا بك دكتور ابدء سؤالي الاول كيف تتحضرون للانتخابات المقبلة

اياد علاوي – اي انتخابات والله مااعرف اكو انتخابات شوكت ومال شنو

الصحفي – انتخابات برلمانية اعلن عنها رئيس مجلس الوزراء

اياد علاوي – انت تعرف اني ما ادور منصب فما تهمني الانتخابات بس راح نتحضر لها وكما تعرف الشعب كله بأيدنا ونشوف واني اول واحد حاربت صدام حسين

الصحفي -بس انت ايضا محسوب على البعثيين علاوي مقاطعا اسمع اذا انت جاي تستفزني ما اسمح لك كون مؤدب او

الصحفي- لا مو قصدي الاهانة زين انت شلون تشوف العملية السياسية راح تنجح

علاوي – عملية منو سوه عمليه ان شاء الله تنجح مال شنو مال قلب والله ماادري ولا سمعت بها

الصحفي – يقولون انت تخاف من نوري المالكي ومن تشوفه ت… على نفسك

علاوي – اني مااسمح لك انت تستفزني اني مااخاف من الله مااخاف ..اني حاربت صدام حسين

الصحفي – لا دكتور مااريد استفزك اريد اسال يقولون انت تستلم اموال من الامارات ، والسعودية كل سنة تعطيك مقاعد للحج وانت تبيع كل نفر بعشرة الاف دولار والسعودية تعرف بس تريد تساعدك بهذه الطريقة .

علاوي- اني مااستلمت اي اموال من احد هذه كلها اشاعات ويريدون الاساءة لي

الصحفي – دائما تكرر ان حكم صدام حسين افضل من الان بعدك مصر على ذلك

علاوي – طبعا واكيد نظام صدام حسين افضل من كل الذين جاءوا بعد 2003 كانت اكو دولة واكو وزراء مخلصين ووطنيين

الصحفي – لعد ليش طيحتوا حضنا انت وابن خالتك مااعرف ابن خالك احمد الجلبي

علاوي – سوه نفس ما سمع اطرش وغلس عن السؤال

الصحفي – ليش حليتم الجيش العراقي البطل

علاوي – انا ما قبلت على حل الجيش لكن الاكراد هم من اصروا على ذلك وبالذات جلال ومسعود وايدهم السياسيون الشيعة ومن وراءهم اسرائيل وايران . وبريمر رادها من الله لتخريب العراق .

الصحفي – زين شنو سر عائلة علاوي اياد علاوي رئيس وزراء علي علاوي وزير دفاع ومالية محمد علاوي وزير اتصالات ورشح لمنصب رئيس وزراء وجعفر علاوي وزير الصحة ولو صايره ابنتك وزيرة دفاع كان كملت السبحة الناس تقول انتم كنتم من ( الصحابة ) المقربين للنبي وحاربتم في معركة بدر وأحد شنو هذا السر

علاوي – ماكو سر احنا عائلة متعلمة ومتمكنة ولنا مركز اجتماعي والشعب يحبنا هواية وعدنا تاريخنا وعلاقتنا قوية مع ( الماسو ة ) حرفين ناقصة سقطت بالطبع .. واحنا حاربنا صدام حسين

الصحفي – اشو هذه الايام صاير تكتب اياد علاوي الربيعي فهل انت من عشيرة الربيعي وهل صحيح انت ابن عم موفق الربيعي وبعض الناس يقولون انت فيلي

علاوي – ما اسمحلك تسخر منا شلون تشبهنا بهذا المكطم موفق .. احنا عائلة عراقية معروفة عربية هاجرنا من الجزيرة أحد اجدادي كان وزير صحة في مكة المكرمة وهاجر مع النبي الى المدينة وامي لبنانية من عائلة عسران المعروفة واحنا حاربنا صدام حسين

الصحفي – ليش ايران ما تريد اياد علاوي يصير رئيس وزراء

علاوي – مااعرف ماادري والله مااعرف اسالهم

الصحفي – ليش اميركا ما قبلت باياد علاوي رئيس وزراء

علاوي – مااعراف ماادري والله مااعرف اسالهم

الصحفي – شنو رايك ببرنامج مصطفى الكاظمي الاصلاحي

علاوي – اي برنامج مااعرف عنده برنامج بالتلفزيون ما شفته .. مااعرف انا نصحته مثل ما نصحت عادل مهدي نصحتهم ان تكون عندهم برنامج بس ما سمعوا كلامي . اني حاربت صدام حسين

الصحفي – كم تقدر ثروتك يقولون اكثر من 800 مليون هاي منين اجت خصوصا ان اغلب وزرائك اتهموا بالفساد وانت كنت شريكهم

علاوي – انت دازيك حتى تستفزني اني رجل اعمال من زمان وهذه جمعتها من التجارة .. اني … اني وزرائي اتهموا بالفساد منو مااعرف من الوزراء أحد ..هو بس حازم الشعلان وزير الدفاع يمكن اخذ سلفة مليار ونصف دولار …ويمكن اكو واحد شنو اّخر …اسمه ايهم السامرائي وزير الكهرباء واكو وزير شنو اسمه ( اني انسه الاسماء ) واكو جانت وزيرة زراعة عليها قضية شنو اسمها والله مااعرف سرسن لا سوسن الشريفي واكو عادل مهدي وزير مالية ايضا صارت عليه قضية وفلاح النقيب وزير الداخلية يمكن مااعرف صارت عليه قضية مالية وحاجم الحسني وزير صناعة يمكن هم اكو عليه قضية لفلف الصناعة كلها وجان اكو وزير النقل العرس نسيت اسمه حاتم العرس سرق 30 مليون دولار وياها سرق طائرة ..مااعرف وين صار قسم يكولون انهزم واختفى قسم يكولون طلع اشاعة على نفسه انه مات الله يرحمه .. ويمكن وزير التجارة اسمه محمد الجبوري اتهموه بسرقة 50 مليون دولار وثامر الغضبان وزير النفط صارت عليه قضية وجان اكو نسرين برواري سرقت غازي الياور عوافي عليه وعليها ( ستر عليها ) .. ما اتذكر من الوزراء كان اكو يمكن واحد وزير الاعلام اسمه عقيل الصفار اتهموه بسرقة اموال الاسلحة المشتراة من الشعب يمكن اخذ 10 مليون دولار او 20 والله ماادري اني اسالك هذه هم فلوس حتى نحاسبهم .. مثل ما تشوف كلهم الوزراء ايديهم نظيفة ومعروفين بنزاهتم بعدين هاي كلها اشاعات شوف بقوا يكولون ايهم سرق فلوس الكهرباء وطلع كلشي ماكو وكاعد باميركا .. وبعدين لاتنسى اني مااعرف بيهم اذا يبوكون اني ماادري ولاتنسى اني حاربت النظام الدكتاتوري

الصحفي – انت شلون تشوف مستقبل العراق

علاوي- والله مااعرف شلون المستقبل بس مااعرف مو خوش مستقبل اني كتبت رسالة لرئيس الوزراء ونصحته بس مااعرف بعد ياخذ بيها

الصحفي – دكتور يتهموك عندك اكثر من جنسية

علاوي – اخي هذا كلام مو صحيح هذا كلام يريدون الاساءة الى اياد علاوي اني عندي الجنسية العراقية وبس وعندي الجنسية اللبنانية لان امي لبنانية وعندي الجنسية البريطانية لان عشت في بريطانية وعندي الجنسية الامريكية لان عشت فترة واشتريت الجنسية من الدومنيكان .. واكو دولة عرضت علي الجنسية بس بعدها القضية ما خلصت .. فهذا كله كلام اخي انت صحفي يجب ان تكون معلوماتك واضحة وبعدين لاتنسى اني حاربت صدام حسين

الصحفي – شنو قصة ابنتكم سارة والموضوع الذي اثير مع الكاظمي

علاوي – والله مااعرف سارة مثقفة وتحب السياسة وكفوءة وتكتب الشعر بالهندي العفو بالعربي يعني ليش ما تاخذ منصب يعني حنان الفتلاوي لو العريف عالية نصيف احسن منها اني رشحتها وزيرة دفاع وهي عسكرية منضبطة وتفتهم (باليس يم ) ومن كانت طفلة كانت بالكشافة وتفتهم بالخطط العسكرية والاستراتيجيات وقارية هواية كتب حتى على حلف الناتو .. والله مااعرف ليش الكاظمي ما قبل عليها مااعرف .. ((يبوووو يبو تصوروا سارة وزير دفاع العراق ))

الصحفي – سؤال اخير وارجو ان تتقبل صراحتي يقولون انت عميل امريكي وعميل انكليزي وعميل لدولة خليجية وتستلم فلوس منهم

طاخ .. طيخ طاخ صار ضرب وعركة بين الصحفي واياد علاوي … هاي شلون ديمقراطية وشلون رئيس وزراء… طاخ




الكلمات المفتاحية
اياد علاوي محاكاة

الانتقال السريع

النشرة البريدية

User IP Address - 138.201.194.13