الجمعة 27 مايو 2022
20 C
بغداد

بالجلفي كلش سالفة ثانية

گعدت الصبح لگیت الدنيا واجة للستار، الفيس مگلوب الواتساب يدگ إشعارات ويرد لورا. خير بوية شصاير شنهي انقلاب حرب عالمية. دخيلك ربي من التايهات، واذا الطرگاعة الچبيرة قد نزلت على مضارب بني عبس. ضابط ايراني مهتلف ما يسواله فلسين معتدي على زايرة عراقية وناس تصيح وا معتصماه وناس تريد شن الحرب وانور الحمداني لابس عسكري وكلها تصيح لازم ناخذ الثار من الفرس المجوس مثل ما أخذنا گبل بثار فريال.

عمي غير الحق ينگال، الناس حقها وهذه سالفة ما ينسكت عليها، حتى اذا اجا السفير لبيت العلوية واعتذر، شنو احنا زواج ونتقشمر بهواي السوالف. احنا اي واحد يعتدي على حرائرنا ننعل والد والديه، لو مو يدزه ولي الفقيه، لو اكبر واحد بيهم ما نقبل الا ناخذ بالثار. ها نسيت! ولي الفقيه هو اكبر واحد بيهم، بس هم ما نسكت، احنا نسكت على الاهانة والذلة وين صايرة هاي؟ بعدين اسولف لكم شلون ما نسكت على الذل والاهانة خلونا منها هسة. لان طرگاعة اكبر جايتنا.

ورا يومين نفس الفيس طگ ذيج الطكة بس هذه المرة مو سادة لا مقلم ومربعات. هذه المرة الصيحة، احنا شعب نريد نرتاح ونعيش بسلام، ملينا من الحروب وليش تورطونا وكافي عنتريات فلسطين وقدس ومن هذي الكلاوات اللي ما وكلتنا خبز.

هسة اني دخت ما ادري اروح ألبس زيتوني وأشغل هلهل شاجوري ويا گاع ترابچ كافوري، مدري اصير من انصار السلام واطير حمامات بيض ونفاخات ملونة يم ابو نؤاس. خلونا نسولف بيهن وحدة وحدة ونشوف شلون نطلع من هذه الوَحَلَة اللي دشوشنا بيها.

اللي اعرفه اذا الله ما يچذبني آخر مرة تكاونّا (يعني تهاوشنا او تعاركنا) وي اسرائيل جانت بال73، وراها ولا طلقة طلعت من العراق على اسرائيل، بس هی ليش عافتنا لا جتي وقصفت مفاعلنا النووي واحنا لا يمها ولا گرباها وچنا فوگ الضيم نحارب عدونا وعدوها ايران، وظلينا ساكتين وبلعنا الموس. استغفر الله واعوذ بالله من النسيان مو ضربناهم بحرب الكويت بالصواريخ ودگ عليهم، بس حظيظان ولا واحد صار بيهم كلها بالچول ويگولون من جمعوا الخسائر طلعت اثنين عجايز مخترعات من الطگة وجاهل صايرة بيه فزة ويبول بالفراش من وراها. يعني احنا ما عايلين بيهم ودفعنا تعويضات حتى فلوس اليطغ والدفنة مال الحجيات الله يرحمهن طلعت علينا. زين هسة ليش ضربونا اكو احد هسة طاگهم بچيلة، بقنبلة، ضارب له يهودي راجدي، كفيلكم العباس ابد ولا واحد واصل حدهم.

خاف ضاجوا من التهمبل مال چم سياسي فخو مو اكثر من جيش القدس ابو سبع ملايين وهذني اللي شالهن ابو عداي بالتلفزيون ومحد يعرف بيهن شنهي ما شنهي وعلى اساس يمسحن اسرائيل. خو ربعيتنا هسة لا حس ولا نفس ومستحين حتى يگولون اسرئيل ضربتنا خاف ينجرح شعور ترامب. لا اسرائيل عاقلة ومتدير بال للحچي.

واذا ضربت صواريخ ايرانية ضامتها عدنا فهذه معقولة كلش وحقها تضرب ايران، بس يعني عود صدگ ومن كل عقل اللي يحچي ان ايران عافت كل اراضيها وجتي ضمت الصواريخ الباليستية بابو دشير، على اساس شنو ابو دشير بيها القبة الحديدية لو تحميها أس 400. عمي انتم ابو دشير تندلوها وين صايرة لا واللي ما يندلها ادليه عليها. عرب جبور او اللطيفية المصغرة خاف نسيتوا شمرة عصا من المخزن المضروب يعني ايران عافت كل گاع الله ومخازنها ام الانفاق جوة الگاع اللي طلعوا لوريات تمشي بيها هذه كلها عافتها وجتي على عرب جبور وگالت لهم دخيل الله ودخيلكم ضموا فد چم صاروخ يمكم لان قبطنا وما عدنا مجال بعد، وانتم سرانين كلش ومنطقتكم مستحيل تگدر تكشفها اسرائيل والصاروخ اذا فات خو محد يشوفه عبالهم بواري مال مجاري ولو ابو دشير ما بيها مجاري ودومها طافحة.

هم قبلنا ايران ضامة الصواريخ بعرب جبور، بكيفكم وامرنا لله، بس ابو علي الدبي الله يرحمه هم چان شايل صاروخ بالبيكب نص طن اللي انضرب يمكن ذاب جنفاص ابيض فوگاه مغطيه وهذا الصاروخ اللي شايله، بس لا مال صعاديات لان هذي اول مرة اسمع صاروخ باليستي ما بيه حتى مترة ونص.

عمي مقتنعين ما نختلف ضربت اسرائيل اهم شي نبقى صحاب ولا تزعلون، بس انتو عود ليش خايفين من اسرائيل، اسرائيل لو حاربت تضرب عل السريع وتروح واذا طولت بالحرب خمس ست ايام كلش كلش اسبوعين تلاثة، واذا تريد تضرب خو تجي تضرب جماعة ايران مثل ما تسوي بلبنان وتروح خلف الله عليها. هم هي ترتاح، واحنا هم نرتاح منهم فعلى شنو خايفين اصلا اذا ضربتنا اسرائيل كلش زين تسوي، وتخلصنا منهم وبعد ما نشوف لا عمامة ولا حشد ولا هم يحزنون ويخلالنا الجو وللصبح.

بس تعال الطرگاعة اذا حاربنا ايران، عجمي ومچلب بشباچ العباس. ردنا نص شط العرب وزين القوس وسيف سعد، ما فكونا ثمن سنين. بالموت الاحمر ياله اقتنعوا ويضربون عامي شامي بلاط الشهداء وهاونات وصواريخ وهاي شوكت من جانوا بطرگ مفاتيح الجنة خاف ناسيها. هسة وين صاروا، صواريخهم وگعت طيارة امريكية منجمة بالسما وامريكا بجلالة قدرها ظلت ساكتة وتفر براسها وعدهم نووي وصواريخ والاطگع من كل هذا جماعتهم الحشد محتلين العراق من الموصل للبصرة خلف الله على كاكا مسعود چان حتى اربيل راحت.

هسة اني ما اريد اخلي بخاطركم شي وجيت وياكم، اريد احاربهم. وين بالله احاربهم بالچوادر لو بشارع الفلاح، بساحة عدن لو بحي العامل؟ اذا ربعهم تارسين الدنيا وخو ذولاك اهل مفاتيح الجنة ما يخلصون يركضون على الالغام وكيمياوي وما فضت وياهم.

مو تگولون ايران محتلتنا؟ ولا داعش فادت وياهم ولا القاعدة وشفايتلنا لو باقين على وكت ما قبل داعش چان على الاقل ما طبت ايران طول بعرض وما خلت محافظة ما وصلتها هسة حتى الاربعة المنتفضة ما خلصت منها ولا جرف الصخر، وسليماني رايح جاي وما خلا مكان بالعراق ولا خلاها بنفس واحد من الحشد ما اخذ صورة ویاه. واذا ذيچ المرة على سگاطهم ما فكونا الا ورا ثمن سنين وبالتواسيل وزوعونا العافية هسه عيني شلون وامورهم العسكرية ترتبت وربك لا يظلون يكتلون بينا ليوم الدين ويصيحون هل من مزيد ويابو بشت بيش بلشت.

اگول مادام ما عدكم مشكلة وي اسرائيل وعاجبتكم وتدورون سلام وبزعت رواحكم من الحرب خو بهذي المناسبة السعيدة نسوي سلام وي ايران ونخلص من شرها ونفتك من الحروب فد نوب وعلى كل الصفاح.

واذا ندور حرب، فعمي ترة اللي يخوف بالحرب ايران مو اسرائيل واللي ما يصدگ خلي يسولف لی شوکت اخر مرة اسرائيل ضربت بيها ايران ليش هو اكو اصلا اول مرة؟

بداعتي من تروحون يم ابو نواس تسوقون بايسكل، كولولي لان ناذر اطير نفاخة من ترسولكم على بر.

المزيد من مقالات الكاتب

ترك الرد

من فضلك ادخل تعليقك
من فضلك ادخل اسمك هنا

تواصل معنا

450,712معجبيناعجاب
861متابعينتابع
1,900المشتركينالاشتراك
- اعلان -

أحدث مقالات ساحة الرأي

https://kitabat.com/wp-content/uploads/2017/06/kitabat-logo-1.png

شروط تعجيزية ومقاعدة قليلة للدراسات العليا

الكثير من الاصدقاء يحلمون بإكمال دراستهم, لكن يصطدمون بالشروط التعجيزية التي لا يجتاحها الا ذو حظ عظيم, ومع ندرة مقاعد الدراسات العليا نجد اغلبها...
https://kitabat.com/wp-content/uploads/2017/06/kitabat-logo-1.png

الانتخابات القادمة وحركة التغيير !!

لا يفصلنا عن الانتخابات القادمة سوى عدة شهور , وحركة التغيير في محلك سر , لا تحرك على مستوى الاقليم أو العراق , وهي...
https://kitabat.com/wp-content/uploads/2017/06/kitabat-logo-1.png

تعيش الحكومة…يسقط الشعب!!

في كل الزمكانيات والدساتير والأعراف والسلوكيات السياسية المتعارف عليها أن الشعوب هي التي تصنع الحكومات وتصوغها وتُنتجها بطرق شتى، فبعضها تُولد من رحم الديمقراطية...
https://kitabat.com/wp-content/uploads/2017/06/kitabat-logo-1.png

الرغيف والرغيف!!

الطعام سلاح وقوة سيادية وقدرة على المطاولة والتحدي , والمجتمعات التي لا تطعم نفسها تعيش ضعيفة , ومحكومة بإرادة الآخرين الذين يوفرون لها الطعام. والعجيب...
https://kitabat.com/wp-content/uploads/2017/06/kitabat-logo-1.png

مسؤولو عراق اليوم.. أين أنتم من قادة عراق الأمس الميامين؟

ـ1- الزعيم عبد الكريم قاسم! قادة عراق الأمس الميامين ـ كان يسكن مع أهله في دار للإيجار.. ثم بعد أن أصبح برتبة عقيد انتقل للسكن ببيت...
https://kitabat.com/wp-content/uploads/2017/06/kitabat-logo-1.png

العملاق كيسنجر والفأر زيلينسكي!

يؤسفنا ايّما أسفٍ لإستخدام مفردة " فأر " بحقّ الرئيس الأوكراني " فولوديمير زيلينسكي " , < وهي المرّة الأولى التي نستخدم فيها مثل...