بعيداً عن سالفة وزراء الداخلية و الدفاع و بعيداً عن تصرفات النواب و الحاحهم على موقفهم الوطني الي اتعودنا عليه و بعيداً عن الايام الدامية الي ودعناها و بعيداً عن مخاوف الشارع العراقي تجاه المستقبل الفني للعراق المشكلة الوحيدة الي يعاني منها العراق حالياً دعت المواطنة ام هرش على النواب و الله استجاب دعوتها و وگع الدكتور تحسين الفلاني (تحسين ابو الليل) بورطة ويه النائبة (چتّالة) بالجلسة الماضية.
چانت گاعدة بصف زميلتها و تحسين گاعد گبالهن و فاتت من يم مقعده وحدة من امهات اللبن و گال (هم اكو وحدة حلوة بالبرلمان؟) و ظل يبصبص على الي گباله و كلهن چنهن ابوه الله يرحمه و دار وجهه على اليسرة و شاف وحدة شعرها مفتوح و ما مغطيته و گال (اي يا الله هاي يمكن صاكة) و دارت وجهها و طلعت چنها عمه حمودي و دار على الجهة الثانية و شاف وحدة بيها شوفة بس لو ظالة دايرة وجهها احسن.
و مال راسه زايد حتى يشوف الي وراه و ياريته ما سواها و اتورط و وگعت عينه بعين چتّالة (چنها خاله فزع) و خزرته و طلعت شرارة من عينها و سوتله حركة تهديدية و تحسين ما اهتملها و ظل يبصبص و كل ساع توگع عينه بالغلط عليها و هم تخزره لحد ما ضاجت و گرصته حتى يگعد راحة و هو رجع گرصها عود يرد گرصتها و شافه ابن عمها الي گاعد قريب منهم و هم نائب و راد يگوم يسوي عركة حسباله يتحارش بيها بس ما راد فضيحة.
كتب جملة بورقة حتى يشمرها على تحسين يقراها لأن ما عنده رقمه و استغل الهوسه الي صارت بين احد النواب و رئيس المجلس و ذب الورقة بحضن تحسين و فتح تحسين الورقة و چان مكتوب بيها (اريدك بموضوع وره الجلسة اتصل بيه ***********) و تحسين ما يعرف شنو الموضوع و ما چان يتوقع الموضوع اله علاقة بالگرصة و حسباله شغل لو مشروع او من هالسوالف.
خابره و وره السلام و التحية و المجاملات اتواعدو يلتقون بالبيت مال ابن العم و راح تحسين و حمايته بره ظلو و دخل و لزموه حماية ابن العم و چتفوه و گال (گدامك شرط تتزوج چتّالة لو افضحك و انشر قضيتك بالاعلام؟ و اني علاقتي قوية بالقيادات تره كلها تگلب عليك و يدگولك طابع و هاي قضية اخلاقية تنشهر بسرعة و احتمال نسحب عضويتك) تحسين راد يتسودن عمي يصوم يصوم و يفطر على چتّالة ! و گال عمي خل ينشر القضية قابل اول واحد ينشهر و شيوصلها لسحب الثقة صعبة هالشغلة؟ بس لا ذولة كل شي يگدرون ! ينشهر و لا ياخذ چتّالة بس شلون اذا صدگ گلبو عليه و گال (انطيك شگد ما تريد بس اعفيني من هالشرط) بس ابن العم عاند و قفل و السمعة فوگ الفلوس و گال (بس اني عندي سكر عاجز عن الزواج) و هو چذب ما عنده سكر و ابن العم ما صدگ الا يشوف التحاليل.
اجت ببال تحسين فكرة يسوي تحليل مزور من اي مختبر و چان رايح لمختبر محلل يمه و ليهسه ما ماخذ النتيجة و دز جماعة و جابو التحاليل و بعده ما طالب تحليل مزور و طلع التحليل الاصلي صدگ بي سكر! و تحسين ما عرف يضوج لو يفرح و وصل الخبر لابن العم و هذا رأساً بدل و دز رسالة لتحسين يريد فلوس و تحسين صفن و گال اكيد ما يفضح بت عمه و ما يسويها و يشهره و دزله رسالة كاتب بيها (روح اقبض من دبش).
