* يا شالحة تيابـــــِـــــك لَحتى ينعرف

عندك قضية حـــقّ بعدا جارية

كَـنـّا القضيــــة لابسِة تْياب الشرف

متلِك رح تصير القضيّة عارية

* الانسان ربّو بالجَمــــال مكرّسو

وبكتاب أخلاق الكبيـرة مدرّسو

وعا قدّ ما تكون القضية مقدّسِة

مش قدّ هالجسم اللي الله مقدّسو

* الانسان يللي صار وردة وانتشر

عطرو، وعـن الاخلاق بيوزّع بُشر

بيشوف حَالو بْموهبة خِلقت إلــو

مش بالمصيبِــة العايشِة بْجسم البشر

* كانت وراق التيــــــن تنفعنا كتير

تغطّي العيــوب وكانت بْسِعر الحرير

يبست وراق التين عا جسم البشر

وهرّت وظهرت عَورة الجسم الحقير

* كلما قبعتي زرّ بالتـوب الحزين

كلما قبعتي زرّ مــــــــــن هالسوسني

وبشوكِة الزهرة فلَحتي بالجبين

وفلحِة جبينك كبّرت عــِــــمرك سني

* بَكّلـِي زْرارك ومــــا تخلّي الدلال

ينزل من الخزنة عَلــى عْيون الرجال

تــْيابك قزازي حِامية لَوحة صُور

بْـكَسْرْ القزازي بْينكِسِرْ كـــلّ الجمال

* شدّي كتافك جلّســـــــي رَاسك طلوع

وخلّي الحلا يجمع فتافيت الحَلــى

ما تنحني بْراسك ولا ترضي الركوع

الا ع أرض المعبد بْيـــوم الصلا

* عندِك خيار تْحافظـــــــــي ع الكبريا

أو شجـــــــــرة الشّر بْإيديكي تِسقيا

ومن قبل مَوتك ترجَعِي كَمشة تراب

يدعَسْ عَليهـــــــا العمْرْ ويغمّق فِيا

* بالعِزّ مش بجناحـــــــن بْيـِعلْو النسور

وإنتي حْصِدِي العِبرة مِنِ جْبين الطيور

بْدال ما تكونــــــي شطّ يستقبل مْواج

كونـــــِــي صَخِر بيكسّر مْواج البحور

* إن كان منـّك شطّ بالرَمْــــــل انفلش

وعـَـــــــم يندَعَسْ مع كلّ يوم وطلعْـتو

لا الجزْرْ رح بيموّت رْمالك عَطَش

ولا المدّ رح يبنـــــــــي ع قلبِك قلعْـتو