اي واحد بالحكومة العراقية يطلع بالتلفزيون يكول اني ما استلم راتب اشتغل بلاش, اي خطية مو ملائكة على اساس زين اذا متاخذون رواتب لعد منين هل السيارات والقصور والارصدة الي بسويسرا بس صحيح همة ممجذبين مماخذين رواتب لان همة يبوكون فبعد ليش يحتاجون الرواتب!
الاخوة البواكة بهيئة سياسيين يتحفونة بتصريحاتهم الي واحد لمن يسمعهة عيونة تدمع لا اراديا, شنو هل التضحيات الجسيمة الي يقدمهة السياسيين الي بالعراق يشغلون بدون رواتب, صالح المطلك الافندي يكول اهل الانبار والناس تعرفني اشتغل بلا راتب, وصرح قبلة نوري المالكي (ابو اسراء المسكين)! الي اسمة موجود بقائمة اثرياء العالم وهم كال نفس الشي اني ما استلم راتب, ونفس التصريح لبهاء الاعرجي كال اني اشتغل بلا راتب, لعد العجز الي بالدولة منين اجة رحمة لوالديكم؟
هسه واحد من يبوك كون يستحي على نفسة تردون تبوكون بوكو يطبكم مرض, لان الشعب مغلوب على امرة ويشوفكم تبوكونة, بس وكت الانتخابات تضحكون عليهم هذا ليصوت للشيعي خل ينطي صوتة لجماعتة, والشيعة نفس الشي انطي صوتك لجماعتك, وبالحقيقة السياسيين من نفس الطينة شيعة وسنة يبوكون بالناس, المهم هسة تبوكون يبطكم مرض ليش تطلعون تضحكون عل الناس احنة نشتغل بلا راتب ولكم حتى رواتب الموظفين بكتوهة حتى فلوس النازحين بكتوهة حتى فلوس وزارة الصناعة بكتوهة وكلمن يبوك يروح يسويلي فضائية ويكول اني اشتغل بلا راتب لعد الفضائية منين سويتهة من الراتب الي متنازل عنة.
زين اذا انتو ملائكة الرحمة وحتى رواتب متاخذون عمو صالح وعمو نوري وعمو بهاء وشوف منو ينضم لقائمة الخيرين بعد كم يوم ويكول اشتغل بلا راتب, اي عيني انتو الغمان الثلاثة اذا تشتغلون بدون رواتب لعد وين فلوس الدولة راحت, وليش الناس عايشة بحالة تقشف وكل اربعين يوم حسب التقويم الشهري للبواكة يلة الموظف يستلم راتب, وليش وزير الكهرباء الي مشتعل بيتة باليل وبالنهار ومسوي حفلة انارة ابيتة يريد ينعل ابو المواطن ويخلي يدفع 900 الف بالشهر, لان حضرة جنابة الكسيف يقبض كومة فلوس راتب وميدري بالفقير شلون يدبر الايجار, فيكدر يدفع
حسب التسعيرة الجديدة لان هوة وزير , وظالم النفس حتى مفكر بصالح ونوري وبهاء منين يدفعون فاتورة الكهرباء وهمة متنازلين عن رواتبهم اصلا, هنيالكم ياشعب واخيرا توحد الساسيين شيعة وسنة واتفقوا على يبوكون فلوسكم بعد شتردون, وتحية للي ميستلمون رواتب ومسوين فضائيات!!.
