يااولاد الكلب … والشعب جوعان!!

(نعدكم أيها الشعب العظيم عندما يحصل الواحد منا على ألف متر, شريطة ان تكون مطلة على دجلة, سنخلوا بأنفسنا للتفكير بالمرحلة القادمة من المعركة الإنتخابية لنرفع رؤوسكم عاليا فأنتم تستاهلون أكثر)..!!
 هسه عرفت, ليش هالعركات دتصير بين المالكي وعلاوي والشلة الباقية, وبين النواب اللي ما انتخبنه ولا واحد منهم , وصعدوا من قبل احزابهم بالتزكية, بس 17 واحد فازوا صدك, ومرات نسمع تشابك بالايدي, ومرات تصير بوكسات, حقهم والله, تعالوا وياي حتى نعرف شكد راتب كل واحد منهم حسب الموازنة مال 2013  بس , يا جماعة الخير,المنافع الاجتماعية للرئاسات الثلاث تبلغ 22 مليار دينار, هذا المبلغ مو مال الرعاية الاجتماعية, لا , عيني, هذا المبلغ,مقسم نثريات غير قابلة للرد بعد انتهاء السنة المالية, بمعنى كل رئاسة تلغف 7 مليار و500 مليون دينار, بس راتب مام جلال ما عدى المنافع ورواتب حمايته ومستشاريه وأكله وشربه والدوى والعلاج, 15 مليون دينار عراقي صافي,يعني ينطيها المحاسب بيده, وهو جالس على كرسيه, ويكولون صمام, بس لحد الان ما اعرف , صمام مال شنو, بلكي واحد من جماعة الخير, يجاوبني على سؤالي, وهسه مسوي وكالة خاصة بس لاستلام راتبه الى باب هيرو ابراهيم, لان هو مام, فهي تصير باب .. وراتب السيد نوري المالكي, رئيس الوزراء, والقائد العام للقوات المسلحة, ووزير الدفاع,ووزير الداخلية, ورئيس المخابرات, ورئيس البنك المركزي.. واذا اكو مجال بعد هوايه تره, راتب المحفوظ يبلغ ايضا 15 مليون, وهم ما عدى المنافع والامتيازات واللي ذكرناها للصمام.. وراتب رئيس مجلس النواب, هم 15 مليون, شوفو, حتى بالفلوس اكو محاصصة وتوافقية, شيلني واشيلك, وهم يكدر المحفوظ, يأثث بيته, وبيت اللي خلفوه, وبيوت الموصل كلها, بس مو الفقيرة, لان هو والفقراء, ماكو محاصصة وتوافق,وهم نفس القوانه, رواتب الحماية والطباخين والاوتجي والعطور مو العراقية, لا يابه, ويكدرون ذول الثلاثة, من نثريات خاصة, ما تنذكر بالموازنه, حتى لا يحسدهم ذوله الشعب, اللي يسكنون في المقابر, وبالعشوائية, وببيوت الدولة, وكل يوم, يهددوهم بالاخلاء, واكو ناس, مي المطر بعده ببيوتهم, ومحلاتهم, بس جزاه الله ألف خير محافظ العاصمة, راح يلغف,عفوا, راح يوزعلهم مكرمة المالكي , هيه مليون وخمسمية ألف دينار لكل بيت تأذى, بس ويه الضرائب والاوراق والحبر والحفلة اللي راح تصير بقاعة المحافظة مع اجرة قارئ القران , تبقى 500 ألف , تريد لو ما تريد, طبك ألف مرض, وهاي طبعا, دعاية انتخابية مسبوقة, مثل ما سوا المالكي البارحة, ودز بالكوه, شبابنا بالحلة وكربلاء, والعوجه الجديدة, بسيارات مجهزة بكل ما تحتاجها العائلة العراقية, ورفعوا صوره مثل الطاغية اللي كبله, بس خطية مو هوايه, عيب عمي عيب, لا تسويها بعد, خلي الامور طبيعية احسن, واذا تريد سوي حكومة طوارئ, وبيك وبالطره للعراقية والكورد, بس خلي وياك, ابو الطاولة المستديرة وهداوي بدر, حسب مقترحات سليماني,وفيط بكل من يظاهر وبكل من يكتب بكتابات!!! ..
واسمعوا بعد, وكل رئيس حزب او كتلة, رواتبهم بحدود 12 مليون دينار, مثل علاوي والحكيم وامثالهم, وطبعا مع كلشي.. اما السادة الوزراء رواتبهم مثل رواتب الضفادع في البرلمان, كل واحد 8 ملايين دينار, وهم نفس الطاس ونفس الصابونه, وامتيازات ومنافع, لا صايره ولا دايره, اما رواتب الوكلاء فهي 6 ملايين , ومرات توصل بالقدرة 8 ملايين, وحسب الوكيل وشطارته..
اما المحافظين ال 15 فرواتبهم 6ملايين ما عدى الفرهود, ومرات تطفر الى 15 مليون, وهم نفس القوانه, لان ذولة كل واحد منهم, دولة بعينها, وعدهم من الطرق والحيل, ويدخلون بعين الواحد, ويكولون, احنا بالقانون, كلشي نسوي وفق الدستور, ويفسرونه حسب مزاجهم, وتطلع انت بوجه الكباحه, وتصير ارهابي, وبعثي, والعنصر المهم من القاعدة..
نجي هسه على رؤساء المجالس المحلية, ذوله مافيات رهيبه, حتى المافيات العالمية تدرس حاليا الوسائل والاساليب اللي يستخدمها رؤساء المجالس العراقية, في الوصول الى الغايات بصرفيات شبه معدومة, وبانجاز كامل ووفق الدستور, ورواتبهم وصلت الى مليار دينار , ويتفرع منهم نوابهم, واللجان الامنية والاقتصادية والزراعية والصناعية والخدمية ووو, ومدراء البلديات والتربيات وووو, وطبعا لكل واحد من هؤلاء فرقة مدرعة من الحمايات والحاشيات وما الى ذلك من ما خفي وكان اعظم..
يعني وباختصار وبدون دوخه, وارد براميل نفط حقل مجنون كله, بس رواتب الى الضفادع ووزراء العهر وحاشياتهم, واكو ناس ما تعرف طعم التفاحة من طعم البرتقاله, واقسم بالله, اكو ناس عراقيين ما يعرفون اللحم الا بالمناسبات الدينية فقط ,لان المناسبات الوطنية ما بيها لحم, ولكم بويه اتقوا الله ونبيه بشعبكم, لان الماله خير بشعبه مال خير باهله, وكل هاي الفلوس العراقية , واحنا شعب تعيس شعب محروم من ابسط مقومات الحياة, انتو عايشين فوك واحنا باسفل السافلين..
 يا اولاد الكلب!!!!!!!!
وما خفي كان اعظم