شكد خباثة عدنه.. بس كالو نوري المالكي قولونه يوجعه..أشتغلت عليه السجاجين أوين ألتوجعه.. هذا أيكول الحكيم أنطاه بوري تحفه ورفض الائتلاف وياه ..فلازم أبو سراوي ميحضر الحفل التأبيني ..وهذا أيكول الصدر ميريد أيشوفه ولا يسمع بأسمه هالنوب يتحالفون ..حتى أيلعبون شاطي باطي .. بس أتريدون الصدك.. أبو سراوي جان كلش مريض نفسيا ومتعب لان حس بالاخير كلشي ضاع من أيده ويباوع بعيونه شلون الباقين ميريدونه عبالك بيه جدري.. والنوب دا أيشوف ناس رايحه للمرشد وناس جايه ببشاره من السيد أوباما والاهم خسر الولايه الثالثه وما عاد أيفكر لا بأغلبيه ولا ضراط.. أي هاي تالي الدنيه..بس اللي من أيده الله أيزيده.. يعني لو ولو زرعوه وما خضر.. لو جان المالكي قريب من الشعب , وحس بالناس التعبانه وعرف شنو البطاله وميجذب على العراقيين ويكول الكهرباء راح أنصدرها ويخلي الشعب أيعيش بالظلمه عشر سنين.. ولو بس يطلع بره شويه ويشوف بعيونه الزباله اللي بأذن الله راح تنشر الامراض والاوبئه وأفواج الجريديه والفار اللي حتى البزون أيخاف منهم والمستنقعات ومي المجاري الطافحه راح يشتمون العراقيين الروايح اللي تنبعث منها بالصيف القاتل.. أني متأكد المالكي وزمرته اللي يرادلها خنك من البلعوم أيعرفون أكو مناطق هوايه بعاصمة البوك واللغف ما عدها مي تشرب منه ولا تغسل العفونه اللي لزكت بأجسامها وحتى لو يجي بتالي الليل عبالك بلبول أبو سراوي من توجعه مثانته كطره كطره.. أكو ناس يا مختار جوعانه وتعبانه ولازم تخاف منها ومن ربك اللي خلقك بالغلط .. أتقي الله يا رجل بهذا الشعب..
هاي الوعكه يا أبو سراوي أشاره من الله حتى تراجع نفسك.. أحجي ويه نفسك وأسألها..ليش أنطيت أوامر للقضاء حتى أيغلقون التحقيق بصفقة السلاح الروسيه.. ليش مليارات العراقيين تتوزع على ولد كحبه بس أيريدون خراب هذا البلد..ليش توكف بجانبهم وأنت تصلي ورايح للحج وتقره دعاء كميل..شوف الامام علي هذا التقي الصالح الامين شلون يبجي ويدعي ربه ليل نهار حتى يغفرله عن خطاياه هاي أذا جانت عنده نص خطيه.. جاه أنت أبو سراوي شراح أيسوي بيك الرب في العلى على ذبح شعب بالكامل بدم بارد وتسمح للمافيات بنشر الرعب بين العراقيين.. أسأل نفسك وسوي لجنه وأعلنها للشعب بنفسك وأعرف منو اللي ضحك عليك وعلينه وجاب أجهزه تعبانه للكشف عن المتفجرات وراح ضحيتها ألالاف من هذا الشعب.. جواد البولاني وهادي العامري وعدنان الاسدي وجهاد الجابري وأكو بعد جم واحد قشامر ذوله ميخافون الله ومخافة الشعب اللي أنطاهم كلشي حتى أيصيرون أوادم بس يا أبو سراوي طلعو يسخرون من هذا الشعب..وشوف بلد كافر يحكم على المجرم اللي ضحك على مسؤوليك وأحنه بلد مسلم نرفض حتى الاعتراف بخطئنه ونبقى نكول هاي الاجهزه تعمل بشكل جيد..
أنت يا أبو سراوي بأواخر أيامك ولازم تسوي شي زين حتى أيذكرك هذا الشعب وينسى كل أنجازاتك العفطيه .. خلي القضاء العراقي يطلب بجلب حازم الشعلان وعبد القادر العبيدي وأيهم السامرائي وعبد الفلاح السوداني وعلي الدباغ وعبد العزيز البدري وفاروق الاعرجي وعدنان الاسدي وجواد البولاني وهادي العامري وزياد القطان ونائر الجميلي وفاضل الدباس والتحقيق معهم قضائيا والبرئ يطلق سراحه والمجرم اللي باع هذا الوطن والمواطن يأخذ جزاءه..
هسه تشوف يا أبو سراوي كلها تكلب عليك وما تشتريك بدينار من أيصير شي وكلهم أيذبون مشاكل العراق والعراقيين عليك وعلى زمرتك الملعونه اللي كاعد تلعب بالشعب يمنى يسرى والمصيبه أحنه ساكتين عبالك شلل نصفي صابنه وبس أنباوع ونتحسر على العراق وهو ينتهي شويه شويه على أيدك.. بس لا بد ما تجي الغبشه..
وما خفي كان أعظم
