يمعودين يا انتماء يا وطنية يا بلد، ناس تقول هنود وناس تقول اتراك وناس تقول باكستان وناس تقول عرب من الجزيرة العربية من السعودية وناس تقول فرس من ايران وتاليها كلمن يلوم على الثاني اصله وفصله … شعب ايش احنا … تجيها من الأصول يطلعلك بسالفة، تجيها من الدين يطلعلك بسالفة، تجيها من المذهب يطلعلك بسالفة، تجيها على نفس المذهب هم يطلعلك بسالفة، تجيها من اربع كتب قاريها لمن غلط وقرا فد يوم وهم يطلعلك بسالفة، تجيها من تاريخ يقلك سومري وبابلي وآشوري وكلداني وهم يطلعلك بسالفة ما تدري منين …. المهم يطلعلك بسالفة تصفنك فد اربع ايام على هالتخلف اللي احنا بيه!!!
عذرا بس شكلنا شعب منتهي الصلاحية، شعب منتهي خلصان بعد ما بيه مجال لو يحلفولي ستين الف يمين انه بعد بيه أمل هم ما أصدق، جزت بطلت كافي شنو هي تهمة الواحد بينا يكون عراقي لو بلوة وابتلينا بيها!؟
أقول هو العراق عبر تاريخه العريق يريدوه أمة وحدة من سلالة وحدة من جد واحد !!؟؟ يعني اشلون بس اريد افتهم !؟ اذا احنا عبر التاريخ لو محتلين دول ثانية لو دول ثانية محتلتنا لو جايين ناس للتجارة وبقوا يمنا لو فترة العبيد والسبايا لو الغزو لو من كان العراق بلد العلم وغزته العقول من كل مكان. بس اريد افتهم اشلون يصير العراقي عراقي بهالعراق !!؟؟ أسمر لو أشقر لو يمكن أحمر لو أخضر !! شنو هالتفاهة يا ربي الى متى نبقى بهالعقلية!! يحضرني مرة موقف وية عراقي خارج العراق، واحنا دا نلتقي في اجتماع عمل، قدملي كرت التعريف مالته بيه اسمه الاول (مكلنزه بالانكلوزو يعني حتى مو اسم متداول عدنا) ولقب عراقي، واني اسمي واسم جدي بلا لقب، في لحظة التعارف وبغفلة من القدر وبلحظة توقفت الكرة الارضية وضرب الاجتماع بعرض الحايط وقال لي: “انت ليش ما كاتب لقبك على الكرت، شنو انت مو عراقي لو ما تعرف أصلك” !!!!!!!!!! مهنية وثقافة ورقي وبطيخ همين، صفنت بيه للحظات قلتله نعم اسمي “صامد العبادي” جان يقلي ما تكتبه بالكرت !!!!!!!!!!! خلوا في بالكم احنا في اجتماع عمل واكو ويانا اكثر من جنسية بس هم زين كنا اثنينا العرب الوحيدين بالاجتماع ولا جان صرنا فضيحة!!!! بعدين عرفت انه من عنده انه عمره قارب الخمسين وعايف العراق من عمر 17 سنة وعايش ما بين انكلترا وامريكا !!!!!!! بس الشهادة لله ما سألني انت شيعي لو سني، لا لا حتى ننصف الرجال ما أريد أظلمه!!! انا متأكد أنه نفس الشخص في محل اقامته هو ابن بلد اكثر من ابن البلد نفسه ويمكن مرشح نفسه يصير سيناتور يداعي بنبذ التفرقة في امريكا وكذلك بين عشائر الارض وعشائر المريخ !!!
العالم وين وأحنا وين، العالم حايرة شلون تعيش بسلام بينها وبين بعض كأبناء بلد واحد وأشلون يرتبون حياتهم ومستقبلهم ومصير عائلاتهم وأولادهم وأشوقت يرفهون عن نفسهم ويسافرون يشوفون هذا البلد وذاك البلد واش راح يسوون بعطلة الأسبوع بعد تعب عمل أسبوع ملئ بالمشاغل والفائدة لحياتهم ولبقية الناس واشلون راح يقضي وقت المسا يطلع وية اصدقائه لو وية اهله لو يبقى بالبيت، هذا كله بعيدا عن تفصيلات دينه وعبادته وحياته كفرد.
اعتقد ولو مرات هم ما يفيد بس يمكن لو يوزعوه لشعب العراق على البلدان بلكت شوية ينفرك راسه ويفتهم شنو مدنية وانسانية وثقافة وحضارة عود بعدين يرجع او ما يرجع للعراق مو مشكلة بس المهم يخلص العراق منه هسه … حتى نخلص من هالخرط في خرط اللي صاحبه يجيك بعد ما يسولف بكل هذه النقاط اللي تفرق ابناء البلد عن بعضهم ويحجيلك عن الوطنية اللي تجمعنا أو تذبحنا !!
ادعو الى ارجاع العمل بقانون النفي التاريخي … النفي لكل واحد لسانه طويل حاشاكم اطول من القندرة ومع النفي الاقامة الجبرية وية القرود والحمير بلكت شوية يفكر انه هو متطور عن القرود والحمير … ارحمونا يا عالم !!