ولكم والله ملينه..ما أدري هي وليه مال زينين لو مال غمان..يا هو اليجي يتأمر بروسنه, ويسوي نفسه عنتر علينه.. ولكم مو هيجي أدارة الدوله.. هذا أسمه تخبط وكلمن أيدو اله , أذا ما تعرفون شلون أديرون دوله .. أحجو مو عيب .. بس العيب من تبقون بهاي الهوسه والمناحه ..أحنا ما خايفين عليكم , طبكم ألف طراك .. ولكم بلدنه أحترك مو ضيعتو كلشي.. والله أذا غركنه, ترى نغرك كلنه سوى , مو عبالكم , مطره وتعدي..وخاف عدكم جناسي أجنبيه وتشلعون , وتخلونه بوحدنه.. ويا ريت تسوها ونخلص منكم .. ولكم لا تفيد وياكم جمعة غضب ولا سبت غضب ولا أحد غضب ولا أسبوع غضب.. من غضب الله على روسكم..ولكم أنتو منين طلعتونه.. ومنين نزلتوا علينه ,من يا كوكب سرطاني جابكم بوش, ألعن بوش وأبو بوش ويا بو عشيرة بوش.. الجابنه هيجي شكولات مسلفنه ..أحنا جنه رايدين شكولات فرش, ماكله طحين أبو الحصه ,ودهن كريز يوكف بالحلك.. ناس تخاف الله , وعدها ضمير .. واحدكم لسانه متر , دكول عراكه مو مسؤولين..ولكم أتقوا الله ورسوله..وباوعو على شعبكم.. مو أنمعط معط .. خليتو واحدنه يمشي بالشارع وميعرف وين رايح ..ويتزوج متعه على مرته وهو ميدري,عبالك صارطله حبايه ومكبسل.. علمتو ولدنه على الشاينات, مره حبوب مخدره ومره حشيشه أيشربوها بالنركيله, خليتونه فرجه للعالمين.. يوميه هوسه ويوميه أجتماع وثني.. مو خلصتو الطاولات المستديره والمزغرفه حتى البيها دويرات خلصت..ولكم كافي, تعبنه.. أنريد بس يوم نفرح ماكو.. وهشكنه وبشكنه .. يا نوري!!
أحنا شعب تعيس,شعب يوميه يصحى من نومه ويتريك أزمه..أحنا بحاجه الى رئيس وزراء.. حرامي, حتى يكشف شكو حراميه بهذا البلد ..سرسري صرافه, لاينتمي الى مذهب أو طائفه أو عرج, مذهبه البطش لكل من يفرق بين هذا وذاك .. سفاح , ما تهمه كيلوات الدم التي تسيل, بقدر ما تهمه طاعة قراراته التي أيشوفها تهم البشر,ولكم أحنا بشر.. هتلي , يعرف شلون يتصرف ويه الهتليه والسربتليه..يجمع ما بين جسارة ورعونة وطيش صدام حسين وخباثة وظلم وضبابية نوري المالكي.. أكو هيج قائد ضرورة عدنه ليحكم العراق!!
وما خفي كان أعظم
