أريد أشاورك سيدي اسمك الرئيس : جنت قبل أيام مع أوباما والدول الصناعية الكبرى، وبعد ما أجيت كَلت الزيارة ناجحة 100% …. زين خلي نتراهن آني وياك…. هاي شبيك لاتخاف، الحجي بيني وبينك وأبد كلش ماراح يطلع على الفيس بوك…
إنت تكَول الزيارة كلش زينه وممتازة وحصلنه على دعم أمريكا وبعض الدول، مو هذا حجيك لو لا ؟ … خوش الحمد لله اعترفت بساع وما اشعلت… العفو اشلعت كَلبي.
زين آني أكَلك زيارتك ربما تكون زينة إلك شخصياً بس موزينه للشعب، لأن من المحتمل تكون انت لوتي علينه ومنسق ويه أمريكا على حساب الوطن، هذا احتمال وارد؛ لأنكم جميعاً عايشين على حساب الوطن، وخطيه الوطن مكَرود يدفع وماملحكَـ ، ومن دون مقابل! الله عليكم أكو عدكم صديق يطي بلا مقابل غير العراق، تدرون ليش ؟ لأن ربعه كلهم مابيهم ذرة غيره وسرسرية، والاحتمال الثاني أن تكون أنت غبي، لاتزعل مو اليوم إنت غبي بس اذا خسرت الرهان وياي راح أطبع على كَصتك كلمة غبي، لأن آني رهاني يكَول أن أمريكا تتفاوض مع الدواعش العراقيين، وراح تخلي عليهم قادة مسؤولين عليهم سياسياً، والقادة هم من العناصر القيادية المطلوبة للقضاء العراقي، والمحكوم عليهم وفق مادة الإرهاب والقتل العمد، وسيكونون هم القوة التي ستكون موازية للحشد الشعبي …ها شبيك؟ أشو تفر بيدك سيدي القائد؟ لازم ماعجبك الحجي؟ خل لايعجبك بس هو هذا رهاني معك، عندما يحدث بعد أربعة أشهر على الأقرب، سأناديك بعدها بالغبي … أكلك سيدي اسمك الرئيس، صدكَ انت هم الك حصة بالبنكَ المركزي العراقي؟ لو ماتشتهي النمنمات.؟
بروح ابوك لاتروح أريد اسئلك سعال: انت خايف لو انت لوتي؟ لاتزعل مو مواقفك كلهة مكَلوبه، وحدة من اثنين: لو الشعب دايمشي على راسه، لو إنت تمشي على راسك، وهذا الوضع محير العباد ، ها تكَول الشعب غلطان… ليش غلطان….. اذا الشعب يوماً أراد الحياة فلابد أن يمشي على رجليه… وأخيراً حلها ابو الدكَايكَ ونزل سعر صرف الدولار الى 1150 بعد ماصعد اليوم بالولاية الى 1450… عاش الرئيس الذي فلش ولايتنه… ولو تزعل ، ولو أدري العتاب يعذب الخاطر ، لكن لاااااااااااااااااا…
