كلشي بالعراق أبو الخيسه أنشوفه فد شي طبيعي ..يعني اللي لابس عمامه أيبول بختله وهو واكف..هذا فد شي طبيعي .. ناهبات أيدشن بتواليتات الناهبين ويبولن وكافي .. يابه بشرفي كلش طبيعي .. مسؤول يلغف مال الله ومال عباده ويروح للحج يستغفر ربه ويرجع يلغف القاط قاطين..هذا كلش طبيعي ..نتائج الانتخابات المحليه والتشريعيه اللي جايه , وكل الشعب المسموط أبو أبوه يعرف نتائجها.. وأذا تريدون نعلنها تره القوائم موجوده عندي .. هذا شي هم طبيعي ..بس فهموني أشلون الريس مالتنه أيوقع على تلاث قرارات وهو ميكدر أيحرك مو أيده بس حتى قلاقيله واكفه ..ها مو كلش طبيعي ..جماعه الصدر أيطلعون مظاهرات تأييد للقضيه الفلسطينيه, والفلسطينيين يتعجبون علويش هاي المظاهرات صايره, بعدين تطلع لا هاي علمود الموازنه.. هذا مو شي طبيعي ..عمار الحكيم مسوي زواج جماعي .. كل عريس يزوج وحده, ياخذ تلاثه مجانا .. لانو ينطلق من مثنى وثلاث ورباع.. هذا كلش طبيعي..موازنه دوله تنباع وتنشرى من قبل شركات وهسه راح أتوافق شركه الكورد عالموازنه بس أنتظرو.. هذا فد شي أوكي ..وزير يستجوب من قبل البرلمان وتمنح فديه للمستجوب بعدم أقالة الوزير العار .. يابه تره كلش طبيعي ..المرجعيه الشيعيه طلعت صدك شريفه لان أدير وجهها وتخلي الكواويد تشتغل براحتها ..ها مو فد شي طبيعي .. أكو شرطي بوزاره الداخليه أمه جانت ماجده بأتحاد نساء العراق بالبصره كلش جبيره مثل منال الالوسي سوتله واسطه هسه وصار العقيد سعد معن مدير مكتب العتيد عدنان الاسدي ..لا دكولون مو طبيعي ..أكو سوك بمجلس الناهبات والناهبين لو ينسد جان صار براسنه خير.. أتصدكون الجماعه غيرو سيارات ألنترا للاغتيالات وصارت هسه كيا حديثه ولونها رصاصي وبيها واحد بالصدر وواحد بالخلف ..ها طبيعي لو لا.. أتعرفون البطاط ماله علاقه بمنشورات حي الجهاد والداخليه تعرف ميه بالميه منو صاحب هاي المنشورات ..هذا شي طبيعي ..وصار تزاوج بين الخزعلي ودوله الفالتون وراح أيدشون سوى بالانتخابات ..ها مو طبيعي ..بهاء الاعرجي وجواد الشهيلي راح يستثمرون بلبنان لان ما عدهم ثقه بمصر ويمكن راح أيبيع بهاء الاعرجي شقته الديلوكس والفيلا بمصر ..ها شكو هذا هم طبيعي ..صهر المالكي أشترى فيلا بلندن تخبل وسجلها هذا الاسبوع حتى أبو سراوي لا يسوي مشكله بين صهره وأبنه ..والله طبيعي ..أبو جعفر الملا أيريدوه جماعه الفالتون ينضم وياهم بس هو مديقبل أنطوه خلو رجل هسه أيطب وياكم أبو جعفر ونعرفه.. طلع منصب رؤساء المجالس المحليه هوايه أحسن من منصب ناهب لان الاخوه ياكلون على كيفهم وحتى العظم يحتفظون بيه ..هذا طبيعي.. هدو العامري بجناحه بالفندق وهو يحضر مؤتمر, وجان طالع من الحمام عاري, ودخل عليه وزير النقل الايراني, وجفل , لان شاف العامري عالطبيعه..وكاله العامري تعال أغا.. العراق ميخبي شي عن أيران.. بشرفي كلش طبيعي.. تعرفون يا جماعه أكو 85 بالميه من مسؤولي العراق عدهم أتصالات ويه مخابرات دول مجاوره وبعيده ويستلمون منح وعدهم أرقام.. هذا كلش طبيعي وأوكي..
وما خفي كان أعظم
