اللهم صلي على محمد وأل محمد .. لو أني أحول , لو عدنان الاسدي , شد ماطور دنماركي جديد .. تصوروا يا عراقيين , أستخباراتنا صارت تعبر القارات , وتكشف اللحاف عن خلايا جانت نايمة , وفززتها من نومها.. بس وين , في باريس .. لا , ومو بس هاي .. أستخباراتنا الورده , تابعت الاتصالات الهاتفية , ويه الاستخبارات الفرنسية , لاعضاء تنظيم الدولة ( داعش ) في فرنسا , اللي بلغ عددهم حوالي 200 عضو, بعملية كلش سرية .. هم صلو على محمد وأل محمد .. لعد شمالكم , أشو صارلنا عشر سنين , داعش وغير داعش, ماخذتنه فلاحه ملاجه , وجيبه جيبه , وين اليوجعنا .. لعد وين أستخباراتنا , من سقطت الموصل وصلاح الدين والانبار وديالى .. لعد وين جانت أستخباراتنا وقذايف الهاون تسقط على محيط الكاظمية .. وهل كدرت أستخباراتنا , تفك شفرة طائرة الشحن الروسية وهي تحمل شحنات أسلحة , الى من !! صدك لو كالو ( نادره للغير خبكه لبيتها )..
تبين , أن السبب الرئيس , هو الانترنت .. ولان عدنا شبكة ضعيفة , ما كدرت أستخباراتنا الحلوه , أتابع أتصالات داعش بالعراق .. ولان داعش يستخدم الثريا , وأجهزة أمريكية وأسرائيلية للاتصالات , وما يعتمد , لا على أسيا ولا زين ولا كورك .. والله عيب , يا وزارة الداخلية .. كافي جذب على العراقيين ..
أني أنصح عدنان الاسدي , من يطلع على التقاعد قريبا , أيبيع ركي وبطيخ , وأجهزة كشف الغازات .. وتحية لاستخباراتنا وهي تعبر المحيطات , وباب النجار مخلعه ..
