أما بعد
صارلي كم يوم ما مشتغل والجيب هب بياض ، صفنت شوية ماكو غير الحجية نضربهه قبع و نطلع من عدهه جم فلس حتى اروح للكهوة وأشرب نركيلة ونعدله للمزاج لان خطية الشلة مالتي ده ينتظروني على احر من الجمر لان اخوكم من ينطلق يحليهه للكعدة بس المشكلة اللي تواجهني دائما هو بخل الحجية عبالك تكول بجيبهه عكرب ، يعني بين قوسين لو الجاحظ الله يرحمه ملحك عليها جان اكيد زاد كتابه جم صفحة خطية مو بيدهه وراثة ، يكولون جدتهه من امهه جانت مصلاوية ، زين شلون ياربي جماعتي كل دقيقة يرمشولي او اخر شي اشتغلت الرسايل ، وينك جلب ، وينك حمار الى اخره من الحيوانات وراهه صار الحجي مو زين كله فشار.
فكرت شويه او باوعت عالحجية بنظرة تحليلية ومعمقة شفتهه خلاص ما بيهه مجال ، كلت ماكو غير كتاب الامير يحلهه وياهه اني قريته مرة قبل سنتين بس المشكلة ما اتذكر منه شي بس اللهم فقرة الغاية تبرر الوسيلة ، بس الضغط النفسي الشديد وعامل الوقت مشتت افكاري ورنات الموبايل مال اصدقائي دوختني و سودت الدنيا بعيني.
هديت نفسي شويه و تعوذت من الشيطان وكلت ينرادلي خطة سريعة ومحكمة مثل خطط رومل بلكت نطلع بكم فلس ، شنو ياربي شنو ياربي ، وره شويه الافكار كامت تتوارد وبغزارة على ذهني فأختاريت اول وحدة جت بالي ،كتلهه حجية البارحة صارت سالفة ضحكتني ، كالت يمه شنو ، كلتلتهه صديقي وعمه هيج رجال راهم و مرتب شفتهم البارحة بالسوك اشو عمه مباشرة جان يكلي ابني اني رجال زنكين ومرتي ماتت قبل سنة ويشرفني ان اخطب امك او اني حاضر للي تأمرون بيه لان الناس تمدح بيكم و بوالدتك هواي ، هيج بدون مقدمات ناس ما تستحي.
جان تنفعل الحجية وتكول يبوووو اني ما فكر غير بالحجي ويبقى رجلي دنيا واخره مو عيب عليك تحجي هيج ماتستحي هي غيرة سس ، اني انعقجت مع قليل من الحياء والاحراج ، جان اكول بيني وبين نفسي الوفاء والحب خرب خطتي او اني جنت متصور نفسي لوتي بس القيم الاصيلة ماجت بالي .
وره دقيقة شعرت بالراحة والفخر اوكلت ايباه الواحد لو يتزوج اصيلة مثل الحجية لو مايتزوج بس صعب صعب جدا بهذا الوكت تلكه مثلهه والله حسدته للوالد الله يرحمه الظاهر اكو علاقة حب قديمة بيناتهم وكالولي جان مداريهه حيل و يموت عليهه عبالك من بني عذرة.
بعد فترة من الصمت مو طويلة جان الحجية تكلي عيني حسوني الغالي تريد اخدرلك جاي وطلعلك كليجة ، كلمة الغالي كانت غريبة على مسامعي ، اني بهذا الوقت اتقمصت دور الفيلسوف ضارب صفنة عالسكف وفاتح حلكي ولا جن الموضوع يمي ماتكول غير هيغل ، جان الحجية تكول عيني حسون شبيك مدولغ اكلك حبيبي و قرة عيني وفلذة كبدي هو الرجال شسمه و شكد عمره وشيشتغل ، ما طولهه عليكم
نهاية القصة : نكرتني بعشرة الاف وعدل عل الكهوة.
عاش ايدك ميكافللي والله طلعت خوش زلمة وابن عشاير .
