شفتو شلون صار وجه أبو سراوي .. عبالك كيمر.. وصار عنده لغلغ ..هاي بولايتين بس.. جاه البخت لو ينطيه بعد ولايه , يمكن لغلغه يوصل لحد قلاقيله.. طركاعه سوده وكعت عليه .. أي ليش لا .. أذا الصبح فطوره , عصير برتقال فرش , وبيض أومليت , وبيض سلك , وأجبان تعقد , وشرايح لحم غنم, وخبز حار مال تنور, وجاي مهيل ..أكلو نعلعله اللي عزمكم .. والغدى , كله ثريد ودولمه وتكة غنم وصدور دجاج وهاي الستيكات اللي تخبل بالصوصه , وأنواع المرك ..يا هليل يا موزان ..
يريد أبو سراوي مركة فاصوليه ياكل , يريد مركة باجله ياكل, أيريد يخني هم ياكل .. دهر لفكم .. يتأمرون , وأكو من أيزقنبهم .. ها , وهاي كلها بلاش .. أي طبعا من فلوس الموازنه .. جاه حقه أبو سراوي لو يلزك بالكرسي .. لا والله وأعرت بيه .. أنا غلام أبوي والله ما أنطي الكرسي , لو تصير مذابح .. صدك جذب .. شكد حلو , أكعد الصبح , وأخذ حمام .. ليش هو حمام , لو طركاعه .. كلشي بيه .. شكو وصخ لازك , هو من كيفه يطلع .. والصابون ليش مثل صابون اللي بالسوك .. خاف ما ترضون .. هذا حمام ريس الوزراء ..كله أبو الريحه ومعطر منه وبيه ويلزك بالجسم لزكة جونسن.. والليفه عود مثل هاي اللي نغسل بيها مال حصان .. لا يابه لا .. ليفه تحافظ على الجلد ولمره وحده وتنذب .. هذا جلد ريس الوزراء .. أيه شحجيلكم .. راحت لا ردت ذيج الايام السوده .. من جانت كل شعره بأذنأبو سراوي , يوكف عليها الصخل .. والشيب مالي لحيته, وجان شعر راسه , هو بيده أيشلعه .. أيه جانت أيام سوده .. وبطرك قميص سمائي , ياخته صارت حكاكه بيضه ,وبنطرون أسود , شحاله ,كل أسبوع يغسلهم أبيده , ويشرهم على الحبل فوك الصطوح.. وجانت عنده جواريب , أصبعه الجبير دائما طالع بره ..
أبو سراوي عيني , حضر روحك .. التغيير جاي ..ولا تصدك الشارع الشيعي راح يوكف وياك مثل 2010 , لا عزيزي .. الشيعي لا يلدغ من جحره مرتين .. معقوله الانسان العراقي بهاي السذاجه والاحتضار , وهو أيشوف بعينه , فوضى القتل الممنهج , والانفلات الامني , وناس عايشه ما عدها لكمه تاكل , والطبقه السياسيه تنهب قوت الشعب , ويروح ينتخبك مره ثالثه .. هذا يعني أننا شعب يحتضر , وما بيه كل رجا ..
