ياناس الصبر طيب على يا مال مستعجلين راح الكثير وبقى القليل .. ما اقصد المال والحلال اقصد الايام والسنين غمض فتح اتشوف كلشي على المرام وشوف عندك يا سلام .. شوف الكهرباء فوق الحاجة اليومية وراح تجيك منها حصة اضافية مثل الحصة التموينية في كل شهر رمضان ما شفتم كل سنة تنطينه الحكومة ربع كيلو عدس وياه تعليمات الاستعمال تلهم منه ملعقة شاي اول الفطور وملعقة عند السحور ولن تنسى وزارة التجارة الطحين الصفر كيلوين حتى نسوي كليجة العيد شوفوا الاوفياء مينسون شي وفوق ذلك ربما دجاجة مشوية حتى الفقراء والمتقاعدين يتبحبحون ويفرحون من صدك بالعيد شفتم الدنيا ربيع والجو بديع .. ياناس ماكو مشكلة اذا الكهرباء متذبذبة او غير مقتدرة على تشغيل الاجهزة الكهربائية حالها حال الاسعار والمتذبذبين المتمسكين بالاخلاق والدين .. اما الماء شكو بيه طبيعي ميه الميه بيه ( اشكال ارناك ) ترسبات ملحية وطينية ورملية ويرقات وبيوض اسماك وقواقع وفلزات ولا فلزات ياناس يرادلكم خبرة حتى تستفادوا منه خلوه يجي قطرة قطرة وشوفوا شلون يجيكم ماء مقطر ولوما هاي الماطورات ما كان يشفط طين او طحين ولا تباوعون على ذولة البطرانين اللي يشترون مي ابو البطالة وانتم ليش خايفين احنه قبل خمسين سنة كنا نشرب الماي من راس الحنفية .. اما مجاري مياه الامطار العبوبية والصخرة العدوانية فأمانتنا متقصدة ما تفتحها لانها واضعة خطة شيطانية ؟ تريد تحول بغداد الى فينيسا الشرق ( البندقية العبعوبية ) تيمنا بأسم المحروس سارق قلوب العذاري نعومي ها ليش ما تصبرون غشمة غشمة غشمة دنكول ينرادلها صبر صبر صبر صبر اصبروا وصابروا كما صبر صابر العيساوي ابو البلاوي .. اما الامان فنعمة من الرحمن وما يطلع عصفور من هل الزاغور لآن ملايين البنادق المحشوة وجاهزة تسويه شوربة .. اللي يعبد الله خليه يعبده يريد في بيته يريد في بيت الله يريد يسويله بيت لله هم خليه على راحته وخليه يفيد ويستفيد يريد يلعب طوبه خليه يلعب حتى في بيت الله واليغني خليه يغني حرية حرية بيع المشروبات الروحية واللاروحية والحشيشة والكرستال هاي مسألة جدا طبيعية واللي يريد يسكر خليه يسكر واللي يريد يأكل مزه خليه يأكل مزه واللي يسمع ام كلثوم خليه براحته واللي يسمع يوسف عمر هم حلال واللي يتنزه خليه يتفسح ويترنح حرية ( عرب واكراد حرية والبوسطة الشروكية ) وفد حزام ها خوتي ها .. والاستاذ والدكتور والمحامي والقاضي راضي والعالم والاعلامي والضابط والطيار حتى الجندي والشرطي محروسين ( بسور سليمان ) امان يا ربي امان وكل لحظة تمر عليهم نسمة من نسمات الجنان .. اما الشعراء والادباء والفنانين والمهاجرين الى بلدان الشياطين فهؤلاء دعاية للحكومة الملائكية التي خرجت من القمقم بأمر من كونفيشوس العراق اللي يحتاج نمره 48 حى يفتح عينه .. العربي والكردي والتركماني والاشوري والكلداني والصابئي والايزيدي وحتى اللي ماعنده قوم ينتسب الهم فهم في امان امان امان ياربي امان وكل واحد يستلم حصته بالميزان .. انت مسلم سنشيعي او مسيحي ارثكاثوليبرستانتي خلط وش لا يختلف الامر سواء بسواء وسيان سيان حقك في الدستور مصان مصان مصان وحياتك في حرز وامان على عناد الجيران هنا في العراق نختلف عن كل البلدان ارفع راسك انت عراقي وللابد باقي انت عراقي مرحب بيك في كل الاوطان لا فيزا ولا موافقة حكومة تلك البلدان دينارك قوي قوي اقوى من هرقل وعدنان القيسي وفالت من العنان كم دينار تعيش في ارقى البلدان تتمتع وتتعالج في اي مكان وتقدر تجلب معاك كم جارية من ارقى البلدان .. بس يرادله صبر صبر صبر اصبروا يا عراقين راح يجيكم الرزق مثل ماي النهرين في وقت الفيضان .. اجاكم المهدي العادل وراح يرجع العراق الى ايام زمان والكل ربحان وما حد خسران بس الحرامي والديوس واللي ماعنده وجدان افهموها بس يا جدعان