اكو عالم يحبون المقارنات و شما تسويلهم يفكرون لو غير واحد بمكانهم چان سويتله الاحسن يعني اذا تنطيهم ببسي يگولون لو غير واحد بمكانهم چان انطيته شربت و اذا تنطيهم فلوس بالدينار رح يگولون لو غيرهم چان انطيته بالدولار و هالحالة جاية من اسباب بس مرات بدون سبب و بشكل يشيب الگلب و الراس و حاتم گرايب الدكتور تحسين الفلاني (تحسين ابو الليل) واحد من هالعالم و اجه من غير محافظة و رح يبقى يم تحسين يوم و نص.
اول شي علق عليه هو گلاص المي لأن تحسين قدمله گلاص مي و ماكو دولكة و گال “شنو قحط مي جايبلي بس گلاص؟ لو غيري چان عتب عليك و زعل بس اني فطير و مشكلتي ما افشل احد” و وراها علق على التكييف لأن تحسين يبرد فحاط التكييف على درجة ٢٠ و گال “لو سعد اخويه چان خلاك تنزله اقل درجة و ما چان احتمل هالحر” و وراها علق على التلفزيون و گال “صدگ چذب دشغل التلفزيون لو واحد من البرلمان چان حطيتلهيا على الاغاني هاهاها (ضحكة مال مجاملة)” و هالاشياء ما غثت تحسين.
و طلب من تحسين يطلعه بفد مكان مرتب و تحسين گاله السايق حاضر و يا مكان تريده يوديك بس حاتم ابتسم و گاله “ايباه هيچ صارت الخوة تعوف واحد غريب يطلعني و انت الي مني و بيه ما تجي ويايه؟ هاي لو غيري مو چان فرفرته بسيارتك بالجادرية؟ بس اني مو عزيز و ما راح اجبرك تحبني”و تحسين اعتذر و گاله احسبها عليه و تدلل ابدل و افرفرك بغداد كلها و صعد فوگ يدردم و اتأخر بالتبديل و طلعت وحدة من سيارات الحماية بيها عطل ساعة و سووها و حاتم يحچي ويه نفسه “على حظي عطلت سيارة الحكومة لو غيري چان حتى سيخوي طيروله” و تحسين يسمع و مغلس.
طلعو و واحد من الطرق مگطوع صاير انفجار و اخذولهم فرة بالشورجة و باب المعظم و باب الشرجي و كلها معزلة و ظلمة و رادو ياخذون لفات بس حاتم گال “اخوك يريد يشوف مطاعم بغداد و تريد تجيب لفات سفري؟! ايبااه وين راحت ذيچ الخوة ؟!” و تحسين اتورط و نزلو بمطعم بالجادرية و اتعشو و طلعو و حاتم گال “اخوك عاجبه يشوف شارع السعدون زين و شوية يگعد بابو نؤاس ترضاها غيري يجون من محافظات ابعد و يشوفون حتى المنصور و اني بعدني ما گاعد بأبو نؤاس؟! و لو صاحبتك ما چان رفضت منها هالطلب ههههه”.
رجعو على السعدون و صار انفجار قريب منهم و اتضررت سيارة تحسين و حاتم ماعت روحه و ركض ع المستشفى و طلع ما بي شي سلامات و دخلو للبيت شايلين حاتم و حطوه بالصالة و گعد تحسين بصفه و گاله الحمد لله ع السلامة لو غيرك چان هسه حالته صعبة بس انت الله يحبك و طلعك سالم و حاتم باوع على تحسين و گال “لا خوية لا … لو غيري چان هسه گاعد بأبو نؤاس”.
