بعد ما شسمى … صاحت يا رجالي
تعليقا على تصريحات السيد رئيس الوزراء العراقي الجديد السيد حيدر العبادي بانه : “أنا غير مستعد في المستقبل لأن أحرك قطعات من الجنوب حتى تقاتل في نينوى أو تقاتل في الأنبار. أريد أهل نينوى يحررون نينوى، وأريد أهل الأنبار يحررون الأنبار، وأريد أهل صلاح الدين يحررون صلاح الدين… ولكن سأكون دعماً لهم.”
لعد ما كان من الاول خليتو الجيش من ابناء ذيج المدن ؟! هسه جايين تطالبوهم بحماية انفسهم ؟! هو غير اكو سلاح بالمدينة ؟! مو المالكي صارله ثمن سنين يفتش عن السلاح ومنظف الموصل من الاسلحة علمود لا يسوون ثورة ضده ما ادري علمود بالعرس لا يضربون طلقات !!
ولكن يبدو انهم عدكم كلهم خونة ولهذا السبب ما بقيتوا سلاح عند العالم غير سكاكين المطبخ والشبرية ؟!
زين اذا كلهم خونة يابا لعد خلوهم ينقلعون ويصيرون اقليم ونارهم تاكل حطبهم !!
زين لا هاي ولا هاي ولا هاي ولا كل الهايات المحتملة ….
زين همة هسه عراقيين لو مو عراقيين ؟! زين انتو شكلتو حكومة … غير اكو جيش مو طائفي ووطني يحمي البلد كله ولا انت خايف لا من تروح لذيج المحافظات يتهموك بالطائفية وانه الجيش يقصف البيوت بالمدافع علمود يطلع داعش ووراها تبدي اعتقالات عشوائية وقتل عشوائي !؟
يا جماعة ترى هذا التصريح فريد من نوعه … جيش العراق هو فقط لحماية جزء من العراق والبقية مشكلتهم … زين ما زال الوضع بالطريقة هذه يابا لعد قول جيشك ميليشيات اصلا !! لا لا صعبة هذه اشحده اللي يقول هيج !! … هو جيش وطني بس مو لحماية الوطن !! هو فد شي اخترعته الحكومة العراقية علمود ما اعرف شتسوي بيه بس شايل طلقات واسلحة ومعلق كومة ميداليات وزناجيل على صدره ومشغل اغاني اثناء الواجب ويشتغل خراعة خضرة اثناء الواجب الرسمي ومرات يكبسل همين اثناء الواجب !! … ويصلح لكل وقت للقبض على متهمين ابرياء وبعدين يطلعوهم بدفاتر وقادته اختصاص تهريب سجناء قتلة وبيع المدن وتسليمها لداعش …. يعني اشبه ما يكون بواحد شقي عنده عصابة ومن تصير الامور جديات يطلع لا شقي ولا هم يحزنون بس عصابة مخوفة العالم ومن تصير جديات …. افلت !!
معقولة هيج يا رئيس الوزراء الجديد … شوية جدد لا تظل على سوالف المالكي التعبان … حتى بلكت العالم تقول هذا الرجال راح يكون على ايده خلاص الشعب … وبلكت هذي المحافظات اللي بالصدفة تقع ضمن خارطة العراق هم يرجعون ناسها يفكرون غير شكل …
هسه وقت صدام اعتبرتوهم خونة العراق واجا وقت داعش وهم خونة … لعد شتريدون من عدهم ؟!
طالبوا بانضمامهم لسوريا لو لتركيا، بس الاحسن والاسهل اكيد تضموهم لسوريا، لان خارطة داعش اصلا ضامتهم وانتو كل اللي سويتوه لي هسه هو تسليح داعش بما يعادل ملايين الدولارات من الاسلحة والوقفة كمتفرجين اشلون هذه المدن تحترق !! طيح الله حظكم ..
