رغم التصاق الكل بالكل واختلاط عطورهم الفرنسية الأصلية التي تتنافر مع أجسادهم، يسارع نواب عصر الضفادع  ووزراء حكومة الفساد والعهر الى (سياراتهم الرباعية الدفع) لبخِّ رؤؤسهم وبدلاتهم الفضفاضة بالعطر مرات عديدة وسط تساؤلات محيرة ما هذه الرائحة الكريهة ؟؟ الايعلمون أن لموت الضمائر رائحة لاتطاق.

والله عيب, انتخبناكم ونطيناكم كل الثقة حتى ننسى ظلم وقسوة 35 سنة من نظام تعلمتو منه نفس الطاس ونفس الصابونه, بس الحمام تغير من الفرشي الى الفرفوري, صعتو بسيارات ما تحلمون بيها, واحسن واحد بيكم جانت عنده لادا ,كلها خياس وتشتغل الا بالدفعة, لا وحمايات ورشاشات و10 الاف دولار راتب شهري ما عدا الامتيازات, اذا تخافون من الشعب شكو تصيرون مسؤولين !! ترى اني اعرف منكم هواي وقسم اصدقاء بالغربة وتلطمنه سوى  وتقاسمنا الجكاير هم سوى بس البخت شسويله, بس هم بعدين اكول الحمد لله والشكر, لو اني وياكم هم جان لغفت مال حرام وصرت اجذب على الشعب وادوخهم يوميه على التلفزيون  بجهرتي وبدلاتي السبور وقمصاني كلها من ارقى المحلات بفرنسا والمانيا وسويسرا,  واللي اشتريتها من عمولات طبعا مو من راتبي, وعركاتي البهلوانية ولواكتي لصالح رئيس الحزب ,والعجيبة من جانوا معارضة يصلون ويسبحون كلش هوايه ومرات يبجون ويرفعون ايديهم ليفوك, ليش ما عرفت, وكلت بس اتصير فرصة اسأل ابوفلان وفلان وووووووووالخ من القائمة .
 جنت اتصور الحياة راح تصير حلوه, لان احنا عشنا الدكتاتورية بكل تفاصيلها, بس من شفت الديمقراطية بره تنغصتها للعراقيين, وفرحت هوايه من طار الصنم, وكلت ايه راح  تصير عدنه ناطحات سحاب وشوارع افضل من كل شوارع اسيا واوربا وافريقيا, والمجاري ما تدخل علينا للبيت مثل ضيف ثكيل وتتزاوج وي ماي الشرب, ونشرب ماي حلو زلال وما بيه كائنات تسبح ومخلوط بالرمل, وتصير عدنا كهرباء احسن من دبي ونشرات ضوه بكل الشوارع والمحلات, والناس شبعانه مو بس بالاكل شبعانه من كل شئ, مثل كبل كلش, جان المسيحي جار للمسلم ولليهودي حتى الصبي جان يطبخ هريسه بعشرة عاشور وجانوا يضربون زناجيل, لا ودكول اكو فرق, ولا هذا الدليمي وهذا الاسدي وهذا المالكي, مو نوري المالكي اقصد عشيرة المالكيين,حتى بعض الناس تغيرت, ومن شفت بعض اصدقائي اللي على قيد الحياة صايرين فد خلفه, سبحان مغير الاحوال, اي طبعا انت ما شفت اللي شفناه حربين عالمية صارت عدنه, والله صحيح العراقيين شافوا الويلات, بس هاي ثمن الديمقراطية, وما نيل المطالب بالتمني, وظليت كل يوم اتابع التلفزيون واكول بلكي باجر يصير العراق بخير وارجع اني وعائلتي للمدينة اللي احبها اكثر من كل مدن العالم, واكعد بكهوتي واتمشى على الشط العصر, واتنفس هوى العراق, مو بس اني, لا , كل شياب المهجر يريدون يرجعون, لكن تبين احنا نحلم والحلم يطول هوايه وتخلصنا من صنم بس صاروا عدنا اصنام, ومافيات بكل شئ مثل اخطبوط بست الاف ايد وكلها تلغف ودكول, هل من مزيد, لا والمصيبة يتكبرون وينسون نفسهم همه منو, ولو ما العراق, افضل ما بيهم جان عايش على المساعدات, والطامة اكبر صاروا يفرقون بين هذا وذاك , هذا شعب الغربية وهذا شعب الجنوبية وهذوله كردية, يعني تقسيم العراق مثل ما راد بايدن تلاث كانتونات, ولان اساس العملية السياسية خطأ, فكلشي  بالعملية هو خطأ, وعلى اساس هذا التفريق, اليوم بالعراق عدنا تظاهرات ضد الفساد والتمييز والاقصاء,  قوانين بالبرلمان نايمه ولانها تهم الناس منوميها جماعة العطور الفرنسية, ويحتاج حتى تصحى لازم  اعصار جاسمية يكعد نواب عصر الضفادع ووزراء حكومة الفاسدين اصحاب العمولات .
المشكلة بسيطة لو يريد المالكي حلها, يصدر قرار باطلاق سراح المفرج عنهم اول مرة كبادرة حسن نوايا, بعد يومين , يطلق سراح المعتقلات بجريرة ذويهم, ويكول احنا راح ندرس مظلومية المادة اربعة ارهاب, وقانون المسألة والعدالة والثغرات الموجودة بيه بحيث ما يوثر على هوايه ناس, اضافة الى اصلاح بعض القوانين اللي صدرت في وقت سابق, هاي كل ما بيها وكلش بسيطة يا جماعة الخير, وما يرادلها قوات سوات وتشكيلات الداخلية المكروهة.. وماكو داعي للعضلات, لان زمن العضلات ولى, مو تمام
وما خفي كان اعظم