يا جماعه, صدكوني مجان نوري المالكي بهاي الصوره الفضيعه والمعيبه ..نوري المالكي جان خوش رجال.. وأساسه طيب وضاك طعم الفكر, وخوفك من الفكر من أيصير براسه خير, وتهجول بالغربه..ومو عيب أذا جان عنده فد قميص سمائي لازك بيه وهسه ينزع واحد ويلبس جديد عوافي يا عم , ودشداشه يغسلها بالاسبوع مره, وهسه خياط دشاديش بغرفه يم مكتبه, أبسط يا وله.. وجان بيده يطبخ مو مثل هسه أكو من أيوكله حبه حبه ويسقيه عنب.. هذا الرجل جان يحلم بعراق كل الناس بيه سواسيه , مهوباين , أنت حتئولي ..وميبقى فقير عايش بالمكابر ويلم لكمته من الزباله, أنوب لحكم للمزابل.. ويكفي أستغلال وأضطهاد وتكفير الاخر, هسه شك حلوك وكعده عالبطل .. راد يبني عراق جديد, يحترم شعبه ويحترم جيرانه, حفر الاساس ولكه مياه جوفيه..وراد يبني ديمقراطيه عراقيه مو مستورده,كباب شوي لو تكلال ..ومن أشوفه بهاي الحاله, والله أزعل على موده ويخليني يوميه أجبحه بموضوع.. لان بهيجي سرعه يتحول رجل بسيط عنده مبادئ ويخاف الله, الى رجل صار شكل تاني .. وحش مفترس, حط نكره ويه السنه, ويلتهم فريسته بالسجون السريه ,وما يسمع شعبه شيريد, وخلاهم أيغركون ,ويكول أني شعليه هذا الله وهذي حكمته ..هم أني السبب !!..ومصاحب حراميه وقطاع طرق وسرسريه, ما عدهم لا ذمه ولا ضمير, وميخافون الله, والنوب علينه البطاط والخزعلي وأبو طبر نسخه 2013 , ونهر دجله طكت روحه من الهوسه والخربطه ولزكنه بطوفان بس لاأيغرك المنطقه الخضراء وبيوت سادتنه الوزراء, بس لا ,أذكرت , ذيج المنطقه كلها مجاري ومجاري من صدك..
من جان بالشام, صدكوني مجان يعرف هذا الجلاد العسكري ولا ذاك الجذاب السنيد,اللي ضحكو عليه, وخلوه يضرب الناس اللي تعبت وتمرمرت وهيه سبب بقاء حزب الدعوه, وين جماعتك أبو أسراء اللي جنت أنت عضو صغير بيهم.. تعرف وين ..ذولاك همه كعدتهم بكهاوي الناصريه والديوانيه حتى جاياتهم همه أيدفعوها ,لا شغل ولا عمل.. غشك من يرضاك بالباطل ..وهمه سبب أغتيال المفكرعز الدين سليم , وأنوب خلوك أتشارك اللي أيبوك الشعب.. وخلوك تسمع اللي أيريد أيفرق الشعب ..لا وجماله صرت جذاب وما توفي بعهدك ..وصرت تحمي كل من يغرس بهذا الوطن خنجر مسموم..تعرف الناس اللي أستشهدو في سبيل أن يبقى المالكي والاديب يتمتعون بالجاه والسلطه, وين عوائلهم ,كرمتهم منصار تأسيس الحزب.. ليش أبو أسراء ليش أتغيرت..أتذكر من جنت تحجينه من ترجع من جريده الموقف , ليش الواحد أيصير دكتاتور على شعبه, ويجوعه, ويضربه بالكيمياوي..وشلون واحد أينام ويخلي راسه عالمخده,وهو يأمر جلاديه بقتل وأغتصاب الشعب..هسه شفت طعم السلطه, وأني متأكد لكيت أجوبه على أسئلتك..وليش صدام جان مجلب بالكرسي ومعرت بيه بس بالاخير أنطاه..وجان يضرب بسيفه كل عنق يتحرش بكرسيه..هسه أنت بالضبط تسوي مثل ما صدام جان أيسوي..السلطه والكرسي غرزن بيك نفس دم صدام ,وعليك أن تجتث روحك, وتعتذر من الشعب ومن اللي أنطاك صوته ومن أصدقائك القدامى اللي حتى ما ترد عليهم بموبايلك.. وسويت الدستور, وجماعتك فسرو فقراته بكيفهم ,عبالك هذا الدستور بس ضد السنه, أعتقالات,أتهامات,أغتصابات نسائيه ورجاليه, ماكو شغل ألهم, ماكو خدمات بمناطقهم, تحاربهم برزقهم, تنطي لبعض من عشائرهم وتضرب عشائر أخرى, تطلق سراح ميه وتطبب ألف, بوكت صدام كل الشعب يعرف سجونه , أنت طلعت أضبط منه بسجونك السريه وأساليب التعذيب اللي يستخدمها جلاديك..
وطيله مده حكمك, ما طلعت وشفت شعبك,وأذا جنت خايف , جيب الشعب يمك ,أحجي وياهم وشوف الناس التعبانه, هاي البشر شلون عايشه, شنو تاكل شنو تشرب.. شنو القرار اللي لازم نسويه وشنو لازم نعدله أو نحذفه.. مستشاريك كلهم أتحطهم بجيس أزباله وتشمرهم ويه النفايات الخطره لان ذوله سبب مباشر خله الشعب ميريدك.. ولا تعتمد على العشاير , لان ذوله طالع واكل نازل واكل , جانو أيعبدون صدام , وكلبو عليه بليله , وهسه أيكلبون عليك وهسه تشوف ..خلي ناس تعرف الدستور وتشوف شنو الفقرات اللي خلص وكتها وما نحتاجها مره ثانيه ..شوف السنه والله يا أبو أسراء ناس طيبه ومثل ما أكو بعض الشيعه حقراء أكو بعض السنه حقراء.. ولا سويت علاقه زينه ويه القشامرالعرب , وجلبت بس بأيران .. مثل طفل وجلب بأمه ,وخليت العرب كلها خايفه منك..ومن وراك كامو أيسمونه روافض..لان همه عبالهم أنت شيعي مثل ما عبالنه صدام سني ..وطلعتو أنتو الاثنين لا سنه ولا شيعه ..وجيشو الجيوش حتى ما تصير بولايه ثالثه..روح زورهم والتقي بيهم وأحجي وياهم..سوي علاقه تنبني على حسن الجوار ,حسسهم أنت دوله بأسلوب حلو..
أرجع أبو أسراء القديم, الطيب البسيط وأهتم بحزب الدعوه ولا تخليه ينحرف ويرتبط بالوهابيه والسلفيه ..من ورطك وخلاك تاخذ السلطه اللعينه..لا الشهيد الصدر الاول أستلم سلطه وهو جان يكدر وبيده, ولا الشهيد الثاني اللي أنعرض عليه أكثر من مره أن يكون بالمسؤوليه ,لكنهم رفضوا تسلم الكرسي واتجهوا الى الناس البسطاء, وأنت جنت واحد منهم..السلطه مو بس جاه وكرسي, السلطه شلون تخدم شعبك أبو سراوي..مو تمام!!
وما خفي كان أعظم