مول المنصور شوكت ما تروحله تصادف عرف لو گرايب لو صديق قديم و بهذا المكان التقى كنش الابرش (بفتح الكاف و النون) صديقه الدكتور تحسين الفلاني (تحسين ابو الليل)
– اي يا ابو الليل فرحتلك والله من سمعت بالخبر
– حبيبي كنوش رحم الله والديك ، بس انت شجاي تشتغل؟ وين صفت بيك الدنيا؟
– اني مقدم برامج على قناة “***” ببرنامج شهادات السياسة
– حلو يعني يا موضوع يتناول ؟
– يفضح الشهادات المزورة للبرلمانيين و الوزراء
– هاااااا حلو والله (ارتبك)
– بس انت طلعت سبع عمي اخذت الدكتوراه والله جنت اتمنى احصل دكتوراه علوم سياسية بس الظروف ما نگول غير الحمد لله دخلت اعلام و نجحت بهالمجال الحمد لله بس ما گتلي يا قسم خريج انت ؟ و دخلت علمي لو ادبي؟ ما داومت وياك بالرابع اعدادي ما ادري بيك شدخلت بس اني ادبي
– دخلت ادارة و اقتصاد و جنت ادبي (نبرة توتر و تردد و ارتباك و گام يزخ العرگ) و الحمد لله اخويه المهم الله وفقك انسى الراح.
– الحمد لله و الشكر حبيبي ابو الليل انطيني رقمك حتى نتواصل دائماً
– اي اكيد سجل يمك
•••••••••••
و الله عليك اي شي تحتاجه بس خابرني
– حبيبي ما تقصر المهم شفتك و رح ادگ عليك مسكول و سجل رقمي
– ان شاء الله
– يله اخذ راحتك اني ارفع الزحمة نتشاوف بعدين
– لا يابه رحمة الله وياك حبيب گلبي .. ان شاء الله .. الله وياك .. في امان الله
خلص تحسين من الفضيحة و ما كشفه صديقه هو ما عنده شهادة سادس اصلاً و ما يعرف شنو معنى ادارة و اقتصاد و رجع لبيته مرتاح و ثاني يوم جريدة نشرت خبر “المقدم كنش الابرش يأخذ مبلغ مالي من الدكتور تحسين الفلاني ليغض النظر عن ملفه” و حاطين صورته هو و تحسين بالمول.