كلثوم وفرحة الزهره

كلثوم مواليد ١٩٦٣ يعني بعد سبعة اشهر وتكمل ستين سنه وتطلع تقاعد من وزارة التعليم العالي وكلثوم باول ابتدائي مات جدها ولبسوها اسود ومن سالت جدتها اشوكت اتذب الاسود كالت الزايره بفرحة الزهره وكامت الناس تموت مثل ناكوط الحب حسب نظرية ابو الطيب ( تعددت الاسباب والموت واحد ) جندي يموت بحركات برزان واخر يموت بحادث سياره وثالث يصير بيه تدرن والاخر عمره كبير وواحد يطيح بالبير وظلت كلثوم تلبس اسود وتنتظر فرحة الزهره وفرحة الزهره ماترضى تمر بالعراق حتى اجا عام 1980 وكام الداس ياعباس وصار الموت بالجملة وزهره على ابواب اكمال الاعدادية ومن كملت خطبها ابن الجيران وذبت الاسود وفرحت بنفسها توقعت ايام فرح قادمة هواي وقبل موعد العرس بشهر جابو العريس ملفوف بعلم من سربيل زهاب وردت كلثوم على الاسود والجواب نفسه .. ان شاء الله بفرحة الزهرة اتذبين الاسود وطالت الحرب وماتوا بيها الاخ وابن العم والاقارب والجيران ولا فرحة الزهره اجت ولاكلثوم فكت حزنها وعاشت كلثوم الدوام باسود والعيد باسود وباقي الايام باسود ونست حتى تفكر بالزواج وحتى بالدوام من يسالونها اشوكت اتفكين حزنج ترد عليهم ان شاء الله بفرحة الزهره اذا ماسواها واحد اخر ومات ومرن على كلثوم حرب الكويت والحصار وسقوط النظام والحرب الطائفية والقاعدة وداعش والمسكينة لاشافت فرحة الزهره ولافكت حزنها ولاكطعوا اهلها الموت وقبل اشهر صادفتها بشارع الربيعي وسالتها .. هالمره عليمن لابسه اسود ؟ اجابت وابتسامة حايرة على شفتها : على المرحومة زوجة اخي
اي وشوكت تفكين حزنج ان شاء الله
اكيد بفرحة الزهره
ونسيت موضوع كلثوم وحزنها وفرحة الزهره المامرت علينا من خمسين سنه واليوم دخلت لمطعم بالصدفة ولكيت كلثوم كدامي وبعدها بالاسود واحنا بفرحة الزهرة واصرت الا اكعد يمها على نفس الطاولة ومن باوعت على لون ملابسها ضحكت وهي راسا كالت قبل يومين عمي مات ومعناها اظل لداير الحول بالاسود وحتى يمكن من اطلع تقاعد هم بالاسود ..
وبحسبة بسيطة لكيت كل العراقيين مثل كلثوم جابوها اسود باسود ويحلمون بفرحة الزهره وعمر الفرحه مامرت عليهم .