كثر الدكاك أيفك اللحيم يا .. مالكي!!

ولكم جم دوب.. أنصبح على أنفجار ولحم مطشر ودم بكل مكان.. ولكم ما تخجلون على نفسكم.. والله لعبتو نفسنه من وره هيجي سرسريه وبعوره لا عدهم دين ولا ديانه..ولكم ملتكم شنو أبيش معجونه.. شياطين ونزلت علينه ..سرطانات ولزكت بينه..هسه أنريد سرطان واحد من العريفه عدنان الاسدي عبود كنبر قاسم الموسوي سعدون الدليمي أيكولونه شلون أتفوت السيارات المفخخه  ألمدينه الصدر والسيديه والكراده وحي الامين..لعد وين السيطرات وألاجهزه هيه لعبه لو قشمره.. وعشرين مره كلنه يا ملاعين  تره مو بكثرة السيطرات والشرطه والجيش تكدر تمنع اللي عنده شي أن أيسويه ..وكلنه بالاستخبارات وبالمخابرات اللي عدها خبره وفطنه تكدر تمنع القاعده وأقزام النظام السابق وأي أجرامي أن أينفذ مهمته ..أذا أنتو خالين جماعه طويريج بالمخابرات , لا , أقبض .. وتعتمدون على حيوانات همه بالاصل محجرين ..جانو بذاك النظام مقفلين ..تريدوهم هسه أيصير براسهم خير ويحمون شعب ..العتب مو عليهم العتب على اللي أيحط هيجي بعيوات بهيجي مناصب..
وشوفو مناطق بغداد..أكو مدخل طبه ومدخل طلعه ..وما كو غريب يدخل أذا مو معروف من المنطقه..خاصة بمدينه الصدر..يعني اللي يدخل بهيج مناطق مالي أيده ترس..يعني ذوله اللي أيوكفون سياراتهم المفخخه,همه من عدنه وبينه..وعدهم باجات حكوميه تسمحلهم بالدخول ومتتفتش..ويخلي سيارته المفخخه بكل حريه وبالمكان المختار..أكو من أيخطط وأكو من أينفذ..وبالوكت اللي همه أيريدوه حتى البلد يشتعل علمود ينسى شغلات بوك وخياس ..ويكلبون ورقه جديده ويخلقون أزمه جديده.. ذوله ميلعبون ذوله همهم حلب العراق وميخلون قطره بيه..ويخلون الشعب ميرفع راسه وميندل طريقه وين..وهذا هو المخطط..
بعدين جم يوم دامي صار عدنه..جم شهر دامي عبرناه بكل ألم وحسره وأمرنه لله..جم دوب أنشوف أهلنه وأصدقائنه وأحبائنه أيروحون كدام أيعيونه علمود يبقى المالكي وعلاوي والحكيم والصدر..لعد أحنه شلون مضحكه وأغبياء..شفتو كواد منهم أستقال.. شفتو جحش منهم أعتذر وكال يا عراقيين تره أني بعد ما أكدر أكمل وأني أتحمل المسؤوليه .. بس تشوفهم يستنكرون ويشجبون وهاي كليشه جاهزه وحاضره من أيصير يوم دامي بغداد .. هاي مصر, قطار أنحرف وضرب قطار لاخ.. رأسا وزير النقل أستقال, وريس الحكومه أعتذر..هسه أحنه يوميه حنه ويوميه روس مكطعه ولا جن هاي الوادم كاعده تروح ولا شفنه بعرور ولا شفنه طليان..أنعل أبو ساعه السوده اللي شفنه بيها وجوهكم القذره..وهم مو صوجكم..صوج أبن صبحه اللي خله هيجي أولاد زنه يلعبون بينه ويطيحون حظ شعب كامل..
أحنه غسلنه أيدينه ووجوهنه بدم اللي راحو يوم الاحد..وكثر الدكاك أيفك اللحيم يا ريس الحكومه..تره فد يوم مشوفونه ألا نطلع من ثوبنه, ونسوي أعصار, ونجرفكم ويانه..لان أحنه تعبنه والحياة اللي بيها أنتو منريدها..وما عدنه شي غالي وكلشي خسرناه ..والمفلس بالقافله أمين ..وماكو شعب مثلنه صبر وتحمل وأنطه الغالي والنفيس.. وخوفكم يا خايسين من الفقراء لو طلعو..ترى أيكلبون الطابك طبك..
وما خفي كان أعظم