قبل فترة عصابة مال مكبسلچية كتلت مجموعة مال بنات و شباب بشقق زيونة و “فوفو” صاحبة الدكتور تحسين الفلاني (تحسين ابو الليل) گامت تخاف تلتقي بتحسين بالشقة مالته بزيونة و تحسين ما يريد يجيبها للبيت ما عنده ثقة بأحد و خاف تغدر بي و تخمط شي منه.
و رادت تعوفه بس تحسين ما تصرفله وحدة تعوفه و هي تسمع كلامه و مرتاح وياها و قنعها تبقى وياه و راد يشوفها و هي اقترحت يجيها للبيت و راحلها بالليل و عربدة و طربگة على غفلة انفتحت الباب مال برة و دخل رجال و فوفو اخترعت و گالتله لك هذا رجلي و طلعت الاخت متزوجة و زوجها يداوم بغير محافظة كل اربع ايام يجيها يوم او يومين بس هالمرة اجه على وكت و بدون موعد و الاخ تحسين ما يدري هي متزوجة.
ختل بالصالة و الرجال دخل گبل للغرفة و ما طلع منها و تحسين ركض طلع من البيت و رجع لبيته و هالموضوع ما خلاه يغير رأيه عن فوفو هو بالاساس رايدها ونسة سواء متزوجة او مطلقة او بعدها عذراء و لوما فايخ ما چان اتحملت فوفو هالمذلة و سافر زوج فوفو مرة ثانية بس صارتلها عبرة و تخاف تجيب تحسين للبيت بعد و هم احتار وين يلتقيها لعد.
احسن مكان الكرادة گاللها تتحضر وره الفطور يروحون للكرادة و هو گاعد يفطر وصل شعار من قناة السومرية انفجار بالكرادة و وره خمس دقايق خابرته فوفو گالتله ما نطلع لأن الوضعية تعبانة هسه و گاللها تحسين ميخالف و سد التلفون .. اهووو شلون حظ مصخم هذا هسه شلون وين نلتقي.
ما يتحمل بعد و استسلم لشهواته و رح يجيبها لبيته و يصير الي يصير و النهار صار شطوله و شيجيب الليل حتى يروح يجيبها و راح جابها من بيتها و اخذها لبيته و اجه الوكت الي يريده و شغلو التلفزيون و على اعلى صوت اغاني و گمز عليها چان يقتحمون المكان شرطة الاداب مبلغين عنه جماعة رادو عليه لزمة لأن ظل مرشح روحه لرئاسة الجمهورية و عاند التوافقات و الله وگعه بيدهم من وره فوفو الي طلعت منسقة وياهم.
