فقير .. وعنده مبادئ .. عشنا وشفنا !!؟؟

يستاهل كلمن يعوف خلافة البغدادي.
هذا هو ليش ما تصيرون دواعش.
صيروا دواعش وقعدوا ببيوتكم واحتمال همين تسوون عملية جهادية لو استشهادية وتروحون للجنة مالتهم.
مقضينها بالمخيمات وهسه جاييكم البرد والمطر، على ابو عدكم مبدأ لو مضطرين.
بعدين منو قال الفقير مسموحله ان يحمل المبادئ …. عجيب.
تحمل مبدأ وما عندك فلوس ايجار لعد شكو مهزوم من داعش.
المبادئ هي فقط للسياسيين واعضاء البرلمان.
الشعب هو شئ او عدد يستخدم فقط لتعزيز مبادئ السياسة والمصالحة الوطنية وترشيح العضو الفلاني عن الكتلة الفلانية.
الشعب يستخدم اساسا لمرة واحدة كل اربع سنوات في فترة الانتخابات.
ويمكن اعادة تدويره في حالة وجود خلاف سياسي من خلال الاغتيالات والتفخيخ والتدعيش.
غير هذا ماكو لا تنطق ولا تحجي ولا تفكر اصلا ان تقول اني مواطن …. مرحبا مواطن .. آخر زمن.
اقول انتو الشباب بس لا جايين للمخيمات علمود تشوفون انجلينا جولي، ترى للعلم انجلينا جولي متزوجة من براد بيت والرجال كلش غيور، بس ممكن تاخذون سيلفي وياها وتنزلوه ابديت على الفيس بوك عادي مسموح.
انتو اللي متونسين ومتحملين العيشة بالمخيمات علمود ظروفكم لو مبادئكم … استحوا على نفسكم وروحوا بايعوا الخليفة وعيشوا في ظل دولة الخلافة موديل 2014 بيها تدفئة وتبريد ومحركات ستة سلندر واسلحة خفيفة وثقيلة تنفعكم حتى باطلاقات الاعراس هذا بالاضافة الى تقليل كلف الحياة لان قريبا راح تلبسون الزي الافغاني والنسوان قاعدات بالبيت ويسوولكم خوش كبة وباجة وعروق … استحوا شوية وروحوا اندعشوا احسن من هالبهدلة … تخسأ المبادئ لدى الفقراء … الفقير لاعادة التدوير لا أكثر.