رئيس الوزراء شلع اللزگة عن الكرسي وره ما التحالف الوطني طگوله سڤن (شحتوه) و امريكا رتبت جنطته و طلعتها بره و المرجعية رزلته و رئيس الجمهورية كلف رئيس وزراء جديد بس “فزع” (بكسر الفاء و فتح الزاي) خال الدكتور تحسين الفلاني (تحسين ابو الليل) بعده يطالب بالحق الدستوري و يطالب بصوته الي راح و ابنه خليل فرحان لأن صار تغيير و يجادل ابوه و يعارضه.
و غالباً ما يختم فزع نقاشه بحچاية (محد خربها غيرك انت و تحسين) و ضحكة من خليل الي انتخب تحسين الي هو عضو بالتحالف الوطني و هالشي منع فزع من انتخابه كونه ما مرشح بحزب رئيس الوزراء السابق (حتى لو مرشح بنفس الحزب ما يرتاح ضمير فزع اذا ما ينتخب رئيس الحزب ) و اهم سبب من اسباب توتر علاقته بابن اخته لأن يدخل السياسة بكل شي.
و خليل يسولف ويه تحسين بين فترة و فترة و حچاله على ابوه و شلون ضايج و حچاله على الحچاية مالته عليهم و ضحكو و خلصو سالفتهم بس تحسين ظل يفكر بخاله و شلون يحسن علاقته بي و يخليه ياخذ غير نظرة عنه ؟ ينطيه فلوس؟ لا هسه يفهمه غلط بالاكثر لعد ينطيه سيارة؟ عنده سيارتين لعد ينطيه لابتوب؟ لا كبر خاله على هالسوالف و ما راح يعرفله لعد ينطيه دشداشة و عگال؟ بس رح يگول بخيل و ما كلف نفسه.
اخر شي تذكر خليل گاله خاله مريض و تعبانة صحته و قرر يودي خاله للسليمانية و يتكفل بمصاريف القسطرة و الشبكة و السوالف الطبية لأن چان ناوي يسافر يعالج قبل ما تصير هوسة داعش و اربيل و اجلها بعدين و تحسين سوه نفسه خوش ابن اخت و رح يستعجل بالسفر لان يخاف على صحة خاله(من لسان خاله)
سافرو بالطيارة للسليمانية و حجز بمستشفى حكومي حتى يقلل المصاريف و عاف خاله و ابن خاله بالسليمانية و انطاهم المصاريف مال العلاج و الگعدة و رجع لبغداد و سمع تحسين من خليل خاله لبس بنطرون و گام يحط جل لأن وحدة من السسترات گالتله حلو (مجاملة لحالته الصحية) و اثناء تصفح تحسين للفيس بوك شاف خليل رافع فيديو خليل يتحدى تحدي المي البارد و انصدم بخاله الي هم سوه التحدي بالفيديو بالكيمونة و البرمودة و ضحك تحسين من كل گلبه على منظره.
ثاني يوم اتصل خليل بتحسين و گاله خاله فزع تمرض و صخن كلش من وره الثلج و المي و چملها بگلاصين ازبري بلاعيمه التهبت و راح صوته.
و خسر صوته مرتين بأقل من شهر
