من تكتبون بالكوكل غرايب قوم.. اصناف اشكال تطلع بس العراق ما مذكور ضمنها يوم.. لان حاله غريب دوم.. العراقي مامعتاد يبات مرتاح وصافي البال يوم.. بس احنا شعب الحمد لله.. عباره يرددها العراقي دوم.. من تغلى الاسعار تذكر امي بيبتي وتكول الحمد لله توفت قبل متشوف الغلى الموجود اليوم جان نكبدت وتمرضت ومتحملت.. وتصبر نفسها وتصبرنا وياها.. ومن ينجرح واحدنا نكول الحمد لله مو احسن من صابت عينه لو نكطعت رجله.. واذا خسر احد بتجاره او انسرق ماله نصبر نفسنا بالمال ولا بالعيال.. ومن يصيب العيال انقول قدر ومكتوب.. احنا قوم الحمد لله.. شفتوا بعينكم شعب مثلنا غريب بكل حال.. صابرين بكل شدوة ومن كثر طيبة اهلنا نعيب نفسنا.. احنا قوم الحمد لله.. نتعارك وشويه نتصالح ونمشي سوية يا محلى الخوة بينا.. احنا قوم الحمد لله.. نواسي نفسنا من نشتكي وبكل الاحوال نبجي ونضحك سوه.. احنا قوم الحمد لله.. نغرك بالمطر ننشر صورنا ونعلق بمزحة بالفيس بوك.. هاي ميزتنا بيها نعرفنا بس صارت تعيبنا هسه لان مو كل صبر مطلوب.
الصبر يكون على قضاء وقدر مكتوب مو قهر شعب مخذول مهيج نعرفنه.. افلام حرب صرنا.. الجيش صار مرور.. والعراقي ينتظر ساعات من سيطرة لاخرى ومن يوصل للتفتيش ينتظر السؤال.. منين جاي ووين المراد..لعد هذا السؤال ليش ما ينطرح على الافغان والتركمان من دخلوا الحدود؟ الدمج صار مودة.. الطبيب تهجر والشعب دمر والعراقي انتحر متدري بالمطر اتكهرب لو بالبحر غرق لو من القهر انجلط.. وسبايكر تنادي من يجيب السؤال؟ والنازحين ضيمهم غير ضيم .. بالدم لطخنا وجهنا لان البجي بعد ما يغسل وجوه.. جنا نبجي وهسه دموعنا دم صارت.. باجر ستره يم ربنا لان بعدنا قوم الحمد لله.
