رغم الطين، والشوارع المخربطه، والطسات، وخيبات الامل، رغم التخلف، والعبادة بطرق بدائية، وانخفاض مستوى كلشي.
ورغم إن الايمان يترسخ عند الكل يوم بعد يوم بأن : ” ما تصيرلنه چاره .. لا والله ” بس الأمل بالله والناس الطيبه چبير ..
بنت أم كرار من جابت صينية التمن وقيمة وبيها ماعون الطرشي اللي تتباهه بعمله والدتها بين نساء المنطقة،
وگالتلي : عمو .. بلكي يفرغولنه المواعين ..
وگلتلها : صار ،
وبگلبي گلتلها : عمو بعينچ ..
بس حسيت ان العراق هم حلو !
البارحه من عطلت سيارة صديقي وخابرنه بالليل على كهربائي وترك راحته وعائلته وإجانه بالبرد والمطر واتدغمث بيها ساعتين حتى يشغلها، حسيت العراق شگد حلو ؟
العراق بيه هوايه شغلات حلوه، وبيه هوايه ناس حلوه، لو تجينه ناس تحكمنه حلوه مثل العراق، وحلوه مثل هوايه ناس عراقيين، چان يمكن : ” تصيرلنه چاره “.
في أمان الله
