يگولون المجالس مدارس ، يا بعد بيتي، وأنه اليوم ارد اسولفلكم سالفة بيها رباط، وانتم اهل عرفه وفطنين
، ياعمي يگولون يوم من الايام التمن الواوية كلهن، ورادن يسطن على سلف ، واتوافگوا يتجاسمون البوگة وچانت صيغة الإتفاق، كل واحد يجيب بوگته ويجمعونهن ونوب يصير الجسم ،وشرطوا على أرواحهم المايجيب شي لا يجي وخله يشوفله ديرة .
راحوا كل واحد سطه على بيت
هذا الحصله دجاجتين ولاخر ثلاث وبيهم وحيده
ما علينه
اكو واوي كلشي ما حصل، من حيث البيت السطه عليه بيت حايچ وما بيه دجاج
ظل يفر بذانه وحارت بيه دنياه، بس هوه ابو الويو شلون يظل بلا سهم !
عاين مناه مناه شاف الصوف تارس البيت، والصبغ احمر وأخضر واصفر . گال لگيته ،اليوم الواوية اله همه بنص وأنه بنص . كظ الصبغ الاخضر وصبغ روحه صار واوي اخضر
وراح لربعه لگاهم يتجاسمون الدجاج، همه هم ما عرفوه ونشده چبيرهم، انت ياهو شو لونك موش مثلنه؟!
گلهم أنه (سيد واوي) واليه نص بكل حصة من هذا الدجاج . بعد سيد ما يردوله طلب . گالوله صار معلانه تامر امر . سيد واوي طاح على الدجاج چتل . والمساكين زينهم الحصله نص دجاجة .
ولن الصايح اجاهم، السلف عرف سالفتهم ولحگهم هذا ابو جناية وذاك بيده فالة المهم شردوا وسيد واوي جدامهم لاگلاهم شط حولوا بالشط يريدون يعبرون الذاك الصوب . سيد واوي بس حول بالشط طاح صبغه، وطلع شعره الاملح واوي ابن واوي، ربعه تعجبوا هاااا أنه غلامك هذا صويحبنه الملعب، ولك ضحكت علينه وكلت أنه سيد واوي اليوم ننزع جلدك وننعل والدي والديك حشه السامع، تولوه وين اليوجعك .
مدري عليمن جبناهه . خايب بويه چاء أحنه چم مرة طلع جلد ربعنه وملاحهم، و چم مرة طاح صبغهم . اظن بينه مرض عمه الالون . تره بويه كلهم مثل سيد واوي حالهم حال جبيرهم الساكت هوه الواوي الجبير.