بلدنا بلد المليون سيد (رجل دين) و اكثرهم قفاصة و حرامية و يمصون بدمنا و هالشي ولّد انعدام ثقة بين المواطن و السيد (رجل دين) و سيد (مدلول) ما صارله هواي بمنطقة بدن المتدين و
مثله الاعلى يقلده بالشاردة و الواردة و اكفر يمه و لا تگول سيد مدلول غلط بشغلة او ساء التصرف لأن الشيوخ و السادة حسب وجهة نظر بدن ما يغلطون و فد مرة الدكتور تحسين الفلاني (
تحسين ابو الليل) چان يم بدن و شاف السيد و گال لبدن (هذا السيد مو عنده موهاڤي؟) بدن گال (لا لك هذا فد انسان بسيط و زاهد و عنده بيك اب مسكربة يروح و يجي بيها) و تحسين گال
(بس مرة شفته راكب موهاڤي والله) بدن گال (يجوز متوهم) تحسين گال (يجوز).
ظل كلام تحسين براس بدن و ظل يفكر بي معقولة سيد مدلول عنده موهاڤي؟ و اذا عنده ليش ما يجيبها لبيته؟ يخاف من الحسد؟ لو ما يكفي كراجه؟ و زاره تحسين مرة ثانية هالاسبوع و هم
شاف السيد و گال (سبحان الله شگد يشبه الي شفته اليوم صاعد سبورتج) بدن ضاج و گال (شسالفة خويه معرض عنده خوما معرض) و تحسين گال (هسه شگلنا عمي قابل سبينا قائد قوات
ذيچ الصفحة) و بدن داخ و ظل يشك بمدلول خاف يطلع يمثل گدام المنطقة عود هو فقير و ما عنده فلوس و يطلع چذاب مثل غيره.
بدن رجع من الگهوة الي يگعد بيها دائماً و صعد سيارته و مشاها و شاف مدلول صاعد موهاڤي و يمكن نفسها الي گال عليها تحسين و لحگ وراها مسافة طويلة و وگفت الموهاڤي گدام بيت
و نزل السيد يريد يفتح باب الكراج و بدن ركض وراه و انصدم شاف البيك اب مال مدلول بالكراج و السبورتج واكفة بره و لزمه و گاله (تضحك علينا سيد مدلول تجينا بالبيك اب و تضم
الموهاڤي هنا؟ يا خسيس چان استحيت على عمامتك) و السيد گال (على كيفك وليدي بس خلي افهمك) بدن بكل عصبية صاح (شتفهمني كلاوچي) و طلع من الكراج ثنين واحد شايب و واحد
بعمر السيد مدلول و نسخة منه حسبالك حاطين مراية و بدن انسطر گال (اني انحولت لو صدگ انتو ثنين ؟) و الرجال الثاني ضحك و گال (بدن اني سيد مدلول و هذا والدي و الي انت
لازمه اخويه التوأم شنشول و ثنينا رجال علم(معممين) (مخترعين دهن المشگ) هاي السبورتج مال الوالد و الموهاڤي مال شنشول).
ارتاح بال بدن و عرف مدلول يختلف عن غيره و السادة (رجال الدين) بعدهم خوش ناس و يتأمن بيهم و بدن عنده طلي مشتريه صار اسبوع من رجع للبيت گايليله معلوس و ما يعرفون منو
علسه و وره يومين مدلول عزم چم واحد من المنطقة و وياهم بدن على غدة و راح اكل و طلع و شاف الصوف مال الطليان المذبوحة و واحد منها عليه العلامة الي راسمها على الطلي مالته !
باوع بدن على العلامة و طلع حسرة چبيرة و گال (بسمارچ منچ يا لوحة).