(امة عربية واحدة ذات رسالة خالدة) شعار ذاك الحزب و رمزه القومي سيف العرب (المخبل) الله يرحمه و الطريف بالموضوع اكثر شخص خرب علاقة العراق بالعرب هو قائد هالحزب و چانو حاطيه حتى يقدموه اضحية بكل طلايبهم ويه ايران لو امريكا لو اسرائيل و معلينا بهالسوالف العتيگة راحت و راح صاحبها بس موضوعنا الاشخاص الي ما يگدرون يستوعبون ذاك الرجال راح و اندفن و بعدهم يحچون وياه و ياكلون وياه بخيالهم و احلامهم و ما يعرفون كل زمن بي سلبياته و المقارنة بين الانظمة غلط و لازم يباوعون للمستقبل مو للماضي و من حق كل واحد يحب الي يريده بس ما ناقصين لوگية.
(غني) الصدامي جار بدن المتدين القافل (بكسر الباء و فتح الدال)(اخو تحسين ابو الليل و حامد ابو الليل من الاب) يگعدون بگهوة بالكسرة و وياهم الصديق الي عرفوه و صاحبوه بالگهوة (جمعة) الشيوعي الشراب و الي بايع السالفة صاحب المقولة الخالدة (كاس بالايد و لا عمامة على الراس و جكارة بالحلگ و لا شوارب فوگ الحلگ) و تگدرون تتخيلون الحوار الي يصير بين هالاشخاص الي كل واحد بعالم مختلف بس الشيوعي عنده تقبل للرأي الي بي منطقية شوية (ركز على شوية) و غني يحب ذاك المخبل حب مو طبيعي و مستعد يبيع بدن علمود صورته و خابص بدن و جمعة بي.
بدن و جمعة راهنو غني تمر گعدة كاملة بدون ما يجيب طاري ذاك الرجال و يشوفوه يگدر لو لا و غني حس بالاهانة و قبل الرهان (الرهان حرام بنظر بدن بس هذا حلال ما بي فلوس) و گعدو ثاني يوم و بدو يحچون على ايام المراهقة و الشباب و بدن حچالهم على مواقف صارت بالثمانينات و گال الله على ذيچ الايام (راد يخلي غني يحچي) بس غني النغل گال اي والله ايام الشباب ما تنعاد و جمعة ضحك لأن چان يعرف نية بدن و جمعة حچالهم على شغلات بالتسعينات و الحصار و گال خطية الشياب و الي برگبتهم عوائل شلون دبروها (يريد يخلي غني يدافع عن ذاك الرجال) و غني گال اييييه المسؤولية صعبة من كبرنا عرفناها و ضحك بدن و جمعة و حتى غني ضحك لأن يعرف ليش ضحكو.
ربح الرهان و ما جاب طاري ذاك الرجال و جمعة راد يروح و گاللهم في امان الله چان يرد غني بدون وعي (الله وياك حبيبي ابو عدي) و فطسو بدن و جمعة من الضحك.