– مائده، يا مائده ..
– لچ مخ البشه: أشو تصيحين مائده، لج آني باجيتچ أم قتيبه، تاج راسچ يا الجگمه !
– باجي: إحنا سواسيه أمام القانون، إنت مائده وآني سعاد!
– لچ يا قانون؟ إحنا بمركز شرطه ؟ لو محكمه؟
– لا مائده، وبدون فلسفه رجاء، إحنا ببيت، وإنت تديرين هذا البيت، وإحنا نريد سحب الثقه عنچ، ونختار واحد غيرچ يلزم مصرف البيت !
– شلون شلون شلون؟ ليش يمه؟ شنو مجوعتكم؟ لو حارمتكم من فد شي ؟
– باجي: انتي لاعبه بينه طوبه، بس غير نخاف نحچي وياچ!
– شنو حاطه السيف على رگابكم، لچ إنت ليش ما عندچ مصداقيه ؟!
– هو آني ما عندي مصداقية؟ لو إنتي تريدين تسيسين القضيه وتمارسين الابتزاز السياسي، وتهديدنه بالملفات العندچ ؟
– سعاد ! لتصدعين راسي، شعندج منو اللي محركچ عليه، أجنده خارجيه، لو تنافس سياسي؟
– مائدة ! انتي عندج فساد اداري ومالي، وما عندچ توازن وطني !
– توازن وطني لچ هذا شنو ؟ إنتي بعثيه ؟
– التوازن الوطني، يعني من يجون خطار من گرابتنه، مو تسويلهم دجاج برازيلي وسمچ مجمد وتمن الحصه وچاي ايراني، ومن يجون گرايبچ: يشتغل التمن العنبر ودجاج العرب والگطان والبني والچاي الليبتون، ولازم يحلون من الخاصكي، و الفاكهة لازم من راغبه خاتون، وميشربون غير الفريش جوس!
– لچ إنتي صدگ حاقده، وأربعه إرهاب !
– أيامچ معدوده باجي، ولازم إتطيرين !
– آني ما أتير ، لو تتيرون كلكم سوسو خانم!
– ليش عيوني ما تتيرين ؟
– لان بس تستجوبوني اطلع سوالفكم كلها، وأفضحكم !
– م يهمنا، لأن محد راح يصدگ بيچ !
– لعد بس تجتمعون أطلب الطلاگ من أبو قتيبه، وأخرب المخطط مالتكم!
– !!!!!!
– سوسو خانم : آني قدركم ماماتي، ولازم ترضخون القدركم !
– م نرضخ مائده خاتون، ووراچ وراچ !
في أمان الله
