أكو مشروع قانون بمجلس النوام, ضاميه وميطلعوه..وين أكو شغله أتفيد المغضوب عليهم أيعلسوها , أكون نهر دجله والحسين أيساعده أيسوي فرع عالمنطقه الخضراء ,وميخلي وزير برلماني ما أيعصره عصر ويزوعه لغف أربع سنين ويطلع حوبه هذا الشعب .. كولو أمين ..هذا القانون لو أيصير, جان كل العراقيين كعد حظهم  وتعدلت أمورهم ..وبعد ما ظل واحد أيكول أني فقير, ولا يطلع بالبجامه يتمشى بشارع المتنبي ,ولا أيسوي سلف حتى يشتري سياره سايبه  أيودي الخاتونه ألبيت أهلها  والعصر تاكسي ,ولا أكو ناس تشتري طحين الحصه الخايس , ولا نسمع قوانه ها طلعو ربع العراقيه ها خشو الكرديه ها تراجعو الصدريه, ولا يوميه مكابلين التلفزيون وكاعدين حتى نسمع خبر زيدو رواتب المتقاعدين لو لا ,وحتى ننسى بوك أبو دشداشه وصفقاته اللي ملينه منها , ولا أبو النفط  يفتر بسيارته وشلون هورن عدهم أيشك الحلك, بس وينك , أنت وشطارتك, وشلون تكدر ما تنكمش من النزاهه.. وبالمناسبه هذا القانون جاري العمل بيه بالاردن , وهناك كل أربعتشهر أتصير حكومه , وهسه صديقي بأربد لحكه السره, وياربي أيصير بالوزاره حتى أيخليني عنده مستشار أعلامي .. القانون مالتنه أيكول.. تحديد ولايه الرئاسات الثلاث بسنتين فقط.. يعني كل حولين يجون الخرفان بالقرعه مثل مال الحج والعمره لو مثل مال يانصيب اللوتو والتوتو, ويحطون أسماء العراقيين فقط من 18 سنه فما فوك, على أن يحمل الجنسيه العراقيه وما عنده جنسيه بلد أخر.. وما كو ما أنطيها وطيحان الحظ , أكو قانون بس ماكو محكمه أتحاديه ولا طاولات مستديره وكلمن عمره فوك السبعين ما مشمول بهذا القانون..ونجيب ناس من بره همه أيسون القرعه , حتى ميصير بيها صناديق زايده وأسماء مكرره , وكلشي بالعدل , ونجيب جهال بس مو عراقيين الله مطيح حظهم وحظ أبوهم وأمهم وريحتهم تموت الصخل.. ونسوي القرعه.
 الطفل الاول الحلو أيجر ريس جمهوريه ,هذا المنصب ما بيده شي ,لا صمام ولا يوميه مصخن وتعالو ودوه المانيا ,لا أكو مدينه الطب وبيها أطباء عراقيين أيخبلون, وما نحتاج بعد الى طائرات المدام المؤجره لان عدنه أسطوله من الطائرات بفضل عمو هداوي العامري ولا كتل كونكريتيه لتغليف مناطق بغداد وعزلها وسعر الوحده ألف وثلاثمائه دولار, يعني أغسل أيديك .. شوفلك أساليب جديده للغف وتكون سياحيه..والطفل الثاني الحلو أيجر ريس حكومه , خالي هذا يلعب فلك بالعراق وكلشي بيده , هو الامر الناهي, بس شوف أبو دشداشه ,عليك أن تكون حذر ومتشوفك الشفافيه والنزاهه, ومحفوظ البكه بيده قاصه البلد كلها ,والمايسترو اللي يوزع المقاولات على جماعته بخط الهجوم ويشلعون بيها للكول, هناك بلندن لو أمريكا.. وبيده أيسوي حكومه مو مثل هاي حجنجلي,ألك بعير ألي طلي, لا بكيفه.. والطفل الثالث الحلو أيجر ريس برلمان ,وهذا يشتغل بالداخل وعالبارد, مقاولات عقود, توظيف ,من فوك من جوه , من الصفاح ,على ترتيب بيته وبيوت أخوته وبيوت خواته وبيوت عمامه وبيوت خواله حتى لا يزعلون عليه , وعلى جم مزرعه لان صاحب البرلمان أيموت على مزارع الدجاج  والخرفان والاباعر..وبعدين أيصير سحب على السعلوات والحبربش الباقين, وذوله ألهم حصص يتقاسموها ويه ريس الحكومه..
بوياي ونصير بالحكومه لو بالبرلمان,ونكلبها عالبطانه,ماكو تبليط أرصفه تبليط شوارع , بالات , أكشاك عالرصيف, ورش تصليح, محلات ذهب , مولات ,أسواق هذني النواعم أنطيها لولد عمي عدهم خبره وبالنص أني وياهم, الصفقات الجبيره مال تهريب نفط  مو عالعداد بالشاحنات على ظهر المطي, تهريب دولارات بحفاظات الجهال,هاي أنطيها لولد خالي بالموانئ أيعرفون شلون أيعبون عبعوب..بظرف سنه أحط  والله ألخلقني  بهاء الاعرجي وصابرالعيساوي بجيب الخرده..تعرفون ليش, أيجار وما أدفع لان عندي بيت حكومي ومأثث وبيه خدم وحشم وأنواع سيارات ثماني الدفع وحمايه, بعد رويحتي الاكل كله بلاش وياه مياه معدنيه بيها غاز وبدون غاز وشرابت وعصاير وفواكه لبنانيه ,كلها عالنثريه, رواتبي ويه الحوافز والبراني والجواني, يصمدن دفتر فوك دفتر, وأسويهن مجلدات وللزايره عدل, أي طبعا مال بنك بالعراق, تشكم ,كلشي ينكشف ويبان , وأسوي جريده وأكتب بيها عمود يومي أتقوا الله بالعراقيين , وأنشر الشكاوي مال ذوله اللي ما طالعه أساميهم بالقرعه ..يعني بصريح العباره, هاي السنتين لازم واحد أيعدل روحه, منيكول يلحكني السره بعد..شدكولون يا جماعه , العراق خربان خربان ومتصيرله جاره ما دام أبو دشداشه وربعه بالوجود!!
وما خفي كان أعظم