اليوم أحجيلكم على هاي الفلوس اللي أطشرت بين بريمر , خرب لشت أبوه, وبين عفطيه مجلس اللطم, مو العطيه أني كتبت العفطيه.. مو بعدين  أبو كتابات  أيغيرها ويكتب العطيه, خلوني أني والشيخ العطيه صايرين حبايب.. المبلغ جان ما أله قيمه وبس 40 مليار دولار وضاع بين سنه 2003 و 2004 ..الحسين عليكم أذا واحد لكاهن أو عده خيط  يوصلنه ألهن, خلي يكتبنه على عنوان  كتابات ..لان هاي فلوس  خمس وزكاة العراقيين , وتنشل أيد وحلك كلمن أخذها ,وخلينه جف العباس عليهن.. ها وأكو 9 مليارات دولار جانت محطوحه بتنكات مال دبس, وين , بالبنك المركزي, وشفناها عالتلفزيون لمن شالوها بطائره شحن أمريكيه,وكال مشعول الصفحه ,هاي الدولارات راح تنفحص بأمريكه, ونفحصت, وهاي الروحه روحه..وأحنه مو عالفلوس, لا والله , أحنه هاي نسيناها ..الفلوس أتروح وتجي, بس أحنه أنريد التنكات, وبحاجه ألها, لان هاي السنه صار عدنه تمر فائض عن الحاجه, وما طول حصلنه على شهاده الايزو والحمد لله, أنريد بهاي التنكات أنصدر بيها تمر, وهاي مهمه أبو الخارجيه, ما طول كاعد وما عنده لا مؤتمر ولا شي ,حتى أيرجعلنه التنكات, حتى لو وصخه, هم ميخالف..وأكو 18 مليار كشفها القاضي وائل عبد اللطيف , هم بزمن أبن الكلب بريمر.. هذا شنو هذا.. أبن الزفره أشلاعب بينه لعب ..يعني أكثر من سبعين مليار دولار, أبن الكحبه, أذا يعرف أسم أمه , خامط من عدنه, وهاي ما عدى الذهب والفضه والزئبق الاسود والازرك, وأشياء ما أيقدروها بثمن.. بأختصار.. العراق كله خمطه ,وجماله كدام أولاد الصايعات والصايعين, مجلس اللطم..
خالي هاي السبعين مليار دولار, لو جانت عدنه هسه, وبيد عراقيين من صدك, مو ذوله الحفلك اللكامه..اللي علسو بكد هذا المبلغ ويمكن أكثر , والله تطلع حوبتنه بيهم , وربك يمهل الجياف بس ما يهملهم , وهسه تشوفون , ينجرون جر , لان أحنه شعب طيب ونصدك بساع , وذوله ضحكو علينه , بس أنتظرو من يضحك بالاخير..ولو هاي السبعين مليار بيدنه بويه, لجان لعبنه جوله ..جان بنينه مدارس, بيها رحلات حلوه, أيكعدون عليها طلاب ولد الخايبه والخايبين.. وبيها كل وسائل التعليم الحديثه.. وسيارات تنقلهم من البيت للمدرسه, ونخلص من لواكة محمد تميم, ومدارسه اللي يوميه توكع على راس الطلاب, والخمط مال طبع القرطاسيه, لا وألا ببيروت, ما أدري أشعدهم بلبنان, وبس متعهد واحد, ليش, أعتقد الشعب يعرف ليش..
 وجان بنينه مستشفيات تخبل, نشوف بيها أجهزه تكشف السرطانات والايدز والملاريه والانفلونزات, وأطبائنه الرائعين بكل الاختصاصات,همه اللي أيشرفون على هاي المستشفيات اللي بيها كل أنواع الادويه اللي يحتاجها المريض , وعدنه ملائكه رحمه وشفاء, عراقيات حلوات , ومخلصات دراسه, ستر الله عليهن, وما نروح أنجيب بنكلاديشيات سود , ريحه أبطهن تكتل المطي ,وسعر الوحده منهن ربع دينار..وجان بالسبعين مليار, بنينه شقق وبيوت وبتصاميم عراقيه أحنه نختارها, وما نشوف حواسم وعشوائيات.. وننطي جماليه لعاصمتنه اللي ما كو مثل جمالها بكل العالم , وما نريد صلاح محافظ ولا محمد الشمري نايب, أنريد عراقيين يبنون بغداد من صدك..وجان بالسبعين مليار بنينه مجاري تفوت بيها تريلات وخلي تمطر عشرين مطره وأحنه أيهمنه شي , عدنه مجاري كل قاده المجلس الاعلى أيفوتون بيها ..
ولو جان باقيه السبعين مليار ,ما بقى فقير, يركض وره الرعايه الاجتماعيه, وأمهاتنه الحلوات أيجدن بالشوارع والكراجات ويتوسلن علمود ألف دينار , ويتفضل عليهن نصار الربيعي وعبالك من جيب أبوه يدفع.. ولا أكو أطفال تبيع علوجه ونفاخات بالشوارع وتشتغل فيترجيه , ولا أكو متقاعد ما عنده بيت وراتب زين , وتصيرله سفرات للخارج حتى لو مره بالسنه, أيشوف العالم بيها وعلى حساب الدوله, وفحوصات شهريه وبلاش ,أيعوض تعب السنين ولهطه بدوائر الدوله.. ويصير عدنه صندوك للعاطلين عن العمل, أيمنحون اللي ما عده عمل لفتره, الى أن يلكوله شغل حسب مؤهلاته وهواياته..
الله لو باقيه هاي السبعين مليار,جان كل طالب وبكل المراحل أيخصصولهم منح شهريه تعينهم حتى أينفعون بلدهم وشعبهم..وجان طز بيك علي الاديب وبلخلاك وزير تعليم,ما نريد منيه منك ولا من أحد,بلدنه بخير وهو صاحب المنيه علينه, مو كاعدين ننتظر هاليوم هاباجر راح أيصوت مجلس الضفادع عالمنحه..وجان صناعتنه الجميله ترجعلنه وأيام قماش فتاح باشا تزهي من جديد, ولحداليوم ما شفنه وزير الصناعه كال سوينه معمل طرشي , معمل خريط , أسمك بالحصاد ومنجلك مكسور.. وجان شفنه بغداد مسيجه خضره واراضينه كلها زرع ,وما نحتاج طماطه ولا بتيته ولا نومي حامض وبرتقال الاردن ولا لبنان, لان ما كو مثل برتقالنه وطماطتنه وخيارنه , والله على خس العراق, أيدمر بالزلاطه..  
ولو مو أبن الخايسه بريمر شالع السبعين مليار, جان عدنه مولات تعقد, وأحسن من هاي بدبي وبأوربه.. ومدن ترفيهيه للعوائل العراقيه بعد جبدي عليهم..جان أصدقائي بالحيانيه وخمس ميل, جان ثبرو العالم ثبر, أيشي بزاخه وزنبور وأيشي حفلات طرب بصراوي أصيل تعجبك, أي أنريد نفرح أنريد نهوس , من أجيتو لليوم ما خليتونه لا نعرس لا نركص , والله شنو , عيب , والله عيب عليكم ,وعلى عناد سامي العسكري.. وبهاي المناسبه أوجه تحيه الى سعيد وعبود الوصخ والى قويسم خايسه وكل أحبابي بخمس ميل ..وتلكي فروخ التيار الصدري( فروخ الثوره سابقا ) والشعله خالي بمسابح ولا بالاحلام, والواحد من ينحصر بوله مو أيذبها بالمسبح, لا يابه لا , أكو مراحيض شرقيه وغربيه , وحمامات بعد السبح, وشامبوات كلها ماركات مو زاهي وصابون أبو الحصه..
 ولو أعرف وينها السبعين مليار دولار, عند يا أبن مستوره, والله ما أنطيها لا مالكي ولا عيساوي, ولا أخلي واحد يعرف بيها, أسوي بيها اللي قريتوه, واللي ما قريتوه.. بس أني كتبت.. لوووووو.. وأقسم بالله, راح أظل أكتب يوميه على هاي الوجوه الطايح حظها, اللي ضيعتنه وضيعت فرحه العراقيين ,وما أخليها أتفوز مره ثانيه بالانتخابات حتى لو غيرت أسمها..لان من ريحتها الجايفه,  راح يعرفها كل العراقيين..
وما خفي كان أعظم