أكيد ما سامعين، لان أغلبكم مو من سكان بغداد الاصليين، ولازم يسفروكم لمناطقكم الاصلية، لانكم خربتوا العاصمه، واذا كان اصلكم من كربلا – مثلا – فراح تصير عدكم مشكله مضاعفه، لان بعد ما يسفروكم اهل الكاظميه الاصليين، راح يستلموكم جماعة ( بيوتات كربلا ) اللي يشترطون ان تكونوا ساكنين من العشرينات بيها، والا انتو : لو براويه ومعدان ( من ريف كربلا ) او لفوه من بقية المحافظات ( اللفوه عند البدو هو الكلب الغريب ). ولازم يسفروكم لمسقط رؤسكم.
اذا كنتم من الناصريه، فتذكروا انكم لازم تكونون من ( اهل الولايه ) والا فانتم معدان، وعليكم العوده لسوق الشيوخ حيث صدرت بطاقة الاحوال المدنية خاصتكم.
بسوق الشيوخ اذا ما كنت من ( النجاده او البغاده او من محلة الحويزه ) فانت عشاير و المفروض يسفروكم لهور الحمار، اللي راح تلگاه جاف، فتضطر ترجع للمحمره ومناك يسفروك للموصل ، اللي راح يحولوك لحلب، مناك يرحلوك للجزيره العربيه حيث (تغلب)، ومن يكتشفون انك تفطر وراهم بخمس دقايق ، يعدموك بالسيف ،وتخلص من كل هاي اللغوه ..
اسولفلكم غير وكت ع السامبو !
في امان الله