_ هاج هاي تذكرة السفر لباريس اقصد لبغداد ، خبلتيني بالملحة مالتج ، روحي بلكي يخطفوج واخلص منج ،،
_ اولاً اشكرك انك حققت حلمي بعد خمس سنيين ،، وثانياً ،، اني اكتشفت ماعندك روح وطنية ولا حس شعبي ولا تلاحم فكري مع العراق والعراقيين ،،
_ خليتها الج ،، بس اذا رجعتي وگلتي التوبة ،، بيدي اسلمج لاي عصابة مبتدئة مو محترفة ،،
_ لا ما اگول بس وصلني للمطار وروح ،،،،
مجرد ان ختمت جوازي تخيلت نفسي في ارض الوطن وبدت عليه اعراض الحنية والوطنية مثل الانفلونزا من ننصاب بيها بدون شعور انگوم انعطس ،، وبدون شعور عدت للماضي ولاحلى ايامي ،، ،واذكرت كلشي حلو بالعراق ،، بداية من اخر عركة ويا بنت الجيران علمود باگت مني قلمي الجاف ،، الى صوت القذايف ورجلي گاعد يشوي تكة بالطرمة واني خاتلة جوة القنفة بالمطبخ واصرخ عليه ،، تعااااال فوت وكت تكة ،، وهو يگلي انموت شبعانيين ولا نموت جوعانيين ،،،
بس والله العظيم اني من الفرح كنت راح اطير قبل الطيارة رغم الذكريات التعبانة مالتي ،، مجرد ذكر اسم بغداد يعني اني اعود لحضن أمي الثانية ،، هي الي ربتني وعلمتني وانطتني شي محد گدر ينطينياه غيرها ،، وهو ( الحب الحقيقي ) ..
صعدت للطيارة واحساسي اني صاعدة لاي بيت عراقي مو طيارة عبالك گاعدة بالهول ، كلهم عراقييين والكل تباوع على الكل بدون اي تعبير واضح على الوجوه ،، زين ابتسموا،، ابجوا ،، اي حاگه في اي حته ،، ماكو الكل صافنة ،، واني هم سويت مثلهم گعدت بالكرسي مالتي اصفن ،،،
اول ما قلعت الطيارة وباعلى صوت ممكن صاح الي گاعد بصفي ،، ( اللهم صلي على محمد وآلـ محمد ) ،،،
_ حجي دعاء السفر بالگلب يكولوه مو اعلان عن الحرب هو ،،
_ اخاف احد ناسي يگوله بگلبه اني گلته عن الكل ،،
_ هم بيها وجهة نظر رغم انها ظاهرة غير حضارية ويانا اجانب گاعدين شراح يفتهمون منك
_ كلشي يفتهمون ذولة اصلاً متعجبين بينه
_ واضح حجي واضح
بعد دقيقتين يرحب الطيار بالركاب ويأسف عن التأخير الي صار بسبب عطل في منظومة الرادار ،، نفسه الرجال الي گاعد بصفي صرح وهم باعلى صوت عنده ( شوفوا الجذاب ميكول الطيارة عاطلة وگوة طيراناها يگول العطل بالمطار ،، يابه اذا مو عاطلة الطيارة هاي وخربانة اني فلا افتهم شي ) ،،
لك ليش حجي هذا التصريح مو اني عندي فوبيا من الطيارات ،، اكو واحد هيجي يگول واحنا بالجو ،، عساها بحظك وابختك طلعت السفرة من خشمي ليگدام من الخرعة ،،،
اندار عليه وبصوت ناصي هل المرة ،، ( فد يوم راح توگع الطيارة وهسة اشوفين ) ،،
حجي انت شبيك ،، عندك معرفة برجلي ؟ وصاك عليه گلك موتها من الخوف ؟ لان اعرفه عنده هيجي طلعات ،،
وصلنا سلامات والطيارة موگعت ونزلنا كلنا احياء نرزق ،، وشعور الفرح لازال يرافقني وزاد عليه دموع مخفية مخزنتها لهذا اليوم بس اريد احد يحضني حتى ابجي ،،
تمت الاجراءات بسهولة رغم الجفاف الواضح على محيا ضابط الجوازات ،، هاي وكلها طيارتين تنزل يمكم لعد لو انت بمطار هيثرو شسوي ؟
على سير تفتيش الجنط الصغيرة وبالحظة الي اريد اخلي جنطي يجي واحد شاب وباقصى سرعة يجاوزني بدون اي اعتذار ولا سبب وجيه ويحط جنطته قبلي ،،،
ليش عيني مو اني قبلك ؟
ينطيني نظرة جانبية فهمت منها ( اني مهم ) ،،
طلع من طاقم الطيارة ،،،
وهذا ادعى ان يكون قمة في الذوق والكياسة مع المرأة واني متأكدة انه يصرف خارج مطار بغداد وباي مطار اخر بطريقة اكثر رقي واكثر احترام ،،
مخليت هاي التصرفات تاثر على مزاجي العالي ،، ولا لهفتي لشوفة الاحباب والاصحاب ،،
طلعت من المطار واني ممصدگة اشوف شارع بي اشجار عبالك صارلي قرن مجاية للعراق ،،
اوووو شجرة ،، الله شگد حلوة ،، الله برميل مگلوب على الرصيف ،، شكله يجنن ،، ممكن اخذ يمه صورة تذكارية ؟
مقبل السايق يوگف ،، گال اكو هوايا على الطريق ،،
لالا ،، شوارع وناس تمشي ،، مستحيل عبالي كلهم ماتوا ،، ( لا مدام ترى هذا الاعلام ديشوه الصورة كلشي مابينا ) ،،
شوف شوف ،، عرباين مال مخضر ،، شنو هل المناظر الحلوة هاي ،، ممصدگة اني ،، ( السايق بس ينفخ ) شبي معرف ؟
تمشي السيارة وعيوني على الشباك ،،
فجأة تبدي اذني توصوص ،، شنو هاي الاصوات ؟ ليش هلگد اكو صراخ بالشارع !!
ووووووووخر ،، ولك ثول هاي سياقة ،، اشتريت الشارع ،، مو هو مال الخلفك ،، لا يا ابن ال ،،،،
ثقافة الشارع والسياقة تحت الصفر ،، مو مشكلة الي شافوا مو شوية ،،
سديت الشباك بس بقا صوت الاغاني الصادرة من السيارات الي يمي ادگ براسي ،،
( اها اها ،، شالو ،، گعدو ،، ماتو ،، احبج ،، انعل ابوج ،، اموتج ،، ) اغاني عنيفة لحب اعنف ،،، بس اكثر اغنية حبيتها رغم تفاهتها ،، شفتها تعبر عن الخيانة بطريقة عصرية ،، تگول كلماتها ( گلبك اشارة خضرا كلمن يجي يعبرا ) ،، منو هذا الي يعرف يوصف هل الوصف غير شرطي واگع بالغرام ؟
تعبت ،، باجر اكمللكم الحلقة الثانية ،،،،،
؟
وصلت الشارع الي يؤدي على بيت اهلي بس جان مغلق ،،
_ عيني ادخل من الفرع الي بعده
_ هم مسدود
_ زين الي بعده ،،
_ هم مسدود
_ الي قبلهم فدوة مو دخت
_ هم مسدود
_ يعني شلون اشتري الف نفاخة واجلب بالخيط وانزل بحديقة اهلي ،، شوفلي حل ،،
_ عيني بلكي تفتحلنا العارضة المدام تريد تدخل للفرع مال بيتها وكله مسدود ،،
_ عندك تصريح دخول ؟
_ لا والله ماعندي بس المدام توها واصلة من الخارج
_ اني ما اعرف منو مدام ،، هسة لو يجي ما ادري منو ما افتح العارضة الا بورقة ،، بابا قانون شبيكم ،، لازم نحترم القانون ،،
شو وخر خليني اني احجي ويا ،،
_ ابو الشباب ،، فدوة لهل الطول ،، شنو هل الحسن ،، شنو هل الاخلاق ،، اني من شفتك گلت انت وما غيرك الي رجع الامن والامان للبلد وخلانا نمشي بطولنه ومنخاف ،، بس فدوة متعبرني بس هل المرة ،،
_ افا عليج ،، العارضة وابوها وامها تنفتحلج ،،
استعاديت ثقتي بالبلد بهذا الموقف النبيل من الاخ الجندي الواگف امام فرع بيت اهلي ،، انتصاري على السايق في اقناع ابو خليل اثار غيرته وبقى يباوعلي بتك عين ،، عباله جاية من الخارج ولابسة مناظر شمسية ،، معرف اقنع جندي طيب منطي مهمة صعبة جداً عليه وهي حماية المنطقة واهلها ،، هذا الانسان البسيط المتشبث بوهم انه يحمي العراق بواسطة عارضة طولها ثلاث امتار وارتفاع مترين ونصف ،، بطلقة وحدة اطير وتاخذ وياها الخوذة والبسطال الي لابسهم ،، جعل منه انسان مسؤول عن موقعه وهذا شي جميل ،، رغم منظره البائس ووكفته بالحر وبالبرد يثير الشفقة اكثر ميثير الخوف ،، والاهم حاط سعفة يابسة فوگ راسه تحميه من حرارة الشمس ،، فلوس ماكو يجيبون فد كرڤان صغير يتناوب بي هو وزميله للاستراحة ،، ،
قضيت السفرة كلها افتر بشوارع بغداد ،، هي افضل من السابق لكنها لازالت تبكي على الصابون والشامبو ،،
وتنوح على اهلها القدامى ،، تريد اولادها البكر ،، فقط احفادها الان يلعبون بالشوارع وككل الاطفال المشاغبين ،، ياكلون ويذبون الاوساخ بالگاع ،،،
في احدى الشوارع شفت بوستر كبير ،، ملطوش على جدار طوله عشرين متر ،، البوستر بي صورتين ،، تحت الصورتين مكتوب ، ، ( قبل ) و ( بعد ) ،، والمقصود قبل التعمير وبعد التعمير ،، هسة عبالكم راح اگلگم شفت صورة ارض قاحلة بور هاي تعني كلمة قبل ،، وصورة سنتر ضخم يمثل كلمة بعد ،،، لالا ،، هل المرة راح اخيب ظنكم للاسف ،، الصورة كانت لكابينة موقف باص مصلحة ،، الصورة قبل التعمير عبارة عن مسطبة حجرية متحجرة ومتحفرة وبيها اثار لطلقات كثيرة ( المفروض ميعمروها حتى تبقى مزار انشد عليه علگ اخضر ) وناخذ منها مراد ،، الصورة الاخرى هي نفس الاولى لكن الان المسطبة الحجرية مصبوغة بلون ازرق فاتح وهذا هو معنى بعد التعمير ،، يا سلام سلم ،، شنو هل العبقرة هذي ،، ذكرتني الصورة بجملة عادل امام الشهيرة ( انا اضيف ) ،،،
گلت ما طولني وصلت ووصلت لبغداد خلي اكمل معاملتي الي صارلها فترة متوقفة بسبب عدم حضوري ..
مراح اگول اسم الدائرة اخاف يطلع الموظف صديق عندي ويشگ المعاملة كلها ويروح التعب ،،،
_ عيني اني جيت بنفسي امشي معاملتي لان حضرتك مقبلت بالوكالة الي سويتها اني للمعقب ،،
_ اي ماكو بعد بالوكالة ،، صار تزوير واحنا منتحمل اغلاطكم ،، انتو عايشين بره واحنا هنا بالضيم وتريدون نمشي اموركم وجمالة تحجون علينا احنا مو كفوئين ،، هذا البلد الي خيره عليكم طلعتوا وعفتوه ،،
_ محاضرتك هذي اني راح اسجلها على سي دي واوزعها لكل المقيمين خارج البلد بس مشيني لان الناس ورايا راح ينامون بحضني من الزحمة ،،
_ على كيفج عيني شدعوه نازوكية ،، افتهمنا انت بره ،، بعدين منو يكول هاي صورتج ؟ ومنو يكول هاي انت ؟ مو احتمال انت منتحلة شخصية ام المعاملة !!!
_ هذا جوازي وبي ختم الدخول ،، وراح اجيب اربع شهود رجال طوال يوگف الصگر على شواربهم ،، وثمان نساء اربعة محجبات واربعة سافرات ،، وستين طفل ،، يحلفون گدامك انو هي اني نفسها الي بالصورة بس الصورة قديمة
_ اممممممممم ،، خلي اسأل المدير .. گعدي انتظري
والگعدة گعدة للظهر وعلى وشك انتهاء الدوام ،، عطف عليه وگال بالصوت الجمهروري :
_ فلانة بنت فلان ،،
_ الاسم الاول مو الي بس اسم ابوية صح ،،
_ تعالي باجر راح ننظر بموضوعج ،،
_ زين ليش مگتلي من الاول تعاي باجر ؟
_ اختي ليش اني بكيفي ، تتصورين ما اريد اساعدج ، بس اني هم موظف محكوم بسلطة اعلى مني ،، المدير الى ان جاوبني ، جاوبتج ،،
_ والله يابه حقك ،، اذا المدير مستهين بوقت المواطن وتعبه وانتظاره بالساعات انت شعليك ،،،
ثاني يوم رجعت للدائرة ،، گعدت انتظر حالي حال الناس ،، بس لاحظت كل الزلم الگاعدة تنتظر شايلة ( سبح ) بيدها ،، حلو منظر السبحة بايد الرجل بس كون يسبح صدك مو يفرها ويفر الملائكة بيها ،،
وصل سرايه ،،
_ اخي اني جيتك البارحة وگتلي تعالي باجر ،،
_ اي اذكرتج ،، وهسة تأكدنا ان الصورة مالتج بس هسة نحتاج منج القائمة الاتية ،،
اثنعش صورة ، البطاقة التموينية ، عقد زواج مصدق من وزارة الخارجية والداخلية والعدل ووزارة الدفاع ووزارة التربية ،،، وعقد ايجار البيت او ملكية البيت ،، وجنسيتج ،، وهوية الاحوال المدنية ،، واثبات مصدق من وزارة الصحة ان ابنج تم طهوره بصورة صحيحة ،،
_ بس هاي الاشياء تريد ؟
خلصت ايامي بسرعة غريبة ،، طارت بصورة عجيبة ،، الاوقات الجميلة دائما عمرها قصير ،،
ملاحظتين اخيرة ،،،
الاولى ،، وجدت ظاهر التدين واضحة لكني لم اجد الله ،،
ثانياً ،، حبيت بغداد اكثر من الاول ،، واگلها كلما اني اكبر هي تحلى ،،