رثاء الى الشاعر الكبير عريان السيد خلف..

الذي التقيته مرتان فقط
من محاسن الصدف التقيت به في تلك الأمسية في مقره الدائم قرب ساحة الاندلس في العاصمة بغداد وكان معي اخي الكبير ابواحمد لأنه كان صديق قديم له أنه الشاعر الوطني العراقي عريان السيد خلف مواليد 1940 شاعر شعبي عراقي ولد في محافظة ذي قار في قلعة سكر على ضفاف نهر الغراف،
وتوفي في بغداد بداية هذا الشهر من عام 2018
انسان مبتسم دوماً ومتواضع بسيط .يحمل هموم العراق وشعبه وماجرى له من ويلات السياسة ..كان متأثر جداً عندما سأل اخي الحاج علي العواد عن اوضاع الموصل وماحصل من قتل وتهجير ونزوح .
دائما سيكارته في فمه وكأنها شيء ملازم له ….
وبعد رحيله تأثرت بقصيدته التي اشتهرت وبعنوان هذا الموت ..واردت أن أكتب هذه الابيات على نفس المفردات اللغوية ولكن مع الفارق الكبير واعتزازنا بالشاعر الكبير السيد عريان السيد خلف فهو من مؤسسي المدرسة الشعرية الشعبية …
اقول في مفردات ابياتي الجوابية…____________________
هذا الموت هذا الموت
رهبة وبيه خوف وبي هجام بيوت
ونلبس ونتعطر زين
وتاليها المغيسل وعگبو عالتابوت
هذا الموت ماعندوا چبير ولا حصانة تفيد
وانعوف الفانية والاهل والمنبوت
زرع كلنا اوادم تارسين الگاع
ولازم يجي اليوم وننحصد بسكوت
هذا الموت هذا الموت
مثل الريل منْ يمر محطات
تصعد ناس هوسة والقطار يفوت
يقهرنا يهدم بينا الحياطين
وهو يمشي سرة للناعي والمنعوت
هذا الموت عمر واحد ترانا نعيش
ونعوف الذهب والمال والياقوت
واسمك ينكتب مامش هوية هناك
بوناسة عالگبر عالحجر منحوت
من بعدك جنين مرافگك كل يوم
وينتظرك تجيلا وياخذك ويفوت
هذا الموت .. هذا الموت
يهز اكبر عرش بلگاع
ويكسر خشم كل طاغوت
هذا الموت هذا الموت
مايبقى غليظ وتارس الگاع
هو أكبر مٓلك بالدنيا هم مسحوت
ضيوف احنا ولانعرف حدود الضيف
وشوطك منتهي ومودع ومزتوت
هذا الموت هذا الموت
يظل صوت الحزن ومواسد الروح
ويظل يمشي معانا قنبلة وموقوت
هذا الموت هذا الموت
هو اقدارنا ومشكلة الوان
أخذ راعي السفينة وصاحب الحانوت
تمشي ويا الصديق وربعك الخلان
وبلحظة ياخذك وصويحبك مبهوت
هذا الموت .هذا الموت
لتگولن مريض ومالي كل حال
ولتكولن سعيد وعافية الجوت
الگبر يأخذ سقيم وشاب واطفال
وسكران ومسيء ومؤمن ومبخوت
هذا الموت هذا الموت
ندري بكل حقيقة بيه
وانعرفو احنا النهاية وثابت ومثبوت
عزيزين انودع جملة احباب
ونرجع نلطم ونبچي بگلب ممقوت
رضعنا الحزن ويا الماي
ومن كثر الحروب وحيلنا مبتوت
هذا الموت هذا الموت
موشعر وقصيدة وبيها نكتب ناي
هو قصة حزن وآلام للمكبوت
ومگابرنا مدن صارت
من كثر الشباب العدنا جعد تموت
ومصايبنا غريبة ومالها عنوان
تحملها العرايس لابسات بتوت
هذا الموت هذا الموت
چم دار انطفت وأصبحت بس آثار
وچم أم اجفلت من شافت التابوت
هذا الموت هذا الموت
معد نموت من طول العمر ونخاف
لوموتة غفل لوكاتم ومكموت
هذا الموت هذا الموت
…………وسلامتكم إن شاء الله……..