تستغرق مناقشة المسائل التافهة عند سياسي أخر الزمان وقتا طويلا, لان بعضهم يعرف عنها أكثر مما يعرف عن المسائل التي تهم الانسان العراقي..الا من مغيث!!
هم راح يكعدون الجماعة, مو علمود تأهل المنتخب العراقي, لا,عيني لا, ذوله همه والطوبه كجه مرحبه, وين أكو بوك, تلكيهم بالسره الاول, والطوبه تركوها لناجح, يلعب بيها لعب, عوافي, خلي ياكلون الجهال, ما دام خالهم بعده بالسلطة.. المهم الجماعة, مسوين كعدة مو طاولة مستديرة , محد كال مستديرة, كال المرجع الفياض, تسون كعدة, من كل الاطراف المتنازع عليهم, وهذا المصطلح شكد اكرهه, مثل ما أكره السبيناغ, والكعده تتألف من عدد من العازفين الماهرين ,على العود خالد العطية والايقاع حيدر الملا, والكمان محمود عثمان, ومشاركة الرادود النقلي هداوي العامري والرادود القضائي محمود الحسن,ويدير الكعدة عموري الحلو,ويرجى عدم اصطحاب الاطفال ,لان هاي الكعدة ما بيها أمان , كلشي يصير, ويمكن يصير مكافش من الروس وتشابك بالايدي ويمكن بوكسات.. معليه اني كلتلكم..
وراح يطبخون, كله شوي, خالي كباب و معلاك,وتكه مال السادة تخبل, ملحها قليل ومتبله بتوابل ايرانية يموت طعمها, وزلاطات وجاجيكيات, وتبولات تملخ ,ومرك انواع , ايشي فاصوليه وايشي بيتنجان وأيشي بتيته وأيشي قيمه, وكلها مطبوخة وي مي اللحم, بعضها بيه ملح قليل ابو الصودا, والمرك الباقية ما بيها ملح, لان بعض الصخول تبريز.. وقوازه صغار, من تحط لحمها بالحلك, ما يحتاجلها سنون, لان سنونهم كلها خربانه مثل عقولهم, بس بلع, وجيب حلك وأكل, وسمج يمه السمج, يدمر ويعقد, مسكوف وعلى نار هاديه, بس ريحته تشلل الحلك, وعلى ذكر الشلل, خطيه صمامنه, يموت على المسكوف, بس هسه هو بياحال, لا يهش ولا ينش, دكول طابوكه ونايمه, أي خلص وخلصوا منه, بس والله تنغصتله.. كل هاي, ويذبون الصوج على ابو أسوري, مطرت, كالوا ابو أسوري والدستور همه السبب, خسر الفريق العراقي, كالو أبوأسوري والدستور,بيهم ثغرات قانونية, لعنة الله على اللي عزمكم..
طبعا اول مره يزقنبون الجماعة, وبعد الزقنبه, يجي الجاي, شلون جاي مهيل, على نار هاديه ومي حلو, حتى مايهم مو مثل ماينه دخيلك ربي, مو من هذا ابو الحصة, الجماعة ما يعرفون شنو الحصة, يسمعون بيها بوسائل الاعلام, وعلى سالفة الحصة, أثنين من نواب عصر الضفادع , زاروا فرنسا قبل فترة, وبالكهوة يم الشانزليزيه , واحنا كاعدين نشرب جاي بس ابو الخيط وشلون خيط !! طرحت عليهم مسألة الحصة راح تنشال ويعوضون الناس بفلوس , واحد منهم كال , ليش هيه بعدها بالعراق , أني أتذكر شالوها في 2003, والثاني كلي , هاي انت شكد قديم , عبالك العراق كبل , وهاي الاخبار اللي تسمعها , ذوله أعداء الديمقراطية يريدون يشوهون سمعة بلدنا , تريدون الصدك , أني أنتفشت.. وكلت معقوله أهلي يجذبون علي, بس قناة العراقية جابت الخبر, كلي الاول, روح أسمعه زين وتعال ناقشنا,تبقون سمعون من الاخير,لا تصير رجعي مؤيد ,واعتذرت منهم, بس بقيت مثل زلك بالحمام!!
نرجع للكعدة, وره الجاي شنو تجي, الكهوه عمي وشلون كهوه, مطحونه ومهروسه ومنخله وعلى نار هم هاديه , واتحدى خير ما بيهم أذا بيهم واحد خير, يشرب فنجان واحد, كل هذا الجاي والكهوه, وهمه ميصحصحون, دكول واحدهم شاربله بطل عرك مسيح مال كبل..
وراها الحلويات, بقلاوه وزلابيا, وكنافه, ومن السمه وحلويات أيرانية تملخ كلها جوز ولوز, كلش طيبه, ومكانكم خالي أي والله.. السبع بيكم اللي يوصل يم الترفك لايت.. فنكم توصلون.
وبعد هذا الطحن , يكدر واحد يناقش سياسه, أنعل ابو السياسة, لابو الخلانا بالسياسه, والتظاهرات شكد صارلها أسبوعين,تلاثة, خليها اربعه, وخمسه, هسه وره الكعده, يروح المطلك والملا والنجيفي للموصل والرمادي وتكريت ويسكتون جماعتهم, واحنا راح نطلع جم واحد من ذوله الخلاصنه مدة محكوميتهم, وجم وحده من النسوان, ونكول راح نسوي لجان تدرس المساءله والعداله والمادة 4 أرهاب, وخلال يومين راح نفتحلكم طريبيل, وبعد لا تضغطون علينا, ويوميه تطلعون مظاهرات..
وكبل ما تخلص الكعدة,يتقدم كليط الكعدة, عموري الحلو, يابه ترى عدنا بيان للشعب, أي لازم نطمنهم ,راح يقراه واعتقده بهاء الاعرجي, أيكول البيان..
لقد كان أجتماع القشمره والصبات ودي وايجابي, وقرروا مواصلة الكعدات التي تؤكد على توزيعها بالتناوب, يعني مره , بيت النجيفي , ومره بيت العطيه , على ان تصرف مبالغ الكعدات من نثريات موازنة 2013, وسنرسم على الورق بس ,خارطة شارع جديدة ومبلطه وبممرين , واحد روحه واحد جيه وبالوسط حديقة ما بين المركز ودولة كردستان الكبرى وسنحل مشكلة كركوك بتأجيرها سنويا الى دولة كبرى وسنتقاسم المبلغ بالتساوي, من اجل عراق فيراري.. وصفك يا شعب ذوله حراميه!!
وما خفي كان اعظم