خالتي تكول : الفضائيين ليش هاجمين علينه

خالتي: خالة شو هلايام مخبوصين بسالفة الفضائيين ما تفهمني معناها … شنو نزلو علينه جماعة كامل الدباغ ؟!
آني : لاخالة .. الفضائيين يعني موظفين وجيش وشرطة ينطون نص رواتبهم للضباط والمدراء ومايداومون .
خالتي : يااا خالة يعني مثل مايكول ابو المثل (اسمك بالحصاد ومنجلك مكسور) !!! … جا والحرام وين صار زين والحجّي السابق مايدري بيهم مو هو جبيرهم ؟!!
آني : خالة بالنسبة للحرام يخلونه بجيبهم المشكوك وبلسانهم يسولفون بي وبس وبالنسبة للحجّي يكولون كولشي يدري بس هو ….
خالتي : اي خالة صحيح والله … خالة انت مو كاتب اريدك تكتب للعبادي وتكوله اكو هواي ضباط يبيعون السيطرات سرقفلية ويبيعون مناطق واجباتهم بدفاتر ويبيعون مناصبهم بمليارات وياخذون فلوس تصليح السيارات ويعوفونها مكسرة وخربانة وإلهم حصة بأكل الجنود ويشتغلون تهريب حديد ونفط ويطلعون ارهابيين بشدات وجنودهم ملتهين بالموبايلات وهمَ وكبارهم واحد يجذب علاخ وعايفين العسكرية ويبيعون ويشترون بيوت وعمارات ونص فلوسهم بالخارج وجانو مدري شلونهم وهسة صارو باشوات . جا ماتشوف شلون الموصل سقطت بيد داعش موداعش سباع طلعو ربعنه فاسدين .
أني : خالة حجيج ذهب راح اكتبه بالفيسبوك
خالتي : اي الف رحمة لمك وبوك … زين خالة العبادي شسوه لهاي الشرذمة ؟
آني : خالة العبادي طلع الضباط تقاعد
خالتي : ياااا !!! والله لو انه بمكانه جان حققت وياهم وقدمتهم للمحكمة همه وجبيرهم وغرمتهم كل الرواتب اللي استلموها وذبيتهم بالسجن ومنعتهم من السفر وحجزت اموالهم المنقولة وغير المنقولة وزينتهم صفر وطلعتهم بالتلفزيون وسويتهم مضحكة حتى يصيرون عبرة ودرس لغيرهم .وجان عزلت الفضائيين من الجيش والشرطة والوظيفة وهم غرمتهم الفلوس الماخذينها .
آني : خالتي محد يكدر يقود البلد بس انتي …
خالتي : زين خالة انت مو تكول رئيس الجمهورية حديدة عن الطنطل جا شمعنه مخلييله ثلث نواب؟!
اني : خالة حتى يلغفون فلوس هم واهلهم وعشيرتهم واحزابهم .
خالتي : جا ماكو فرق طلع الريس ونوابه ونواب العبادي ونواب الجبوري واعضاء مجلس النواب والوزراء من ذاك الوكت لهذا الوكت كلهم فضائيين ورواتبهم حرام لان مامنهم نفع ولادفع بس اللغف.
آني : خالة كافي رحمة لوالديج …. لو اني الشعب العراقي جان انتخبتج وسويتج رئيس وزراء .
خالتي: خالة ابو محمد لاتضحك عليه بس هو يمكن الشعب هم مشترك بشغلة الفضائيين ماتشوفه راح انتخب الفاسدين والفاشلين اللي جابو علينه الفضائيين من المريخ … اووووف منك ياشعب !!!
آني : اي والله خاله هي العلة منه وبينه لان السياسيين من الشعب والضباط والمدراء من الشعب والجابهم لمناصبهم هو الشعب.
خالتي : اي خالة هي الحمة تبدي من الرجلين … خالة جيبيلي نجانه مي بارد لان رجليه حمت ..
آني : خاله من رخصتك اروح افتح الفيس حتى انشر حمة رجليج وحركة كلبج بلكي العبادي يشوفها لو يقراها لو شريف يوصلها اله (لا واصل !!!(.
خالتي : خالة شو ولا وحدة اجتني يمكن البنات هم صايرات فضائيات.
هو شعب لو غالبيته فضائيين … الحمد لله راح نحتل المريخ.