احد الاصدقاء اخبرني ان صديقا عراقيا مقيم في لندن ويحمل جواز سفر بريطاني قد تعرض للسرقة ومن ضمن المسروقات جواز سفره يقول انا قلت له انها مشكلة كل شيء الا الجواز واكيد انت قلق على هذا الموضوع قال له لا ولم القلق في يوم واحد ابلغ عن سرقة الجواز ويصدر لي جواز جديد  ويرسلوه بالبريد  مع اعتذار وكلمات رقيقة وابيات من شعر نزار القباني .. معقولة المسالة بهذه البساطة وجواز بريطاني الذي يعتبر واحد من افضل الجوازات في العالم ( طبعا بعد الجواز العراقي ) … المشكلة يارئيس الوزراء تحتاج الى حل حقيقي وعاجل ارجوك اذهب الى اي دائرة من الجوازات وانظر مئات او الوف الناس لماذا ؟ لماذا هذه التعقيدات اولا المطلوب صك مصدق ب 25000 دينار وهذا وحده يحتاج الى ( طلعان الروح ) لماذا صك  مصدق   الا يمكن ان يكون الدفع نقدا ومباشرة . هذه واحدة الثانية المستمسكات المطلوبة شهادة الجنسية هوية الاحوال المدنية  بطاقة السكن وتبدأ المعاناة .. روح جيب شهادة جنسية ام الفسفور هاي ما تمشي يروح بعد معاناة ودفع يرجع مع شهادة الجنسية .. انت صورتك بشهادة الجنسية ما تشبه صورتك بالاحوال المدنية روح بدل هوية الاحوال المدنية  ( يابه والله هاي صورتي قبل شهر ) لا ما يجوز حط صورتك مال ( باجر ) .. يروح المسكين .. دبر هوية الاحوال المدنية .. يرجع ( طبعا هاي كل مراجعة على الاقل اسبوع ) يباوع الضابط على الاوراق ( يخنزر عليك ) يباوع على الصورة .. اي والله لو مونت جبير بالعمر ومريض جان الا ارجعك بس راح اساعدك تعال بعد شهر حتى تبصم … تجي بعد شهر ونفس الاسطوانه وقاط رزالة ( انت  ليش  اصبعك ممسوح البصمة مو واضحة  يمكن انت تاكل قيمر هوايه لو تاكل باجه  ولسه ماعرفت شنو علاقة البصمة بالكولسترول  ) حامشيك   بس اسالك ما عندك سجل جنائي ما قاتل احد ما طاب السجن ؟؟؟( انت في هذه الحالة تفكر بقتل الضابط ولكن تتذكر اولادك واهلك فتسكت )  تعال بعد شهر حتى تاخذ الجواز بس انت تعال لان تبصم مرة اخرى .. انت وي نفسك تكول اكيد راح ينطوني بيت وي الجواز لانه ما معقوله كل هاي الاجراءات  على الجواز لا مااتصور راح ينطوني سيارة .. لا فتهمت راح ينطوني مرة راح يزوجوني بالكوه هاي شلون شغلة .. الحمد لله شيجي من الحكومة  انعم الله والله حكومة زينة ليش يحجون عليها ..  وتسال نفسك شوفوا الدولة المحترمة شنون تدقق على المجرمين لانه بالعراق اخر قاتل كان ابوطبر وبعدها ابدا ما صار عدنا اي قتل  وماكو ولا واحد عنده سجل جنائي !!!هذا جانب حقيقي من معاناه العراقين للحصول على جواز سفر .. والان المشكلة في الخارج اصعب واعقد خصوصا مع الولادة الجديدة امرأة ولد لها طفل وهي في اي مكان من العالم ( والان العراقيون منتشرون في كل دول العالم ) خذ مثلا في ولاية من ولايات امريكا وتريد اصدار جواز يجب ان تسافر ثلاث او اربع ساعات بالطائرة لتقدم على جواز خذ مثل آخر ولادة طفل في اليمن يذهب الى السفارة العراقية ويفاجأ( والله احنا ما عندنا منظومة )  انت وي نفسك هاي شنو المنظومة يجوز منظومه مال اقمار صناعية وهذه صعبه جدا .. زين يابه شلون اخذ جواز ..  اي بس تتشكون العراقيين روح للامارات الى دبي وتحصل على جواز بس لاتنسى اخذ ابنك  وياك حتى يبصم لان البصمة مهمة ليكون عنده سجل جنائي ( هاي شلون اذا ابني طلع عنده سجل جنائي )  زين هاي شلون اطلع من اليمن ( والله فكرة قبل الحدود اضمه بالصندوق مال السيارة واغطيه   وذوله اليمن كلهم شاربين قات وو.واعبره زين اذا اختنك .. ياله فدوه لمدير الجوازات …. يارب  يامجيب الدعوات يارئيس الوزراء ياوزير الداخلية  …اريد اسال الجواز العراقي واحد من اسوء الجوازات في العالم هذا ليس كلامي  هل هناك حاجة لكل هذه الاجراءات ومن هو بحاجة اليه هل تتوقعون  مثلا شخص نمساوي يزور جواز عراقي او واحد بريطاني لماذا كل هذه الاجراءات طبعا عندما تذهب الى دبي يقولوا لك لقد نفذت الجوازات انتظر بضعة اشهر … نرجوكم ان تحلوا هذه المشكلة  لاداعي لكل هذه الاجراءات في ظل التكنولوجيا الحديثة واختزلوا حلقة البصمة اسالكم بالله لو ذهب وزير التجارة السابق الحرامي  السوداني الى السفارة العراقية في لندن للحصول على جواز ماذا تكون نتيجة البصمة هل عنده سجل جنائي ؟؟؟ ارجوكم انقذوا الناس مع همومهم وكل القهر  … وانتبه ياوزير الداخلية على ضباط الجوازات من غير المعقول نقيب في الجوازات لديه سيارة ( مرسيدس ) ومازال بعض المتقاعدين  المساكين في العراق  لديه ( برازيلي 1883 العفو 1983 )  بشرفكم لو بعهد صدام يسوي هذه الدكة مو ثبرتو الدنيا !! ايها العراقيون حافظوا على اصابعكم لان اذا

انكص اصبعكم او اي عضو من اعضاءكم ماكو جواز !!!
*[email protected]