أنا اليوم متعمد أكتب بالحسجة وبلهجة أهل الفرات الأوسط والسماوة وبني حجيم , وقبل لا أبدي كلامي خلي أشرحلكم شنو معنى ( العوج ) , العوج بلهجة أهل السماوة تعني الأبله , فمن نكول حكومة العوجان يعني حكومة الهبلان أو الغمّان , أنتو بكيفكم شلون تردون تفهموها , طبعا كلكم سمعتوا وقريتوا عن الاتفاق الي صار بين حكومة إقليم كردستان وبين سيد عادل عبد المهدي وزير النفط العراقي , وشلون سولوه زفّة وهيصة , على اعتبار هذا منجز جبير حققته الحكومة للشعب , والعراقيين جاي يتابعون , سيد عادل ماخذله صفحة وسيد ابراهيم بحر العلوم ماخذله صفحة ولجنة النفط والطاقة هم طبكت وياهم , اتصوروا حتى هذا أبو المسلّة الي مسوي روحه وطني ويادفع عن حقوق الشعب هم طكه الزنطاري وطبك وياهم وكعد يروّج للاتفاق , لا وجمالة بعد طبك وياهم بان كي مون أمين عام الأمم المتحدة , وأمريكا متنومسة تكول أنا اتوسطت لهذا الاتفاق .
هسه معقولة هاي الوادم كلها ما تفتهم وبس اياد السماوي مسوي روحه أبو العرّيف والمفهومية ؟ عمي أنا ما أفتهم وانتم الي تفتهمون بالسياسة والاقتصاد , بس يرحمه لأهلكم فهموني , وزير الموارد الكردي من زمان صرّح وكال أحنا نصدر 300 ألف برميل يوميا عبر الأنبوب الكردي الواصل لميناء جيهان التركي , تمام لو لا ؟ وسيد عادل اتفق وياهم يسلموه 150 ألف برميل يوميا , وهاي هم على راسي , زين بقت 150 ألف برميل ينتجها الإقليم يوميا إذا مو أكثر , وهي بالتأكيد أكثر , زين هاي وين راح يوديها الإقليم ؟ يصدرها لو يشربوها ؟ خو أكيد راح يصدروها , تمام لو لا ؟ , هذا النفط المصدّر من قبل حكومة الإقليم شنو تخريجته القانونية ؟ وعائداته ألمن راح تصير ؟ زين يا سيد عادل مو أنت بهذا الاتفاق أنطيت غطاء شرعي وقانوني لحكومة الإقليم بتصدير نفطها لدول العالم , زين إفرض أنّ الحكومة الاتحادية ما توّصلت إلى اتفاق مع حكومة الإقليم حول النفط وهذا متوّقع ومؤكد بحكم التجارب السابقة , وحكومة الإقليم ركبت راسها وراحت سوّتلها سومو كردية على غرار السومو الاتحادية , مثل ما اليوم الأخبار تكول أنّ حكومة الإقليم راح يسون سومو كردية , شراح تسوي سيدنا بهاي الحالة ؟ هم راح ترجع لدول العالم وتكولهم لا تشترون نفط من كاكا مسعود هذا نفط مهرّب ومو شرعي ؟ خو دول العالم مو لعبة بدينا ونتحكم بيهم , تمام لو لا ؟ زين هاي فكرّتوا بيها لو لا ؟ هسه شراح تسوون , اليوم كاكا نيجرفان في بيان لحكومة الإقليم يؤكد على رفض الإقليم تحكم شركة تسويق النفط سومو بنفط الإقليم , هاي الفشخة شراح تخلولها وتطيب ؟ لو هذا البيان بعدكم ما قريتوه ؟ انت سيدنا تكول نيجرفان راح يخلي مليون برميل يوميا وسيد ابراهيم أمس مصرّح يكول نص مليون برميل راح تنزل بجيب الحكومة الاتحادية , والهبك على كيفك , أخذ جلخ يمجلي , سيدنا انتو تضحكون علينا لو على رواحتكم ؟ جا أنت نسيت جم اتفاق صار وي حكومة الإقليم وما التزموا ولا واحد من هاي الاتفاقات , زين قبل لا يصير الخلاف على موازنة 2013 , مو كان المفروض بموازنة 2012 يسلمون الحكومة الاتحادية 96 مليون برميل ؟ شكد سلموا الحكومة الاتحادية , مو بس 6 ملايين برميل وأخذوا كل حصتهم من الموازنة ؟ زين وبموازنة 2013 مو كان المفروض يسلمون الحكومة الاتحادية 250 ألف برميل , ومو أخذوا حصتهم من الموازنة كاملة لو لا ؟ شكد سلموك ؟ زين هسه شنو الي راح يضمن أنّ الإقليم راح يسلمكم نفطه ؟ .
سيد عادل عبد المهدي … أنا اياد السماوي العبد الفقير إلى الله أحجي وياك , باجر حكومة الإقليم إذا استلمت النص مليار دولار وما التزمت بتسليم النفط , راح أقيم عليك وعلى وزير المالية ورئيس الوزراء دعوة قضائية بتهمة التواطئ مع حكومة الإقليم بسرقة أموال الشعب العراقي , شوف سيد عادل أنا مواطن عراقي عمري 60 سنة وكل حياتي ما مستلم درنوح من كل الحكومات العراقية الحكمت العراق , وجاي أشوف بعيوني حقي وحق العراقيين المساكين جاي يلعب بيه شعيط ومعيط .
