الخره أخو البول , وداعتكم هاي مثل ذيج , لا وأضرط .. شوفوهم , كلهم كفاءات في النهب والنصب والاحتيال, ويموتون على تشكيل اللجان .. لا تتفائلون هوايه يا عراقيين .. ما طول هاي الشله التعبانه , بعدها تنهش بهذا البلد , وحياتكم ما تقومنا قايمه .. أشو ما شاء الله , ثلث الوطن بح .. وأثنين مليون سائح , بيك وبالطنب .. وعشره مليون دينار وقطعة أرض بشيب أبهاتهم , لكل شهيد أنطه حياته حتى يبقى أبو نعال نايب لرئيس الجمهوريه .. شعب كلش خطيه .. عايش بفوضى رسموها بشكل دقيق .. يوميه دالغه شكل .. ويوميه طركاعه , كل هذا , حتى تبقى هاي العصابه نفسها تتسلط علينا .. ولا تصدكون زعلهم , وهذا قاطع ,وهذا راح يصير معارضه .. كله جذب بجذب .. وأنعل أبو الخير اللي بيهم ..

طالبنا بالتغيير .. والكفاءة المهنيه والنزاهه .. حتى نكدر نبني دوله , بيها مؤسسات .. وحكومة شراكة قرار من صدك , بيها كل أطياف هذا الشعب الجميل .. وتوسمنا بحكومة تقضي على الفقر اللي صار عنوان المدن العراقيه الحلوه , من الجنوب وأصعد .. ردنا يرجع هذا الوطن حر السيادة وعربي .. ونتخلص من ثقافة ذبح الاخر , اللي نشرها أبو نعال , وسمح لداعش أن تدخل بيوتنا , ونصيرلها حاضنه.. هو هذا التغيير يا مرجعيتنا .. يعني العراق هذا , خلص من الكفاءات والخبرات , والناس الشريفه .. مع الاسف ..هذا أستهزاء وسخريه بقرار الشعب ..

حكومة أبو الكبه تشكلت , بس لحمها بايت وبيه ريحه جايفه , وشكد ماصخه , وتحس بيها عفونه من بعيد .. صدك لابسين قوط حلوه وعمايم مضروبه أوتي , بس راح تعرفوهم من ريحتهم القذره , حتى لو يغسلون بمي الورد , ذولاك همه همه , وأقسم بالله , كلشي مراح يتغير .. الشعب بعد أكثر للحضيض وهمه بسياراتهم الانيقه وبيوتهم المزركشه ودولاراتهم بالبنوك الخارجيه .. والسبب الشعب ..وطز بالشعب .. لان ما بيه خير , وثبت أن المؤمن بالعراق ,يلدغ من جحره مو بس مره .. جاه شايفين كاسر الامواج يصير وزير الداخليه .. وين صايرها بيا وطن ..