اريد اسولفلكم سالوفة … و كل واحد هو و خيالة و شلون يكدر يربط و يفل .
رسالة الاسلام المحمدية بدت سنة 600م بجزيرة العرب ، جيران الجزيرة من الشمال هي الدولة البيزنطية الارثوذكسية وعاصمتها القسطنطينية (اسطنبول هسة).
المهم هذولة الجماعة من سنة 600م الى 1100م يعني (500 سنة) ما الهم علاقة بادوات الحلاقة باللي يجري ببلادنا شلون ؟
محمد طلع … محمد انهزم … انتصر … سوة دولة … مات … خلفوه اصحابة … عمر حرر القدس … عمر سقّط الفرس … اتقاتلوا المسلمين … اتكونت الدولة الاموية … سقطت هاي الدولة … اتكونت الدولة العباسية … سقطت … تتر … مغول و طركاعات سودة …. “المهم احنة معلينا عسى نارهم تاكل حطبهم عرب و بيناتهم” .
عمنة حجي سلجوق التركي اللي جا من وسط آسيا جانت عينة على عاصمتهم (بيهة خوش مربح) و راد ياخذهة مثل ما اخذ الخليفة العباسي ودولتة و خلاها بجيبة .وحضّر الجيوش حتى ياخذها.
همينة المهم : البيزنطيين جيرانا اتخبلوا و اتسودنوا مكالوا الحگولنة راح نتحوسم و عاصمتنا راح تروح بالخسائر واحنة نتشرد و نصير لاجئين ، لا : بس گالوا “الحگو الدين و المذهب الارثوذكسي راح يروح وياكلوه الكفرة المسلمين البرابرة الارهابيين والقدس ( طبعا 500 سنة محد متذكرهة) راح توكع بيدهم (وهي واكعة من زمان) وكنيسة القيامة راح تنحرك مرة لخ وطبعاً (البابا) بالفاتيكان مصدك خبر دك فتاوي القتال و الجنة من اجل القدس و “نروح فدوة احنة و جماجمنا لتراب القدس” و”اللي يموت بالطريق للقدس هو بالجنة” و المسيح يعني القدس ومن هالسوالف .
200 سنة بقت هالحروب اللي سميت بالحروب الصليبية و الشباب ماتوا و النساء ترملت و هذا ليش ؟؟ علمود عيون القدس (اللي اتذكروهة من حمت الحديدة عليهم و عاصمتهم رادت تسقط)
و حشدوا الملايين و طبعاً فلوس الناس راحت للمجهود الحربي و لازم محد يفتح حلكة وهم ليش ؟؟ علمود عيون القدس.
صلاح الدين چان ذكي فاخذهة من عيونهم ورجعوا امراء الحرب لاوروبا ايد ورة وايد گدام و طبعاً الناس منستهة و ضمتهة الهم .
وبالاخير … ثورة صناعية واجتماعية باوروبا و طز بالقدس و طز بالبابا و بأبو البابا و برب البابا لان نريد انعيش مو انموت و فلوسة و ولدنة بعد متروح بجيوب الامراء و راحت الكنيسة وانتهت و صارت بس قصص بالافلام الامريكية و بفيلم الناصر صلاح الدين و البابا صار خراعة خضرة ما عندة غير الفاتيكان متر بمتر يحكم بيهة والناس تتذكرة براس السنة بس …. و عاشت عيشة سعيدة
يگولون التاريخ يعيد نفسة … يمكن صحيح بس الناس ليش متتعض ؟؟
