حب على أطراف محيرجه

حسين العايدي ولد ابن حموله مرتب وحلگه مايفكه الشضاض جنه بت بيت وكل السلف باضحيه يحلف براسه وحسين ابو غيره وبس عساك تنخاه ويروح بدربه ويرد بدربه ويوم يمشي ولاگته وحده من بنات السلف راده من الزرع وطايح الحمل من الدابه ومابيها حيل ترده لوحدها لظهر دابتها ونخت حسين يعاونها وماقصر ابو علي ومن شكرته تلاگن العيون نشدها انتي ياهي.. گالت.. فليحه رد عليها.. وانا حسين يابعد عماتي ومشى ولاهي كدرت تنسى ولا هو راحت من باله ومن رد لأهله گال لأمه يمه اريد مره گالتله يبعد امك تخير من بنات السلف ونخطبها ألك.. كال حسين اريد فليحه وأمه خرطت خدودها ولك حسين لا هيج ولا هيج فليحه فلك صابك وين شفتها؟ يمه بالدرب اليوم من طلعت للشغل. يحسين بينا وبين أهلها ماكو طيبة خاطر. وروح ابوج يو هي يو مايصير..
يصير خير يبعد امك وبالليل التمو ابوه وعمامه واتفقوا يخطبونها لحسين وحسين ماصبر ودالها طارش هي طارت من الفرح وراحت المشيه ساده واجاويد وأبوه وعمامه ورفضوا أهلها ولاحسين ترك الموضوع ولا فليحه نست حسين وگاموا يتلاگون بالدرب واحد يشكي همه للآخر وكل اسبوع حسين يودي خطابه وأهلها يرفضون لما صارن ثلاثين مره خاطبها ومرفوض كعدوا ابوها واخوتها وعمامها وقرروا يزوجونها لواحد من ولد عمها وهي دگت رجلها بالگاع وكالت لو حسين لو الموت وثاني يوم كعدت العشيرة بالمضيف وهدروا دم حسين اذا يظل باضحيه وهي منعوها من طلعت البيت وحسين بقرارة روحه لازم يتواصل ويا فليحه وشكا حاله لوحده من النسوان اسمها ( ام اسعيده) وصارت الواسطه بيناتهم وبعد فتره تمرضت فليحه وسمع حسين وودالها هذا البيت..
كون المرض ماذيك ود منه ليه
ننطرح فرد فراش ونون سويه
ردت عليه فليحه..
وازاني ملج الموت وين انته يحسين
ردتك تنگط الماي وتغمض العين
جاوبها..
خلو حرس بالباب ومنين اطبليج
هاج اخذي روحي ادواج ماتبخل اعليج
بكت بدموع غزيره وهي تسمع رده وقالت..
انته الكتلت الروح ولغيرك ابريه
متكطع الدلال طب مانفع بيه
ولما وصل الرد لحسين بكى لحال حبيبته ثم ارسل لها..
يفليحه گومي وياي خل نشرد بعيد
وخليهم ايتفگون ولد الاجاويد
لكن فليحه رفضت بشكل قاطع وابت ان تسيء الى سمعة أهلها وردت ..
ما امشي لا يحسين وانكب عمامي
انتظر حد ماموت واوفي بكلامي
وظلوا على هذا الحال عشرين سنه لا واحد آيس من الأخر ولا العرب حنت عليهم ومثل هيج ايام قبل سبعين سنه طاحت فليحه بعلة الموت وبسكرات الموت انتبهت وشافت النسوان ملتمات عليها ويبجن وسالتهن.. ليش تبجن وكالت..
كل مرض مابياش خاله استريحن
ينكسر گلب هواي اس لا تصيحن
ثم أسلمت الروح بعد رحلة عشق كبير ووفاء مضني رحمها الله