حامد ابو الليل حاله حال العالم يفتح الفيس بوك بالفي بي ان (vpn) و تحسين ابو الليل همين يفتح منه و مثل ما تعرفون النائب شخصية عامة و حسابه بالفيس بوك لازم يكون ثگيل و رسمي و ما بي شي شخصي و الناس تدور وراه تدواره و ينتبهون على معارفه و اصدقائه.

و من گد ما حامد يعلق على منشورات اخوه الناس عرفو صلة القرابة بينهم و هم ثنينهم نفس اللقب بالفيس بوك (حامد الفلاني ، تحسين الفلاني) و ثنينهم حاطين صورهم و الشبه بيناتهم من ناحية الشكل چبير و واضح و طلبات الصداقة گامت تنزل رگع على حامد و اغلبهم من طرف تحسين.

حامد عنده البوم صور قديمة بي صوره هو و تحسين من چانو صغار بس فضيحة كلها تضحك و مصاليخ حتى شسمه ما لابسين و راد يرفعها بالفيس و يضحك ويه اخوه (ما چان بباله اي فكرة خبيثة) و رفع صورة و سوه اشارة (tag) لتحسين و طلعت ببروفايله و الاعجابات (Likes) وصلت ٩٠ اعجاب.

چانت صورة عادية ما ضوجت تحسين و حذف الاشارة (tag) و اختفت الصورة من بروفايله و خلصت السالفة بس حامد ما گعد راحة و رفع صورة لتحسين فضيحة و الناس تسب و تضحك و تصنف و تسوي مشاركة (share) و ما يگدر يحاچيه لأن رافعها ببروفايله و هو هم موجود بالصورة و حتى لو يحذف الاشارة هالمرة اعجابات هواي و وياها مشاركات يعني اصدقاء الاصدقاء يشوفوها و حامد ما يعرف الخصوصية و منشوراته كلها عام.

و حتى لو يحچي وياه ما يفيد لأن حامد عنودي و ما يسمع كلام و رح يگول صرت نائب و تفيك علينا و بس الله الچبير و هالسوالف و يمكن تخبل حامد و نشر عشر صور وحدة افضح من الثانية و صعدت الحماوة و وصلت روح تحسين لخشمه و فكر بحل و قرر يخترق حساب حامد و يحذفه و رح تنحذف الصور وياه.

عرف واحد هكر ع الفيس بوك و اتفق وياه ينطيه كارت ابو العشرة و يحذف حساب حامد و انطاه رابط الملف الشخصي و گاله بشرني من تخترقه و صار الاتفاق و الهكر ضاف حامد حتى يدزله رابط اذا يفتحه رأساً يتوقف الحساب و قبل حامد طلب الصداقة و الهكر طلع لوتي نشر الرابط على بروفايله و سوه التخصيص بس لحامد حتى محد غيره يشوف المنشور و يفتحه و ما دزه ع الخاص حتى ما يشك حامد و كتب المنشور “اجمل مشجعات مونديال ٢٠١٤”.

حامد يعرف تحسين يحب هالسوالف و بدون ما يفتح الرابط دزه لتحسين ع الخاص و گاله لك هاي صور مال مشجعات يشگن شگ و تحسين الاثول ما يدري بمخطط الهكر و بكل ثقة فتح الرابط و طررب توقف الحساب.

صدگ من حفر حفرة لأخيه وقع فيه