اليوم الرجال قرر يشتري جهاز رياضي ،،
الفكرة صارلها اربع سنوات ،، متمددة على طاولة النقاش ،،
راح تتسائلون ليش ؟
لان مدا نعرف وين انخلي الجهاز ،،،
بغرفة النوم ،، !
بالهول ،، !
بالمطبخ ،، !
بس هاي الاماكن التلاثة كل وحدة منها بيها سلبيات ،،
غرفة النوم معناها محد يگدر يلعب بالجهاز بس ابو الشباب ،، لان الغرفة محجوزة بالاوقات الذهبية للرياضة ،، وممنوع الدخول الها الا بورقة رسمية وباج ،،،،
شلنا الاحتمال الاول لان كل افراد العائلة تريد تستفاد من الجهاز ،،،
زين انخليه بالهول ،،، سلبيات اكثر ،، انو الكل راح تشوفه وتسمع الصوت وتنزعج ،، بين السطور هو ينزعج فقط ،، لان اني ممكن اگعد بالمطبخ اسويلي كيكة او طبخة ،، بس هو وين يروح ؟؟
هذا الاحتمال هم ضعف ويكاد يتبخر ،،،
بقا عدنا المطبخ ،،، سلبيات المطبخ انو ممكن يشم ريحة بصلاية ثوماية ،، او بالصدفة تطير دخاناية من الجدر ،، او يشتهي ياكل لفاية ،،
وهذا هو قمة الازعاج في حالة صعود الرياضي على جهاز الرياضة ،،، ويتنافى مع المزاج العالي والبرستيج الراقي ،، شلنا هذا الاحتمال الاخير هم ،،
بس بقا الموضوع قيد الدرس والتفحيص والتمحيص ،،،
اليوم قرر الرجال يشتري الجهاز ،،،،
_ زين وين رح اتخليه ؟
_ بالممر يم غرف النوم وبهل الحالة محد يزعج احد ولا يضايقه ،،
_ رحمة الله والديك ،، حليتنا المشكلة وراح نضعف ونصير نشطين وحلوين وحبابيين ،،،،
_ بس هاااا اوگفي ،
،
الاوقات مو بكيفكم تستخدمون الجهاز ،،
الصبح اول ساعتين الي ،، احتمال يجي ابالي العب،،
بعد الظهر الي ،،لان اگعد من النوم اريد اتنشط
،
قبل النوم الي ،، لازم اني ،، لان احب العب رياضتي ليلاً احياناً ،،،،
_ اگلك شرايك نطلع من البيت ونعوفه كله الك ،،
_ لالا ،،، اني مضايج منكم ابقوا ،،
بديت اقرا كتاب ( كيفية الانتحار بدون اضرار ) ،،