أبوس رأس من أيكلي عدنا واحد يفتهم بالحكومه لو بالبرلمان ..أوعنده ذرة عقل..أحنا دوله, لو جيس مال زباله, مو عدنا جيش وشرطه وسوات ودجله وقاسم عطا وعبود كنبر ,وما أعرف شنو من المصطلحات اللي ما أنزل الله بيها على حريم السلطان..كل هاي وجماعة خدام الولايتين , خايفين من حزب البعث, ويصورون للشعب الخايب, أقزام النظام السابق , مثل السعلوات اللي تطلع بنص الليل ,ومثل البط اللي يلعب شناو.. ورفاق أبو سراوي كاعدين , بمنطقه ما أتفوت بيها خنفسانه أذا ما عدها باج , وتتفتش كل قلاقيلها.. يالله تدخل من أول سيطره, وكدامها بعد خمسه ,وكلها أجهزه تكشف.. انت متوضي لو جنابه..وقبوطك هذا , لنكه لو مستورد, وتعرف سعر صرف الدولار, أحسن من البنك المركزي .. حتى ضريح العباس( ع ) ما بيه حمايه, بكد ما أكو جيوش وأجهزة تحرس المنطقه الخضراء.. حتى حيدر دبل أبو الفلافل , ميخاف, ويبقى مفتح لاخر الليل.. ولكم ليش خايفين .. أذا من الشعب مرعوبين , لا تصدكون بعد الشعب أيريد الظالم يرجع , ومنو أيريد سيارته تمشي وتاير بطن تاير, ومنو أيريد يرجع يوكف سره بالاسواق المركزيه, ومنو أيريد أيعوف مرته ليالي ويلزم سره عالبنزين , ومنو أيريد يرجع, ويخزن حديقة بيته نفط وبانزين, شكد جنه كمش ومكبسلين , وأحنا حاطين قنابل بحدايقنه ,على ساعه وتنفجر, ويضيع كلشي.. يا جماعه.. البعث بح , يعني راح , وبعد رجعته صارت مستحيله, حتى لو يستنسخ مره ثانيه بأسم أخر, بعد ما نريده, وكته خلص, فنش.. وهذا القرد الدوري, كاعد باليمن ويعوي بكيفه..ومره أيكول أني بالحله, وخله الصخول أيكلبون الحله عالبطانه, ومره أيكول بأربيل, ولكم شحده اليوصل يم حدنه, ليش ترجفون, أنتو مو زلم, لو حامض حلو.. واللي أيريد ذوله أيرجعون, يعني ينطبق عليه المثل العراقي ( الجلب أيحب خناكه)..ولا تخلونه نطلع من قبابيطنه.. عيب,خجلتونه بين الطوايف, وكلها تباوع علينه, عيب, مو أنتو حكومة وكلشي بيديكم.. الله يساعد الشعب, سلاح سز, وكلشي ما عنده, بس البطاقه التموينيه, ويوميه يهددونه بيها.. وصلختونه, وبانت عوراتنا كلها,وماكو ملف نغطي بيه العوره , ونزلتونه أسفل السافلين ..
حتى الاكراد خايفين من البعس, (بالعربي الفصيح بعث) ,زين أنتو ليش ترجفون ..هيه عدوى, لو وليه مال غمان.. مو أنتو مستقلين, وترفعون علمكم من 1991, حتى من جان أبن صبيحه, وانتو وحدكم, وعيني عليكم بارده, ما صار بيكم مثل ما صار بينه .. وجنه من نريد ننطيها اللهيب , نطلع من يمكم..وحجاج المعارضه أيام زمان جانت تجتمع عدكم.. بعد ليش خايفين من البعص.. أشو عدكم كهرباء أربع وعشرين ساعه , وتشربون ماي صافي ومهيل , وشوارعكم نظيفه , وما عدكم سيارات سمند وسايبه , وهواكم شحلاته يرد الروح, وتاخذون 17 بالميه حصه,بعد شتريدون من أبو سراوي ..بس تريدون الصدك, همه هسه بايكين هوى أكثر من كبل , ويتوقعون القشامر ذوله, أيفكرون بعقلية وعنجهية الصنم , وخايفين يجي يوم , ويسويها أبو أسراء, ويتريك بأربيل يم النافوره , ويسوي عراق فيراري بنسخه 2013, وتشوف كنبر يقره البيان رقم واحد, ما دام الصمام مو موجود, والعراق اليوم بيد الخزاعي..وفوت بيها وعالزلم خليها.. وقريت على موقع كردي أيكول بيه واحد, أن الكورد اليوم بيضة قبان العراق, بس المصيبه ما كال بيضة شنو.. وحفظت الدستور كله, وما لكيت كلمه بيضه بيه,وهذا يعتبر خرق دستوري.. مره ثانيه, وضحو رجاءا ما بينه حيل التفسير..
وصارت جذبة أسترجاع البعث , مثل جذبة الحصار عالعراق , أنتفعت بيها بشر هوايه وشركات ومؤسسات , حتى الامم المتحدة أستفادت من فلوس العراقيين ولحد اليوم, وخسرنا أحنا كلشي, وضيعنه شعبنه ووطنه.. وهيه جانت أكبر خدعه عالشعب, وخلونا عرايه عباد الله.. نفطنه لغفوه, علمائنه طيارينه ضباطنه الاحرار مثقفينه فنانينه مبدعينه وينهم.. جماعة الطمغه عالكصه, صفوهم واحد واحد, واللي كدر يكلب, كلب بليله كشره, وأساتذتنه , خو طشروهم طشار..وجابو بمكانهم, أصحاب الشهادات المزوره, وذوله همه, بعدهم دكاتره وماجستير وميخافون , وكلهم طمغة (سخت أيران).. بجال وزيرنا الروعه علي الشاعر..والمصيبه, انو متظاهري الانبار والموصل أيصيحون( بغداد حره حره أيران بره بره) , ولكم يا حره يا بره..الصواب جتال ووصل للبلعوم, أصدقائنه الايرانيين , ما خلوا شبر واحد من البصره , وأنت صاعد, ما اشتروه.. وداخلين عرض بطول بالحكومه, وهيه اللي تقرر شنو يصير وشنو ما يصير..وسمعت مطايه الفالتون يطالبون بولايه ثالثه, بعد أن تعهد أبو سراوي بتنظيم حلو لخليجي 22 , وشدو راسكم يا كرعين..
وما خفي كان أعظم