انك تفكر بالزغيرة والجبيرة ترى يصير عندك ضغط وسكر وكآبة وانفصام بالشخصية وكساح واسرقبوط ،،
وبهل الحالة الدكاترة يستافدون وانت بس الي تاكلها ، توگع ومحد يداريك ،،، ( مو تگول مگتولي ،، اني گتلك )
ثولها ،،
لا تفكر منو ديبوگگ ،، ترى اتفوت الشماعية من تعرف الارقام الي تدخل جيوب الحيتان وانت تجيبها يمنى تجيبها يسرى ،، ماعندك فلس زايد ،، اصلاً ناقص دائما وابداً،، ( المفلس بالقافلة امين ) ،،
ثولها ..
من تعرف ابن الوزير ( ،،،،،، ) سوى عرس ابنه بفندق الامارات بأبوظبي ،، ومعزمك ولا دزلك مسج اعتذار عن اخذ حصتك من النفط كمل بيها فلوس الكوشة الي كلفت مية الف دولار ،،، ( يعني ضميرك يرضى الورد ميكون طبيعي من هولندا ؟ ) ،،
ثولها ،،،
من تعرف ناس صارت بعد ( الاحتلال ) مليارديريه وتحجي معلگ ،، وقبلها كانوا اصحاب عربانة يبعيون بيها جمار بالعرصات ،، ( ترى هذا مو عار هذا كار ) ،،،
ثولها ،،،
لما تشوف صورة أم عراقية تصيح وتستريح ( ولكم اريد اعرف ابني عدل لو ميت ) ،،، وانت گلبك ينزف دم عليها ،، وماعندك جواب الها ،، ( ديلله يمعوده جيبي غيره ، العراقية ولادة ) ،،،
ثولها ،،،
لما يخابروك يگلولك صديقك الي تعشا وياك البارحة ،، مات ،، تسأل شلون مات مو البارحة بالليل ويايا
،ليش مسمعت بالانفجار الصبح الي صار ؟ ،، ( ها صدگ صار انفجار وصديق عمري مات خطييييية ) ،،، عود تعشا ويا غيره ،،
ثولها ،،،
لما تدفع فلوس دروس خصوصية لابنك والتعليم مجاني ،، ولو ينجح لو يرسب ،، وتالي يروح كلية اهلية وراها يتخرج ويگعد بالبيت يگشر بصل ويا امه ،، ( اي شكو بيها ينتظر وحدة تستر عليه وتتزوجه شكو مكبر الموضوع ) ،، كلش كلش ،، اخذله بسطيه يبيع بيها جوارب نايلون نسائية ( باب اول ) ،،،
