والعراق يقف على اعتاب مرحلة انتخابية مقبلة،يحق لكل مرشح ان يعلن عن بضاعته وماذا سيقدم لوفاز (سوو المحافظات منتدى ادبي،ومعرض الوان)، ونحن المواطنين المعنيين بمن سيفوز منا من انشغل في مناقشة الوضع ونتائج الانتخابات وتوقع نتائجها، ومنا من كرس كل مالديه للدفاع عن صنمة اسف حزبه وقائمته،ومنا الغير معني بكل مايجري ساكت يتفرج على الساحة، وهنا نريد ان نناقش بعض من صور وشعارات المرشحين لنرى مالها وماعليها:
– عزم وبناء(مفردة العزم في الفيزياء إذا أطلقت غالبا ما تشير لعزم القوة (moment) وحدة قياسه نيوتن.متر،طيب شنهي عزم اللي رفع هذا الشعار،اذا يسوي الازمة ويعلك الدنيا وانوب يقدم تنازلات مضاعفة،ليبدأ ازمة جديدة… وبناء ثمان سنين ما كافي للبناء اللي ماشاف المواطن شي منه، يكول الشركاء مايخلوني جا هم ماتصلح لان الشركاء هم هم، عود من يتغيرون راح ننتخبك، اتفقنا… )
– محافظ مع عجوز يقدم لها ظرف اكيد يحوي اموال  (شويه مستحى مطي من جيب الخلفوك! وايضا 3200 مولدة مع صورة نفس المحافظ،ابيش اشتريتها بالحقيقة وشكد كتبت بالوصولات العباس عليك! ونفس السيد المحافظ يقول محافظاتنا الاولى في تعويض ضحايا الارهاب خوب اضبط الوضع الامني جا غير محافظتك هم الاولى بعدد العمليات الارهابية، وصورة ثانية ومدارس وهاي المصيبة مدارس مفلشه صار سنتين الهسه مامبنية، وكل اللي مابني الان هو مخلفات المحافظات الساقط السابق!)،ولو كانت لديك ثقة بصدق شعاراتك وقدرتك على ادارة محافظتك لماذا تضع صورة  ابو سريوه وياك!!!وهذه مخالفة قانونية (اذا هسه تخالف القانون اشلون باجر اطبقه)،وهذا لكل مرشح يضع صورة شخصية غير مشاركة بالانتخابات(شوية ثقة بالنفس، اخجلوا!!)
– للعراق( صورة اصبع يبصم،وصورة للبصمة) وهذا شعار لتيار اسلامي لديه 40 نائب بالبرلمان و7 وزراء خدميين ويرأس لجنة النزاهة! ( خوش الخدمات صفر والحمد لله، والتخطيط كلشي ماكو والنزاهة انعكس معناها،فرئيس النزاهة متهم بالفساد!!!) اذن ماذا ستقدمون للعراق،وفي كل هذا لم تقدموا شيء(بس اعترفلكم بالشعارات والجذب مايلحكم نوري المالكي)
– محافظتي اولا(هنا المصيبة عمي انتم بمجالس المحافظات الحالية بغداد عدكم عضوين معذورين ميخالف، زين بالديوانية انتم اغلبية مكرر وماحصلتوا شي،واطيتوها الاذن الطرشى،شنو يضمن هسه من تاخذون اغلبية تحصلون مواقع وتسون لمحافظتي اولا!!! وانوب محفظتكم هسه فارغة لان ماعدكم مناصب شوكت لمن اترسونها وانوب تتوجهون لمحافظتي وتصير اولا!!)
هؤلاء هم حيتان محافظات الوسط والجنوب الذي تتجه الانظار اليهم، دون ان يكلف المواطن الكريم( كلش)!! نفسه لينظر الى مرشحي القوائم الاخرى،وصورهم(اكو صورو نسوان ادوخ)،والى اي حين سنبقى نركض خلف الحيتان الكبيرة (اليجذبون)ونختار بعواطفنا(عمي ماعليكم بأسم القائمة ولا اسم المرشح شوفو برنامجه تاريخه) وللناخب المغمض (مطفي وطابك على صفحة) احذره اذا اختار كما في السابق بعواطفه وعلى اساس اسم القائمة ورئيس الحزب النتيجة الحتمية خيارة الوحيد بعد ظهور النتائج واستلام الكراسي هو: تيهت بمحبتك وانا اعمى العين
بس كلبي على بابك زحف وداني
دلاني وأجيتك وأن شايل ضيم
ومن كتلك اطلبك تكلي مو أني
بس كلبي عنــده عيون
مو أني الاجيتك هو وداني
كلشي توقعت وبالي ألف حساب
بس ماحسبت تلبسلي وجه ثاني
لا علينا ان نحسب مليون حساب فلاخاسر سوانا ولارابح الا من يستغل عواطفنا…