العراق كله يعرف ميول و انتماء الحماوات الوطنية (التحالف الوطني و اتحاد القوى الوطنية) و التحالف الكردستاني (صريح الاسم) و كل طائفة و قومية و محافظة و منطقة و دربونة تريد وزير يمثلها حتى لو علاس و ذيچ الدورة چان عدنا خير من الله وزارات بس هالدورة دمجو چم وزارة و صارت فرهود كل جماعة تريد عدد و الدكتور تحسين الفلاني (تحسين ابو الليل) مثل اي حرامي على باب الله طمع بأي وزارة حتى لو الداخلية او الدفاع (و لو هي دوخة راس بس كل شي يهون علمود المصلحة الوطنية) و هو وجه جديد و نائب من حقه يحلم.
طلع كلام بالاعلام عن مجموعة اسماء من الطوائف و القوميات الي رح تحصل وزارات و انذكر اسم تحسين وياهم و (لفتة) زميل تحسين السياسي گاله لحد هسه مو اكيد الخبر و ما صار اتفاق بس تحسين فرح و عاش اللحظة و گام يستقبل اتصالات الاصدقاء و عمامه باركوله و كنش مقدم البرامج خابره و گاله يريدوه بالقناة يسألوه چم سؤال و ينطوه ٥٠٠٠ دينار و اكيد يقبل تحسين و استقبلوه بالاقمار الصناعية و گعد يحلل و يحچي شغلات عن التفاوضات ما موجودة و محد سامعها من السياسيين غيره (يصفط حچي) و كتب بالفيس بوك (اللهم لا تحملنا ما لا طاقة لنا به) قصده عود صارت عنده مسؤوليات.
لفتة عافه براحته و ما حب يفشله لو يطفي فرحته و ما گاله الاتفاقات اتغيرت و صرفو نظر عنه و الحياة تجارب و خيرها بغيرها و حددو يوم الاثنين جلسة مخصصة لمنح الثقة للحكومة الجديدة و صارت الجلسة و قرو قرآن و رئيس البرلمان يحچي و نواب سووها روضة مو جلسة برلمان واحد يضحك و الثاني يصيح و الثالث يگوم من مكانه و ناس عدها نقطة نظام علمود البصرة و ناس علمود التركمان و ناس علمود الاكراد و ناس علمود السيرة الذاتية و الانجازات مال الوزراء و ما حچو عن الانبار لأن هواي حچو قبل هالجلسة و تحسين گاعد عاقل و ثگيل بعده عباله رح يصير وزير.
و طرح رئيس الوزراء اسامي الوزراء و كلهم مال الدورات القديمة بس وزارة الدفاع و الداخلية ظلت وكالة بيده و گال اسبوع و يختارلها وزراء و ما گال اسم تحسين و المسيح چان عدهم نقطة نظام و تحسين وجهه گام يذب الوان و اتذكر من فشل برئاسة الجمهورية و خنگته العبرة و صاح بعلو صوته سيدي الرئيس نقطة نظام : هناك تهميش واضح ضد فيترچية الشيخ عمر.
تنويه : الفيترچي اخويه و صديقي و والدي و تاج راس كل سياسي